ਆਸਟ੍ਰੇਲੀਆ ਦੀ ਪਾਰਲੀਮੈਂਟ ’ਚ ਮਨਾਇਆ ਸ਼ਹੀਦੀ ਦਿਹਾੜਾ

ਕੈਨਬਰਾ : ਨੌਵੇਂ ਪਾਤਸ਼ਾਹ ਸ੍ਰੀ ਗੁਰੂ ਤੇਗ ਬਹਾਦੁਰ ਜੀ ਦੇ 350ਵੇਂ ਸ਼ਹੀਦੀ ਦਿਹਾੜੇ ਦਾ ਸਮਾਗਮ, ਸਿੱਖ ਵਲੰਟੀਅਰਜ਼ ਆਸਟ੍ਰੇਲੀਆ ਦੇ ਸਹਿਯੋਗ ਨਾਲ ਫੈਡਰਲ ਪਾਰਲੀਮੈਂਟ (ਕੈਨਬਰਾ) ’ਚ ਸੰਪੂਰਨ ਕੀਤਾ ਗਿਆ। ਇਹ ਇਤਿਹਾਸਕ ਰਾਸ਼ਟਰੀ ਸਮਾਗਮ ਕੈਨਬਰਾ ਵਿਖੇ ਆਸਟ੍ਰੇਲੀਅਨ ਸੰਸਦ ਭਵਨ ਦੇ ਗੇਟ ਹਾਲ ਵਿੱਚ ਮਨਾਇਆ ਗਿਆ।

ਸਿੱਖ ਵਲੰਟੀਅਰਜ਼ ਆਸਟ੍ਰੇਲੀਆ ਨੇ ਇਸ ਮੌਕੇ ਆਸਟ੍ਰੇਲੀਅਨ ਲੋਕਤੰਤਿਰਕ ਕਦਰਾਂ-ਕੀਮਤਾਂ ਤਹਿਤ ਇਸ ਸਮਾਗਮ ਵਿੱਚ ਭਾਈਚਾਰਕ ਆਗੂਆਂ, ਸੰਸਦ ਮੈਂਬਰ, ਧਾਰਿਮਕ ਪ੍ਰਤੀਨਿਧੀਆਂ ਅਤੇ ਆਸਟ੍ਰੇਲੀਆ ਦੇ ਵੱਖ-ਵੱਖ ਸਟੇਟਜ਼ ਤੋਂ ਆਏ ਮਹਿਮਾਨਾਂ ਵੱਲੋਂ ਸ੍ਰੀ ਗੁਰੂ ਤੇਗ ਬਹਾਦੁਰ ਸਾਹਿਬ ਜੀ ਦੀ ਧਾਰਿਮਕ ਆਜ਼ਾਦੀ ਅਤੇ ਮਨੁੱਖੀ ਹੱਕਾਂ ਲਈ ਦਿੱਤੀ ਮਹਾਨ ਕੁਰਬਾਨੀ ਨੂੰ ਸ਼ਰਧਾ ਦੇ ਫੁੱਲ ਭੇਟ ਕੀਤੇ।

