ਮੈਲਬਰਨ: ਆਸਟ੍ਰੇਲੀਆ ’ਚ ਘਰਾਂ ਦੀਆਂ ਕੀਮਤਾਂ (Property Prices) ਬਾਰੇ ਜਾਰੀ ਤਾਜ਼ਾ ਅੰਕੜਿਆਂ ’ਚ ਪਹਿਲਾ ਅਜਿਹਾ ਸੰਕੇਤ ਮਿਲਿਆ ਹੈ ਕਿ ਮਕਾਨਾਂ ਦੀਆਂ ਕੀਮਤਾਂ ’ਚ ਨਰਮੀ ਆ ਰਹੀ ਹੈ। ਤਾਜ਼ਾ ਕੋਰਲੋਜਿਕ ਨੈਸ਼ਨਲ ਹੋਮ ਵੈਲਿਊ ਇੰਡੈਕਸ (HVI) ਅਨੁਸਾਰ ਨਵੰਬਰ ਮਹੀਨੇ ’ਚ ਹਾਊਸਿੰਗ ਮਾਰਕੀਟ ’ਚ ਸਿਰਫ਼ 0.6٪ ਦਾ ਵਾਧਾ ਵੇਖਿਆ ਗਿਆ, ਜੋ ਫਰਵਰੀ ਵਿੱਚ ਕੀਮਤਾਂ ’ਚ ਵਾਧੇ ਦਾ ਚੱਕਰ ਸ਼ੁਰੂ ਹੋਣ ਤੋਂ ਬਾਅਦ ਸਭ ਤੋਂ ਘੱਟ ਮਾਸਿਕ ਵਾਧਾ ਹੈ।
ਪਿਛਲੇ ਮਹੀਨੇ ਦੌਰਾਨ ਮੈਲਬਰਨ (-0.1%) ਅੰਦਰ ਪ੍ਰਾਪਰਟੀ ਦੀਆਂ ਕੀਮਤਾਂ ਹੇਠਾਂ ਡਿੱਗੀਆਂ ਹਨ। ਹੋਬਾਰਟ (-0.1%) ਅਤੇ ਡਾਰਵਿਨ (-0.3%) ’ਚ ਵੀ ਇਸੇ ਤਰ੍ਹਾਂ ਦਾ ਇਸੇ ਤਰ੍ਹਾਂ ਦੇ ਅੰਕੜੇ ਵੇਖਣ ਨੂੰ ਮਿਲੇ। ਜਦਕਿ ਸਿਡਨੀ (0.3%) ’ਚ ਕੀਮਤਾਂ ’ਚ ਵਾਧੇ ਦੀ ਰਫ਼ਤਾਰ ਸਭ ਤੋਂ ਹੌਲੀ ਰਹੀ। ਹਾਲਾਂਕਿ ਤਿੰਨ ਪ੍ਰਮੁੱਖ ਰਾਜਧਾਨੀਆਂ, ਬ੍ਰਿਸਬੇਨ (1.3), ਐਡੀਲੇਡ (1.2) ਅਤੇ ਪਰਥ (1.9) ’ਚ ਕੀਮਤਾਂ ’ਚ ਮਜ਼ਬੂਤ ਵਾਧਾ ਜਾਰੀ ਰਿਹਾ ਹੈ। ਕੈਨਬਰਾ ’ਚ ਪ੍ਰਾਪਰਟੀ ਕੀਮਤਾਂ ’ਚ 0.5% ਦਾ ਵਾਧਾ ਵੇਖਣ ਮਿਲਿਆ।
ਇਸ ਦੇ ਬਾਵਜੂਦ, ਪ੍ਰਾਪਰਟੀ ਕੀਮਤਾਂ ਨਵੰਬਰ ਮਹੀਨੇ ਦੌਰਾਨ ਆਪਣੇ ਸਭ ਤੋਂ ਉੱਚੇ ਔਸਤ ਰਿਹਾਇਸ਼ੀ ਮੁੱਲ ’ਤੇ ਪਹੁੰਚ ਗਈਆਂ। ਅਪ੍ਰੈਲ 2022 ’ਚ ਸਿਖਰ ਛੂਹਣ ਤੋਂ ਬਾਅਦ ਕੀਮਤਾਂ ਜਨਵਰੀ 2023 ਤਕ 7.5٪ ਤਕ ਡਿੱਗੀਆਂ ਸਨ। ਪਰ ਪਿਛਲੇ 10 ਮਹੀਨਿਆਂ ਵਿੱਚ ਮਕਾਨ ਦੀਆਂ ਕੀਮਤਾਂ ਵਿੱਚ 8.3٪ ਦਾ ਵਾਧਾ ਹੋਇਆ। ਤਾਜ਼ਾ ਤੇਜ਼ੀ ਤੋਂ ਬਾਅਦ ਪ੍ਰਮੁੱਖ ਇਲਾਕਿਆਂ ਵਿੱਚ ਪ੍ਰਾਪਰਟੀ ਬਾਜ਼ਾਰ ਸਥਿਰ ਹੋ ਰਿਹਾ ਹੈ ਅਤੇ ਔਸਤਨ ਰਾਸ਼ਟਰੀ ਜਾਇਦਾਦ ਦੀ ਕੀਮਤ 753,654 ਡਾਲਰ ਦੇ ਰਿਕਾਰਡ ਉੱਚੇ ਪੱਧਰ ’ਤੇ ਹੈ।
