ਮੈਲਬਰਨ : ਫੈਡਰਲ ਕੋਰਟ ਦੇ ਜੱਜ ਨੇ ਫੈਸਲਾ ਸੁਣਾਇਆ ਹੈ ਕਿ ਸੈਨੇਟਰ Pauline Hanson ਨੇ ਦੋ ਸਾਲ ਪਹਿਲਾਂ ਸੋਸ਼ਲ ਮੀਡੀਆ ਪੋਸਟ ਰਾਹੀਂ ਗ੍ਰੀਨਜ਼ ਪਾਰਟੀ ਦੀ ਸੈਨੇਟਰ ਮੇਹਰੀਨ ਫਾਰੂਕੀ ਨਾਲ ਨਸਲੀ ਵਿਤਕਰਾ ਕੀਤਾ ਸੀ। ਸਤੰਬਰ 2022 ’ਚ ਕੀਤੀ ਗਈ ਇਸ ਪੋਸਟ ’ਚ ਫਾਰੂਕੀ ਨੂੰ ਮਹਾਰਾਣੀ ਐਲਿਜ਼ਾਬੈਥ-2 ਦੀ ਮੌਤ ’ਤੇ ਦਿੱਤੇ ਇੱਕ ਬਿਆਨ ਦੇ ਜਵਾਬ ’ਚ ਪਾਕਿਸਤਾਨ ਵਾਪਸ ਜਾਣ ਲਈ ਕਿਹਾ ਗਿਆ ਸੀ। ਜਸਟਿਸ Angus Stewart ਨੇ ਨਸਲੀ ਵਿਤਕਰਾ ਐਕਟ ਦੀ ਧਾਰਾ 18ਸੀ ਦੇ ਤਹਿਤ ਹੈਨਸਨ ਦੀ ਟਿੱਪਣੀ ਨੂੰ ਗੈਰਕਾਨੂੰਨੀ ਪਾਇਆ ਅਤੇ ਕਿਹਾ ਕਿ ਇਸ ਟਿੱਪਣੀ ’ਚ ਫਾਰੂਕੀ ਅਤੇ ਗੋਰੇ ਤੋਂ ਇਲਾਵਾ ਹੋਰ ਰੰਗ ਦੀ ਚਮੜੀ ਵਾਲੇ ਲੋਕਾਂ, ਪ੍ਰਵਾਸੀਆਂ ਅਤੇ ਮੁਸਲਮਾਨਾਂ ਨੂੰ ਅਪਮਾਨਿਤ ਕਰਨ ਅਤੇ ਡਰਾਉਣ ਦੀ ਸੰਭਾਵਨਾ ਹੈ।
Hanson ਨੂੰ ਪੋਸਟ ਨੂੰ ਹਟਾਉਣ ਅਤੇ ਫਾਰੂਕੀ ਦੀ ਕਾਨੂੰਨੀ ਫੀਸ ਨੂੰ ਕਵਰ ਕਰਨ ਦਾ ਹੁਕਮ ਦਿੱਤਾ ਗਿਆ। ਫਾਰੂਕੀ ਨੇ ਇਸ ਫੈਸਲੇ ਦੀ ਸ਼ਲਾਘਾ ਕਰਦਿਆਂ ਕਿਹਾ ਕਿ ਇਹ ਨਫ਼ਰਤ ਭਰੇ ਭਾਸ਼ਣ ਅਤੇ ਬੋਲਣ ਦੀ ਆਜ਼ਾਦੀ ਵਿਚਾਲੇ ਇਕ ਰੇਖਾ ਖਿੱਚਦਾ ਹੈ ਅਤੇ ਇਸ ਗੱਲ ਦੀ ਪੁਸ਼ਟੀ ਕਰਦਾ ਹੈ ਕਿ ਗੋਰੇ ਰੰਗ ਤੋਂ ਇਲਾਵਾ ਰੰਗ ਦੀ ਚਮੜੀ ਵਾਲੇ ਲੋਕਾਂ ਨੂੰ ਸ਼ੁਕਰਗੁਜ਼ਾਰ ਹੋਣ ਜਾਂ ਚੁੱਪ ਰਹਿਣ ਦੀ ਜ਼ਰੂਰਤ ਨਹੀਂ ਹੈ। ਉਸ ਨੇ ਨਸਲਵਾਦ ਵਿਰੁੱਧ ਹੋਰ ਉੱਚੀ ਆਵਾਜ਼ ਵਿੱਚ ਬੋਲਣ ਦੀ ਸਹੁੰ ਖਾਧੀ।
ਹਾਲਾਂਕਿ, Hanson ਨੇ ਅਦਾਲਤ ਦੇ ਫੈਸਲੇ ’ਤੇ ਨਿਰਾਸ਼ਾ ਜ਼ਾਹਰ ਕੀਤੀ ਅਤੇ ਫੈਸਲੇ ਵਿਰੁੱਧ ਅਪੀਲ ਕਰਨ ਦੀ ਯੋਜਨਾ ਬਣਾਈ ਹੈ, ਇਹ ਦਲੀਲ ਦਿੰਦੇ ਹੋਏ ਕਿ ਇਹ ਸਿਆਸੀ ਪ੍ਰਗਟਾਵੇ ਦੀ ਆਜ਼ਾਦੀ ’ਤੇ ਅਸਰ ਪਾਉਂਦਾ ਹੈ।
Related Posts:
