ਮੈਲਬਰਨ : ਆਸਟ੍ਰੇਲੀਆ ਦੇ ਡਰਾਈਵਰਾਂ ਲਈ ਐਤਵਾਰ 2 ਅਗਸਤ 2026 ਤੋਂ ਵੱਡਾ ਝਟਕਾ ਆਉਣ ਵਾਲਾ ਹੈ। ਸਰਕਾਰ ਵੱਲੋਂ ਦਿੱਤੀ ਗਈ ਅਸਥਾਈ ਫਿਊਲ ਐਕਸਾਈਜ਼ ਕਟੌਤੀ ਖ਼ਤਮ ਹੋ ਰਹੀ ਹੈ, ਜਿਸ ਨਾਲ ਪੈਟਰੋਲ ਦੀ ਕੀਮਤ ਵਿੱਚ 16 ਸੈਂਟ ਪ੍ਰਤੀ ਲੀਟਰ ਦਾ ਵਾਧਾ ਹੋਵੇਗਾ। ਇਸ ਨਾਲ ਰਾਸ਼ਟਰੀ ਔਸਤ ਕੀਮਤ 210 ਸੈਂਟ ਪ੍ਰਤੀ ਲੀਟਰ ਤੋਂ ਉੱਪਰ ਜਾਣ ਦੀ ਸੰਭਾਵਨਾ ਹੈ।
ਮੌਜੂਦਾ ਅੰਕੜਿਆਂ ਮੁਤਾਬਕ, ਅਨਲੀਡਡ 91 ਦੀ ਔਸਤ ਕੀਮਤ 196.8 ਸੈਂਟ ਪ੍ਰਤੀ ਲੀਟਰ ਹੈ, ਜਦਕਿ ਡੀਜ਼ਲ 237 ਸੈਂਟ ਪ੍ਰਤੀ ਲੀਟਰ ’ਤੇ ਹੈ। ਵਿਕਟੋਰੀਆ ਸਭ ਤੋਂ ਸਸਤਾ ਸਟੇਟ ਹੈ (195.8 ਸੈਂਟ ਪ੍ਰਤੀ ਲੀਟਰ), ਜਦਕਿ ਨਾਰਦਰਨ ਟੈਰਿਟਰੀ ਸਭ ਤੋਂ ਮਹਿੰਗਾ (243.4 ਸੈਂਟ ਪ੍ਰਤੀ ਲੀਟਰ )। ਦੂਰ-ਦਰਾਜ ਇਲਾਕਿਆਂ ਵਿੱਚ ਕੀਮਤਾਂ ਪਹਿਲਾਂ ਹੀ 300 ਸੈਂਟ ਪ੍ਰਤੀ ਲੀਟਰ ਤੋਂ ਵੱਧ ਦਰਜ ਕੀਤੀਆਂ ਜਾ ਰਹੀਆਂ ਹਨ।
ਵਿੱਤ ਮੰਤਰੀ Katy Gallagher ਨੇ ਪੁਸ਼ਟੀ ਕੀਤੀ ਕਿ ਇਹ ਕਦਮ ਹਮੇਸ਼ਾ ਅਸਥਾਈ ਸੀ ਅਤੇ ਸਿਰਫ਼ ਇੱਕ ਮਹੀਨੇ ਲਈ ਵਧਾਇਆ ਗਿਆ ਸੀ, ਕਿਉਂਕਿ ਵਿਸ਼ਵ ਤੇਲ ਬਾਜ਼ਾਰ ਅਸਥਿਰ ਸੀ। ਸਰਕਾਰ ਹੁਣ ਲੰਬੇ ਸਮੇਂ ਲਈ ਰਹਿਣ-ਸਹਿਣ ਦੇ ਖ਼ਰਚੇ ਘਟਾਉਣ ’ਤੇ ਧਿਆਨ ਦੇ ਰਹੀ ਹੈ।
ਮਾਹਰਾਂ ਨੇ ਚੇਤਾਵਨੀ ਦਿੱਤੀ ਹੈ ਕਿ ਐਕਸਾਈਜ਼ ਵਾਧੇ ਤੋਂ ਪਹਿਲਾਂ ਘਬਰਾਹਟ ’ਚ ਜ਼ਰੂਰਤ ਤੋਂ ਜ਼ਿਆਦਾ ਪੈਟਰੋਲ ਦੀ ਖਰੀਦਦਾਰੀ ਹੋ ਸਕਦੀ ਹੈ। ਇੱਕ ਆਮ 50 ਲੀਟਰ ਟੈਂਕ ਭਰਨ ਲਈ ਡਰਾਈਵਰਾਂ ਨੂੰ ਸੋਮਵਾਰ ਤੋਂ ਲਗਭਗ 9 ਡਾਲਰ ਵੱਧ ਦੇਣੇ ਪੈਣਗੇ।
ਜੁਲਾਈ ਵਿੱਚ ਹੀ ਕੀਮਤਾਂ 28 ਸੈਂਟ ਵਧ ਚੁੱਕੀਆਂ ਹਨ, ਇਸ ਲਈ ਐਕਸਾਈਜ਼ ਵਾਧਾ ਪਰਿਵਾਰਾਂ ਅਤੇ ਕਾਰੋਬਾਰਾਂ ’ਤੇ ਹੋਰ ਦਬਾਅ ਪਾਏਗਾ ਅਤੇ ਸ਼ਹਿਰੀ ਤੇ ਪਿੰਡਾਂ ਦੀਆਂ ਕੀਮਤਾਂ ਵਿੱਚ ਖੱਡ ਹੋਰ ਵੱਡੀ ਹੋਵੇਗੀ।
