ਮੈਲਬਰਨ: ਵਿਕਟੋਰੀਆ ਦੇ Avalon Airport ’ਤੇ ਉਸ ਵੇਲੇ ਭਾਜੜਾਂ ਪੈ ਗਈਆਂ ਜਦੋਂ ਸੁਰੱਖਿਆ ਕਰਮਚਾਰੀਆਂ ਨੇ ਇੱਕ ਨੌਜਵਾਨ ਦੇ ਬੈਗ ਵਿੱਚ ਮੌਜੂਦ ਸਾਮਾਨ ਨੂੰ ਸ਼ੱਕੀ ਮੰਨ ਕੇ ਪੂਰੇ ਘਰੇਲੂ ਟਰਮੀਨਲ ਨੂੰ ਖਾਲੀ ਕਰਵਾ ਦਿੱਤਾ। ਇਹ ਘਟਨਾ ਸਵੇਰੇ 6 ਵਜੇ ਦੇ ਕਰੀਬ ਵਾਪਰੀ ਜਦੋਂ ਇੱਕ ਨੌਜਵਾਨ Sydney ਜਾਣ ਵਾਲੀ ਫਲਾਈਟ ਫੜਨ ਦੀ ਤਿਆਰੀ ਕਰ ਰਿਹਾ ਸੀ।
ਬੈਗ ਵਿੱਚੋਂ ਮਿਲੀ ‘ਸ਼ੱਕੀ’ ਚੀਜ਼ ਕਾਰਨ ਤੁਰੰਤ ਵਿਕਟੋਰੀਆ ਦੀ ਬੰਬ ਸਕੁਐਡ (bomb squad unit) ਨੂੰ ਮੌਕੇ ’ਤੇ ਬੁਲਾਇਆ ਗਿਆ ਅਤੇ ਯਾਤਰੀ ਨੂੰ ਹਿਰਾਸਤ ਵਿੱਚ ਲੈ ਲਿਆ ਗਿਆ। ਲਗਭਗ ਪੰਜ ਘੰਟੇ ਦੀ ਬਾਰੀਕੀ ਨਾਲ ਕੀਤੀ ਜਾਂਚ ਤੋਂ ਬਾਅਦ ਪੁਲਿਸ ਨੇ ਖੁਲਾਸਾ ਕੀਤਾ ਕਿ ਜਿਸ ਚੀਜ਼ ਨੂੰ ਬੰਬ ਸਮਝਿਆ ਜਾ ਰਿਹਾ ਸੀ, ਉਹ ਅਸਲ ਵਿੱਚ ਇੱਕ ਲੇਜ਼ਰ ਹੇਅਰ ਰਿਮੂਵਲ ਡਿਵਾਈਸ (laser hair removal device) ਅਤੇ ਹੌਟ ਚਾਕਲੇਟ (hot chocolate) ਦਾ ਪੈਕੇਟ ਸੀ।
ਪੀੜਤ ਨੌਜਵਾਨ ਨੇ ਮੀਡੀਆ ਨਾਲ ਗੱਲਬਾਤ ਕਰਦਿਆਂ ਆਪਣਾ ਦੁੱਖ ਪ੍ਰਗਟਾਇਆ ਅਤੇ ਕਿਹਾ ਕਿ ਉਸ ’ਤੇ ਅੱਤਵਾਦੀ ਹੋਣ ਦੇ ਗੰਭੀਰ ਆਰੋਪ ਲਗਾਏ ਗਏ, ਜਿਸ ਨਾਲ ਉਹ ਬੇਹੱਦ ਪਰੇਸ਼ਾਨ ਹੋਇਆ।
ਪੁਲਿਸ ਅਧਿਕਾਰੀ Nick Uebergang ਮੁਤਾਬਕ ਨੌਜਵਾਨ ਨੇ ਸ਼ੁਰੂਆਤ ਵਿੱਚ ਜਾਂਚ ਵਿੱਚ ਸਹਿਯੋਗ ਨਹੀਂ ਦਿੱਤਾ, ਜਿਸ ਕਾਰਨ ਮਾਮਲਾ ਜ਼ਿਆਦਾ ਵਧ ਗਿਆ। ਹਾਲਾਂਕਿ, ਕੋਈ ਅਪਰਾਧਿਕ ਮਾਮਲਾ ਨਾ ਹੋਣ ਕਰਕੇ ਸੁਰੱਖਿਆ ਕਲੀਅਰੈਂਸ ਤੋਂ ਬਾਅਦ ਉਸ ਨੂੰ ਦੂਜੀ ਫਲਾਈਟ ਰਾਹੀਂ ਰਵਾਨਾ ਕਰ ਦਿੱਤਾ ਗਿਆ। ਇਸ ਹੰਗਾਮੇ ਅਤੇ ਇੱਕ ਐਕਸ-ਰੇ ਮਸ਼ੀਨ ਖਰਾਬ ਹੋਣ ਕਾਰਨ Brisbane ਅਤੇ ਹੋਰ ਫਲਾਈਟਾਂ ਦੇ ਮੁਸਾਫਰਾਂ ਨੂੰ ਭਾਰੀ ਦੇਰੀ ਦਾ ਸਾਹਮਣਾ ਕਰਨਾ ਪਿਆ।
