15 ਸਾਲਾਂ ’ਚ ਪਹਿਲੀ ਵਾਰ ਆਸਟ੍ਰੇਲੀਆ ਦੇ ਹਰ ਕੈਪੀਟਲ ਸਿਟੀ ’ਚ ਘਰਾਂ ਦੀਆਂ ਕੀਮਤਾਂ ਡਿੱਗੀਆਂ

Sea7 Australia Team
4 Min Read

ਮੈੱਲਬਰਨ : Domain ਦੀ ਤਾਜ਼ਾ ਰਿਪੋਰਟ ਅਨੁਸਾਰ, ਆਸਟ੍ਰੇਲੀਆ ਦੀ ਪ੍ਰਾਪਰਟੀ ਮਾਰਕੀਟ ’ਚ ਇੱਕ ਵੱਡਾ ਇਤਿਹਾਸਕ ਬਦਲਾਅ ਦੇਖਣ ਨੂੰ ਮਿਲਿਆ ਹੈ। ਪਿਛਲੇ 15 ਸਾਲਾਂ ’ਚ ਇਹ ਪਹਿਲੀ ਵਾਰ ਹੈ ਜਦੋਂ ਸਤੰਬਰ ਤਿਮਾਹੀ ਦੌਰਾਨ ਦੇਸ਼ ਦੇ ਹਰ ਕੈਪੀਟਲ ਸਿਟੀ ’ਚ ਘਰਾਂ ਦੀਆਂ ਕੀਮਤਾਂ ’ਚ ਗਿਰਾਵਟ ਆਈ ਹੈ। ਕੁੱਲ ਮਿਲਾ ਕੇ ਕੀਮਤਾਂ ’ਚ 4.7% ਦੀ ਕਮੀ ਦਰਜ ਕੀਤੀ ਗਈ ਹੈ, ਜੋ ਕਿ ਰਿਕਾਰਡ ਉੱਤੇ ਹੁਣ ਤੱਕ ਦੀ ਸਭ ਤੋਂ ਵੱਡੀ ਤਿਮਾਹੀ ਗਿਰਾਵਟ ਹੈ। Domain ਦੀ ਤਾਜ਼ਾ House Price Report ਅਨੁਸਾਰ, ਸਿਰਫ਼ ਤਿੰਨ ਮਹੀਨਿਆਂ ਵਿੱਚ ਘਰਾਂ ਦੀਆਂ ਔਸਤ ਕੀਮਤਾਂ ਵਿੱਚ 4.7 ਫੀਸਦੀ (ਲਗਭਗ $60,000) ਦੀ ਕਮੀ ਆਈ ਹੈ।

ਅੰਕੜਿਆਂ ਅਨੁਸਾਰ, ਸਭ ਤੋਂ ਤੇਜ਼ ਗਿਰਾਵਟ Perth ਦੇ ਬਾਜ਼ਾਰ ’ਚ ਦੇਖੀ ਗਈ ਹੈ, ਜਿੱਥੇ ਕੀਮਤਾਂ 7.4% ਤੱਕ ਡਿੱਗ ਗਈਆਂ ਹਨ। ਆਸਟ੍ਰੇਲੀਆ ਦੇ ਸਭ ਤੋਂ ਵੱਡੇ ਪ੍ਰਾਪਰਟੀ ਬਾਜ਼ਾਰ, Sydney ਅਤੇ Melbourne ’ਚ ਵੀ ਪਿਛਲੇ ਚਾਰ ਸਾਲਾਂ ਦੀ ਸਭ ਤੋਂ ਵੱਡੀ ਗਿਰਾਵਟ ਦਰਜ ਹੋਈ ਹੈ, ਜੋ ਕ੍ਰਮਵਾਰ 4.7% ਅਤੇ 3.3% ਰਹੀ। ਹੁਣ Perth ’ਚ ਔਸਤ ਕੀਮਤ $88,664 ਘਟ ਕੇ $1.115 ਮਿਲੀਅਨ ਰਹਿ ਗਈ ਹੈ। ਇਸੇ ਤਰ੍ਹਾਂ Sydney ’ਚ ਕੀਮਤਾਂ $82,420 ਡਿੱਗ ਕੇ $1.66 ਮਿਲੀਅਨ ਅਤੇ Brisbane ’ਚ $66,001 ਘਟ ਕੇ $1.15 ਮਿਲੀਅਨ ‘ਤੇ ਆ ਗਈਆਂ ਹਨ। ਇਸ ਮੰਦੀ ਦੇ ਮੁੱਖ ਕਾਰਨ ਇਸ ਸਾਲ ਚਾਰ ਵਾਰ ਵਧੇ ਵਿਆਜ ਰੇਟ, ਮਹਿੰਗਾਈ ਅਤੇ ਫੈਡਰਲ ਬਜਟ ’ਚ ਪ੍ਰਾਪਰਟੀ ਇਨਵੈਸਟਮੈਂਟ ਦੇ ਟੈਕਸ ਨਿਯਮਾਂ ’ਚ ਕੀਤੇ ਬਦਲਾਅ ਹਨ।