ਸਮਾਗਮ ਦੇ ਪ੍ਰਬੰਧਕ ਸਿੱਖ ਵਲੰਟੀਅਰਜ਼ ਆਸਟ੍ਰੇਲੀਆ ਦੇ CEO ਜਸਵਿੰਦਰ ਸਿੰਘ ਨੇ ਇਕ ਬਿਆਨ ਵਿੱਚ ਕਿਹਾ, “ਇਹ ਸਮਾਗਮ ਆਸਟ੍ਰੇਲੀਅਨ ਸਿੱਖ ਭਾਈਚਾਰੇ ਲਈ ਇੱਕ ਮੀਲ-ਪੱਥਰ ਹੈ ਅਤੇ ਸਭ ਆਸਟ੍ਰੇਲੀਅਨ ਲੋਕਾਂ ਲਈ ਏਕਤਾ ਦਾ ਮਾਣ ਦੇਣ ਵਾਲਾ ਪਲ ਹੈ। ਸ੍ਰੀ ਗੁਰੂ ਤੇਗ ਬਹਾਦੁਰ ਜੀ ਨੇ ਹੋਰ ਧਰਮ ਦੇ ਹੱਕ ਦੀ ਰੱਖਿਆ ਲਈ ਆਪਣਾ ਜੀਵਨ ਕੁਰਬਾਨ ਕੀਤਾ। ਉਨ੍ਹਾਂ ਦੀ ਕੁਰਬਾਨੀ ਸਰਬੱਤ ਦੇ ਭਲੇ ਦੀ ਤਰਜ਼ਮਾਨੀ ਕਰਦੀ ਹੈ ਅਤੇ ਅਸੀਂ ਅੱਜ ਉਸ ਦਾ ਆਸਟ੍ਰੇਲੀਅਨ ਸੰਸਦ ਵਿੱਚ ਸਨਮਾਨ ਕਰਦੇ ਹਾਂ।” ਉਨ੍ਹਾਂ ਅੱਗੇ ਕਿਹਾ, ‘‘ਅਸੀਂ ਆਸਟ੍ਰੇਲੀਅਨ ਸੰਸਦ, ਸਾਰੇ ਮਾਣਯੋਗ ਮਹਿਮਾਨ, ਸੇਵਾਦਾਰ ਅਤੇ ਭਾਈਚਾਰੇ ਦੇ ਮੈਂਬਰਾਂ ਦਾ ਇਸ ਮਹੱਤਵਪੂਰਨ ਧਾਰਿਮਕ ਅਤੇ ਰਾਸ਼ਟਰੀ ਇਤਿਹਾਸਕ ਦਿਹਾੜੇ ਵਿੱਚ ਸ਼ਾਮਲ ਹੋਣ ਲਈ ਤਹਿ-ਦਿਲੋਂ ਧੰਨਵਾਦ ਕਰਦੇ ਹਾਂ।’’

1675 ਈਸਵੀ ਵਿੱਚ ਗੁਰੂ ਸਾਹਿਬ ਜੀ ਨੇ ਜ਼ੁਲਮ ਦਾ ਵਿਰੋਧ ਕਰਦੇ ਹੋਏ ਰਾਜ-ਹੀਣ ਅਤੇ ਮਜ਼ਲੂਮ ਲੋਕਾਂ ਦੇ ਜ਼ਬਰਦਸਤੀ ਧਰਮ-ਪਰਿਵਰਤਨ ਨੂੰ ਰੋਕਣ ਲਈ ਆਪਣੀ ਸ਼ਹੀਦੀ ਨੂੰ ਚੁਣਿਆ। ਉਨ੍ਹਾਂ ਦੀ ਇਹ ਕੁਰਬਾਨੀ ਸੰਸਾਰ ਭਰ ਵਿੱਚ ਧਾਰਿਮਕ ਵਿਸ਼ਵਾਸ ਦੀ ਆਜ਼ਾਦੀ, ਮਨੁੱਖੀ ਹੱਕਾਂ ਅਤੇ ਵੱਖੋ-ਵੱਖ ਧਾਰਿਮਕ ਅਤੇ ਸਮਾਜਿਕ ਰਹਿ-ਰੀਤ ਦੇ ਸਨਮਾਨ ਬਾਰੇ ਚੱਲ ਰਹੀਆਂ ਵਿਚਾਰ-ਧਾਰਾਵਾਂ ਨੂੰ ਅੱਜ ਵੀ ਸੇਧ ਪ੍ਰਦਾਨ ਕਰਦੀ ਹੈ। ਇਹ ਉਹੀ ਮੁੱਖ ਕਦਰਾਂ-ਕੀਮਤਾਂ ਹਨ, ਜਿਨ੍ਹਾਂ ’ਤੇ ਆਧੁਨਿਕ ਆਸਟ੍ਰੇਲੀਅਨ ਦੀ ਨੀਂਹ ਰੱਖੀ ਗਈ ਹੈ।