ਅਪਾਰਟਮੈਂਟ ਦੀ ਗੱਲ ਕਰੀਏ ਤਾਂ ਡਾਰਵਿਨ ਨੂੰ ਛੱਡ ਕੇ ਹਰ ਰਾਜਧਾਨੀ ਸ਼ਹਿਰ ਵਿੱਚ ਅਪਾਰਟਮੈਂਟ ਦੀਆਂ ਕੀਮਤਾਂ ਵੱਧ ਰਹੀਆਂ ਹਨ, ਔਸਤਨ ਕੀਮਤ ਹੁਣ 450,000 ਡਾਲਰ ਤੋਂ ਵੱਧ ਹੈ। ਸਿਡਨੀ ਵਿਚ ਇਹ ਬਹੁਤ ਜ਼ਿਆਦਾ 836,000 ਡਾਲਰ ਹੈ।
ਵਿਆਜ ਦਰਾਂ ਦੀ ਗੱਲ ਕਰੀਏ ਤਾਂ ਇਹ ਪਿਛਲੇ ਸਾਲ ਮਈ ਤੋਂ ਹੀ ਵਧ ਰਹੀਆਂ ਹਨ, ਅਤੇ ਇਸ ਨਾਲ ਪ੍ਰਾਪਰਟੀ ਕੀਮਤਾਂ ਦੇ ਵਾਧੇ ’ਚ ਮੰਦੀ ਆਈ ਹੈ ਕਿਉਂਕਿ ਖਰੀਦਦਾਰਾਂ ’ਚ ਹੁਣ ਇਨ੍ਹਾਂ ਵਧੀਆਂ ਕੀਮਤਾਂ ਦਾ ਭੁਗਤਾਨ ਕਰਨ ਦੀ ਸਮਰਥਾਂ ਨਹੀਂ ਰਹੀ। ਮੰਗ ਬਾਜ਼ਾਰ ਦੇ ਦਰਮਿਆਨੀ ਤੋਂ ਘੱਟ ਕੀਮਤਾਂ ਵਾਲੀ ਪ੍ਰਾਪਰਟੀ ਵੱਲ ਤਬਦੀਲ ਹੋ ਰਹੀ ਹੈ, ਜਿਸ ਵਿੱਚ ਇਕਾਈਆਂ ਅਤੇ ਅਪਾਰਟਮੈਂਟ ਸ਼ਾਮਲ ਹਨ।
ਕਿਰਾਏ ਦੀਆਂ ਕੀਮਤਾਂ ਲਗਾਤਾਰ 40 ਮਹੀਨਿਆਂ ਤੋਂ ਵੱਧ ਰਹੀਆਂ ਹਨ, ਜਿਸ ਵਿਚ ਸਭ ਤੋਂ ਵੱਡਾ ਵਾਧਾ ਅਪਾਰਟਮੈਂਟਾਂ ਜਾਂ ਇਕਾਈਆਂ ਲਈ ਵੇਖਿਆ ਗਿਆ। ਹਾਲਾਂਕਿ, ਮੰਗ ਘੱਟ ਹੋ ਰਹੀ ਹੈ ਕਿਉਂਕਿ ਪਰਿਵਾਰ ਵਧੇਰੇ ਭੁਗਤਾਨ ਨਹੀਂ ਕਰ ਸਕਦੇ।
ਪਹਿਲੀ ਵਾਲੀ ਘਰ ਖਰੀਦਣ ਦੀ ਕੋਸ਼ਿਸ਼ ਕਰਨ ਵਾਲੇ ਬਾਜ਼ਾਰ ਵਿੱਚ ਦੁਬਾਰਾ ਦਾਖਲ ਹੋ ਰਹੇ ਹਨ, ਕਿਉਂਕਿ ਕੁਝ ਨੂੰ ਕਿਰਾਏ ਦੀ ਬਜਾਏ ਅਪਾਰਟਮੈਂਟ ਜਾਂ ਯੂਨਿਟ ਖਰੀਦਣਾ ਵਿੱਤੀ ਤੌਰ ’ਤੇ ਵਧੇਰੇ ਵਿਵਹਾਰਕ ਲੱਗਦਾ ਹੈ। ਇਹੀ ਰੁਝਾਨ ਖਾਸ ਤੌਰ ’ਤੇ ਮੈਲਬਰਨ ਵਿੱਚ ਸਪੱਸ਼ਟ ਹੈ, ਜਿੱਥੇ ਪਹਿਲਾ ਘਰ ਖਰੀਦਦਾਰ ਸੰਭਾਵਤ ਤੌਰ ’ਤੇ ਇੱਕ ਅਪਾਰਟਮੈਂਟ ਖਰੀਦਣ ਦੀ ਬਜਾਏ ਇਸ ਨੂੰ ਕਿਰਾਏ ’ਤੇ ਲੈ ਕੇ ਪੈਸੇ ਬਚਾ ਸਕਦੇ ਹਨ।
ਰੀਜਨਲ ਆਸਟਰੇਲੀਆ ’ਚ ਮਕਾਨਾਂ ਦੇ ਮੁੱਲ ਮਈ 2022 ਵਿੱਚ ਦਰਜ ਕੀਤੇ ਗਏ ਇਤਿਹਾਸਕ ਉੱਚੇ ਪੱਧਰ ਤੋਂ 1.8٪ ਹੇਠਾਂ ਹਨ, ਰੀਜਨਲ ਵਿਕਟੋਰੀਆ (-6.7٪) ਅਤੇ ਰੀਜਨਲ NSW (-5.5٪) ’ਚ ਰਿਕਾਰਡ ਪੱਧਰਾਂ ਤੋਂ ਸਭ ਤੋਂ ਵੱਡੀ ਕਮੀ ਦਰਜ ਕੀਤੀ ਹੈ।
More Read