Domain ਦੀ ਮੁੱਖ ਅਰਥਸ਼ਾਸਤਰੀ Nicola Powell ਨੇ ਇਸ ਸਥਿਤੀ ਬਾਰੇ ਕਿਹਾ ਕਿ ਹੁਣ ਮਾਰਕੀਟ ਦਾ ਸੰਤੁਲਨ ਪੂਰੀ ਤਰ੍ਹਾਂ ਖਰੀਦਦਾਰਾਂ ਦੇ ਪੱਖ ’ਚ ਹੋ ਗਿਆ ਹੈ। ਘਰ ਵਿਕਣ ’ਚ ਜ਼ਿਆਦਾ ਸਮਾਂ ਲੱਗ ਰਿਹਾ ਹੈ ਅਤੇ ਵੇਚਣ ਵਾਲਿਆਂ ਨੂੰ ਆਪਣੀਆਂ ਕੀਮਤਾਂ ਬਾਰੇ ਸਮਝੌਤਾ ਕਰਨਾ ਪੈ ਰਿਹਾ ਹੈ। ਡੇਟਾ ਫਰਮ Cotality ਦੇ Gerard Burg ਮੁਤਾਬਕ, ਇਹ ਮੰਗ ’ਚ ਕਮੀ ਕਾਰਨ ਆਈ ਗਿਰਾਵਟ ਹੈ, ਜੋ ਲਗਾਤਾਰ ਵਧਦੇ ਵਿਆਜ ਰੇਟ, ਮਹਿੰਗਾਈ ਅਤੇ ਰਹਿਣ-ਸਹਿਣ ਦੇ ਵਧੇ ਖਰਚਿਆਂ ਦਾ ਸਿੱਧਾ ਨਤੀਜਾ ਹੈ।

ਪ੍ਰਾਪਰਟੀ ਅਰਥਸ਼ਾਸਤਰੀ Cameron Kusher ਨੇ ਦੱਸਿਆ ਕਿ ਦੇਸ਼ ਦੇ ਸਭ ਤੋਂ ਮਹਿੰਗੇ ਘਰਾਂ ਦੀਆਂ ਕੀਮਤਾਂ ’ਚ ਸਭ ਤੋਂ ਵੱਧ ਗਿਰਾਵਟ ਆਈ ਹੈ, ਜਦਕਿ ਘੱਟ ਕੀਮਤ ਵਾਲੇ ਸਸਤੇ ਘਰ ਅਜੇ ਵੀ ਕਾਫ਼ੀ ਹੱਦ ਤੱਕ ਸਥਿਰ ਹਨ। ਮਾਹਰਾਂ ਦਾ ਮੰਨਣਾ ਹੈ ਕਿ ਇਹ ਮੰਦੀ ਦਾ ਦੌਰ ਸ਼ਾਇਦ ਉਦੋਂ ਤੱਕ ਖਤਮ ਨਹੀਂ ਹੋਵੇਗਾ ਜਦੋਂ ਤੱਕ ਵਿਆਜ ਦਰਾਂ ’ਚ ਮੁੜ ਕਟੌਤੀ ਨਹੀਂ ਹੁੰਦੀ, ਕਿਉਂਕਿ ਮਾਰਕੀਟ ਵਿੱਚੋਂ ਖਰੀਦਦਾਰਾਂ ਦਾ ਵਿਸ਼ਵਾਸ ਫਿਲਹਾਲ ਉੱਠ ਚੁੱਕਿਆ ਹੈ।

ਖਰੀਦਦਾਰਾਂ ਲਈ ਅਜੇ ਵੀ ਰਾਹ ਨਹੀਂ ਆਸਾਨ

ਭਾਵੇਂ ਘਰ ਸਸਤੇ ਹੋਏ ਹਨ, ਪਰ ਆਮ ਲੋਕਾਂ ਲਈ ਘਰ ਖਰੀਦਣਾ ਅਜੇ ਵੀ ਮੁਸ਼ਕਲ ਹੈ। ਉੱਚੇ ਰੈਂਟ ਕਾਰਨ ਡਿਪਾਜ਼ਿਟ ਜਮ੍ਹਾਂ ਕਰਨਾ ਔਖਾ ਹੋ ਗਿਆ ਹੈ ਅਤੇ ਬੈਂਕਾਂ ਵੱਲੋਂ ਕਰਜ਼ਾ ਦੇਣ ਦੀ ਸਮਰੱਥਾ ਵੀ ਘਟਾ ਦਿੱਤੀ ਗਈ ਹੈ। ਵਿਆਜ ਰੇਟ ਵਧਣ ਨਾਲ ਲੋਕਾਂ ਦੀ ਖਰੀਦ ਸ਼ਕਤੀ ਘਟਦੀ ਹੈ, ਪਰ ਲੰਬੇ ਸਮੇਂ ਦੇ ਨਿਵੇਸ਼ਕਾਂ ਅਤੇ ਘਰ ਅਪਗ੍ਰੇਡ ਕਰਨ ਵਾਲਿਆਂ ਲਈ ਇਹ ਚੰਗਾ ਮੌਕਾ ਹੈ। ਦੂਜੇ ਪਾਸੇ, Reserve Bank of Australia (RBA) ਨੇ ਵਿਆਜ ਦਰ 4.6 ਫੀਸਦੀ ਕਰ ਦਿੱਤੀ ਹੈ ਅਤੇ ਡਿਪਟੀ ਗਵਰਨਰ Andrew Hauser ਨੇ ਮਹਿੰਗਾਈ ਕਾਰਨ ਨਵੰਬਰ ’ਚ ਇੱਕ ਹੋਰ ਵਾਧੇ ਦਾ ਸੰਕੇਤ ਦਿੱਤਾ ਹੈ। Morgan Stanley ਦੇ ਮਾਹਿਰਾਂ ਨੇ ਅਗਲੇ ਸਾਲ ਦੇ ਅੰਤ ਤੱਕ ਘਰਾਂ ਦੀਆਂ ਕੀਮਤਾਂ ’ਚ 15 ਫੀਸਦੀ ਤੱਕ ਹੋਰ ਗਿਰਾਵਟ ਆਉਣ ਦੀ ਭਵਿੱਖਬਾਣੀ ਕੀਤੀ ਹੈ।

Share This Article
Leave a Comment

Leave a Reply

Your email address will not be published. Required fields are marked *