ਸਮਾਗਮ ਦੀ ਸ਼ੁਰੂਆਤ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੇ ਸਮਾਗਮ-ਸਥਾਨ ’ਤੇ ਵਿਸ਼ੇਸ਼ ਰੂਪ ਵਿੱਚ ਆਗਮਨ ਨਾਲ ਹੋਈ। ਅੰਤਰਰਾਸ਼ਟਰੀ ਅਤੇ ਸਥਾਨਕ ਰਾਗੀਆਂ ਵੱਲੋਂ ਕੀਰਤਨ ਕੀਤਾ ਗਿਆ ਅਤੇ ਮਗਰੋਂ ਅਰਦਾਸ ਅਤੇ ਹੁਕਮਨਾਮਾ ਪੜ੍ਹਿਆ ਗਿਆ। ਧਾਰਿਮਕ ਆਗੂਆਂ ਅਤੇ ਫ਼ੈਡਰਲ ਪਾਰਲੀਮੈਂਟ ਮੈਂਬਰਾਂ ਵੱਲੋਂ ਵਿਚਾਰ ਪੇਸ਼ ਕੀਤੇ ਗਏ ਅਤੇ ਮਨੁੱਖਤਾ ਦੀ ਸੇਵਾ ਕਰਨ ਵਾਲਿਆਂ ਦਾ ਵਿਸ਼ੇਸ਼ ਸਨਮਾਨ ਵੀ ਕੀਤਾ ਗਿਆ। ਹਾਜ਼ਰੀਨਾਂ ਨੇ ਲੰਗਰ ਵੀ ਛਕਿਆ, ਜੋ ਭਾਈਚਾਰਕ ਸਮਾਨਤਾ ਅਤੇ ਨਿਮਰਤਾ ਦੇ ਸਿਧਾਂਤ ਦਾ ਪ੍ਰਤੀਕ ਹੈ।

ਇਸ ਦੌਰਾਨ ਦੁਰਲਭ ਇਤਿਹਾਸਕ ਨਿਸ਼ਾਨੀਆਂ ਅਤੇ ਵੱਖ-ਵੱਖ ਧਰਮਾਂ ਦੇ ਧਾਰਿਮਕ ਗ੍ਰੰਥਾਂ ਦੀ ਪ੍ਰਦਰਸ਼ਨੀ ਵੀ ਲਗਾਈ ਗਈ। ਕਈ ਧਰਮਾਂ ਦੀਆਂ ਹੱਥਲਿਖਤ ਪਾਂਡੂਲਿਪੀਆਂ ਵੀ ਪ੍ਰਦਰਸ਼ਿਤ ਕੀਤੀਆਂ ਜਾ ਰਹੀਆਂ ਹਨ, ਜਿਵੇਂ ਕਿ ਇੱਕ ਸਿੱਖ ਵੱਲੋਂ ਲਿਖਿਆ ਭਗਵਤ ਗੀਤਾ ਅਤੇ ਇੱਕ ਹਿੰਦੂ ਵੱਲੋਂ ਲਿਖਿਆ ਸਿੱਖ ਨਿਤਨੇਮ, ਜੋ ਗੁਰੂ ਸਾਹਿਬ ਜੀ ਦੇ ਧਾਰਿਮਕ ਏਕਤਾ ਅਤੇ ਸਦਭਾਵਨਾ ਦੇ ਦਰਸਾਏ ਰਾਹ ਦਾ ਪ੍ਰਤੀਕ ਹੈ।

ਇਹ ਸਮਾਗਮ ਆਸਟ੍ਰੇਲੀਅਨ ਸਿੱਖ ਭਾਈਚਾਰੇ ਵੱਲ ਸਾਰੇ ਧਰਮ ਅਤੇ ਸੱਭਿਆਚਾਰ ਦੀ ਏਕਤਾ ਅਤੇ ਧਾਰਿਮਕ ਆਜ਼ਾਦੀ ਦਾ ਹੋਕਾ ਦੇਣ ਨੂੰ ਸਮਰਿਪਤ ਹੈ। ਇਸ ਵਿਸ਼ੇਸ਼ ਯਾਦਗਾਰੀ ਦਿਹਾੜੇ ਨੂੰ ਕੈਨਬਰਾ ਦੇ ਸਥਾਨਕ ਸਿੱਖ ਭਾਈਚਾਰੇ, ਪੰਜ ਰਾਜਾਂ ਦੀਆਂ ਸਿੱਖ ਸੰਸਥਾਵਾਂ ਅਤੇ ਪੰਜ ਪਿਆਰਿਆਂ ਦੀ ਹਾਜ਼ਰੀ ਨੇ ਹੋਰ ਵੀ ਵਿਸ਼ੇਸ਼ ਬਣਾਇਆ।