ਮੈੱਲਬਰਨ : ਮਸ਼ਹੂਰ ਸਟੈਂਡ-ਅੱਪ ਕਾਮੇਡੀਅਨ Kunal Kamra ਨੂੰ ਆਪਣੇ Australia ਦੌਰੇ ਦੌਰਾਨ ਵੱਡਾ ਝਟਕਾ ਲੱਗਾ ਹੈ। ਲੋੜੀਂਦੇ ਵੀਜ਼ਾ ਅਤੇ ਕਲੀਅਰੈਂਸ ਸਮੇਂ ਸਿਰ ਨਾ ਮਿਲਣ ਕਾਰਨ ਉਨ੍ਹਾਂ ਨੇ Perth ਅਤੇ Melbourne ’ਚ ਹੋਣ ਵਾਲੇ ਆਪਣੇ ਲਾਈਵ ਸ਼ੋਅ ਮੁਲਤਵੀ ਕਰ ਦਿੱਤੇ ਹਨ। ਸ਼ੁੱਕਰਵਾਰ, 20 ਨਵੰਬਰ ਨੂੰ ਸੋਸ਼ਲ ਮੀਡੀਆ ‘ਤੇ ਇਸ ਫ਼ੈਸਲੇ ਦਾ ਐਲਾਨ ਕਰਦਿਆਂ Kunal Kamra ਨੇ ਦੱਸਿਆ ਕਿ ਉਹ ਪਿਛਲੇ 45 ਦਿਨਾਂ ਤੋਂ ਲਗਾਤਾਰ ਕਾਗਜ਼ੀ ਕਾਰਵਾਈ ਪੂਰੀ ਕਰਨ ’ਚ ਲੱਗੇ ਹੋਏ ਸਨ, ਪਰ ਸਮੇਂ ਸਿਰ ਮਨਜ਼ੂਰੀ ਨਹੀਂ ਮਿਲ ਸਕੀ।
ਇਸ ਫ਼ੈਸਲੇ ਨਾਲ ਲਗਭਗ 1,100 ਟਿਕਟ ਧਾਰਕ ਪ੍ਰਭਾਵਿਤ ਹੋਏ ਹਨ, ਜਿਨ੍ਹਾਂ ਤੋਂ ਕਾਮੇਡੀਅਨ ਨੇ ਮੁਆਫ਼ੀ ਮੰਗੀ ਹੈ। Perth ਦਾ ਸ਼ੋਅ 21 ਨਵੰਬਰ ਨੂੰ Oasis Comedy Club ਵਿਖੇ ਅਤੇ Melbourne ਦਾ ਸ਼ੋਅ 22 ਨਵੰਬਰ ਨੂੰ The Comic’s Lounge ਵਿਖੇ ਹੋਣਾ ਸੀ। ਇਹ ਦੋਵੇਂ ਪ੍ਰੋਗਰਾਮ ਉਨ੍ਹਾਂ ਦੇ ਨਵੇਂ ਸ਼ੋਅ ‘Standing Up’ ਦਾ ਹਿੱਸਾ ਸਨ, ਜੋ ਕਿ 18 ਸਾਲ ਤੋਂ ਵੱਧ ਉਮਰ ਦੇ ਦਰਸ਼ਕਾਂ ਲਈ ਰਾਜਨੀਤੀ ਅਤੇ ਆਧੁਨਿਕ ਜੀਵਨ ‘ਤੇ ਆਧਾਰਿਤ ਹੈ। ਫ਼ਿਲਹਾਲ ਇਨ੍ਹਾਂ ਸ਼ੋਅਜ਼ ਦੀਆਂ ਨਵੀਆਂ ਤਰੀਕਾਂ ਦਾ ਐਲਾਨ ਨਹੀਂ ਕੀਤਾ ਗਿਆ, ਪਰ Kunal Kamra ਨੇ ਜਲਦੀ ਹੀ ਨਵੀਂ ਜਾਣਕਾਰੀ ਸਾਂਝੀ ਕਰਨ ਦਾ ਭਰੋਸਾ ਦਿੱਤਾ ਹੈ।
ਇਸ ਬਦਲਾਅ ਤੋਂ ਬਾਅਦ ਹੁਣ ਉਨ੍ਹਾਂ ਦੇ ਦੌਰੇ ਦੀ ਸ਼ੁਰੂਆਤ 23 ਨਵੰਬਰ ਨੂੰ New Zealand ਦੇ ਸ਼ਹਿਰ Auckland ਤੋਂ ਹੋਵੇਗੀ। Australia ਦੇ ਬਾਕੀ ਸ਼ੋਅ 26 ਨਵੰਬਰ ਨੂੰ Adelaide, 28 ਨਵੰਬਰ ਨੂੰ Sydney ਅਤੇ 29 ਨਵੰਬਰ ਨੂੰ Brisbane ’ਚ ਤੈਅ ਹਨ। ਹਾਲਾਂਕਿ, ਪ੍ਰਬੰਧਕਾਂ ਨੇ ਅਜੇ ਇਹ ਸਪੱਸ਼ਟ ਨਹੀਂ ਕੀਤਾ ਕਿ ਕੀ ਇਨ੍ਹਾਂ ਸ਼ੋਅਜ਼ ‘ਤੇ ਵੀ ਕੋਈ ਅਸਰ ਪਵੇਗਾ।
ਜ਼ਿਕਰਯੋਗ ਹੈ ਕਿ Kunal Kamra ਪਹਿਲਾਂ ਵੀ ਵਿਵਾਦਾਂ ਕਾਰਨ ਮੁਸ਼ਕਲਾਂ ਦਾ ਸਾਹਮਣਾ ਕਰ ਚੁੱਕੇ ਹਨ। ਮਾਰਚ 2025 ’ਚ Maharashtra ਦੇ ਉਪ ਮੁੱਖ ਮੰਤਰੀ Eknath Shinde ‘ਤੇ ਕੀਤੀ ਟਿੱਪਣੀ ਤੋਂ ਬਾਅਦ Mumbai ਦੇ Habitat ਸਟੂਡੀਓ ’ਚ ਭੰਨਤੋੜ ਹੋਈ ਸੀ, ਜਦਕਿ ਅਗਸਤ 2026 ’ਚ ਵਿਰੋਧ ਪ੍ਰਦਰਸ਼ਨਾਂ ਕਾਰਨ ਉਨ੍ਹਾਂ ਦੇ Bengaluru ਦੇ Whitefield ਸ਼ੋਅ ਰੱਦ ਕਰਕੇ Koramangala ਦੇ The Underground Comedy Club ’ਚ ਤਬਦੀਲ ਕਰਨੇ ਪਏ ਸਨ।
