ਮੈਲਬਰਨ : ਆਸਟ੍ਰੇਲੀਆ ਦੇ ਉੱਤਰੀ ਸਟੇਟ ਕੁਈਨਜ਼ਲੈਂਡ ਦੀਆਂ ਚੋਣਾਂ ਦੇ ਨਤੀਜੇ ਆ ਗਏ ਹਨ ਅਤੇ Liberal National Party (LNP) ਨੇ ਲੇਬਰ ਪਾਰਟੀ ਤੋਂ ਸੱਤਾ ਹਥਿਆ ਲਈ ਹੈ। ਸੋਮਵਾਰ ਸਵੇਰ ਤਕ ਦੇ ਨਤੀਜਿਆਂ ’ਚ LNP ਨੇ 48 ਸੀਟਾਂ ਜਿੱਤ ਲਈਆਂ ਹਨ, ਜਿਸ ਨਾਲ LNP ਦੇ ਲੀਡਰ David Crisafulli ਲਈ ਕੁਈਨਜ਼ਲੈਂਡ ਦਾ 41ਵਾਂ ਪ੍ਰੀਮੀਅਰ ਬਣਨ ਦਾ ਰਾਹ ਪੱਧਰਾ ਹੋ ਗਿਆ। ਬਹੁਮਤ ਲਈ 47 ਸੀਟਾਂ ਦੀ ਜ਼ਰੂਰਤ ਸੀ। ਆਪਣੇ ਜਿੱਤ ਦੇ ਭਾਸ਼ਣ ਵਿੱਚ, Crisafulli ਨੇ ਕਿਹਾ ਕਿ ਕੁਈਨਜ਼ਲੈਂਡ ਵਾਸੀਆਂ ਨੇ ਇੱਕ ਨਵੀਂ ਸ਼ੁਰੂਆਤ ਅਤੇ ਬਹੁਮਤ ਵਾਲੀ LNP ਸਰਕਾਰ ਲਈ ਵੋਟ ਦਿੱਤੀ ਹੈ।

ਕ੍ਰਿਸਟਾਫੁਲੀ ਨੇ ਅੱਜ LNP ਨੂੰ ਇਤਿਹਾਸਕ ਚੋਣ ਜਿੱਤ ਦਿਵਾਉਣ ਤੋਂ ਬਾਅਦ ਗਵਰਨਮੈਂਟ ਹਾਊਸ ’ਚ ਬਾਈਬਲ ’ਤੇ ਹੱਥ ਰੱਖ ਕੇ ਪ੍ਰੀਮੀਅਰ ਦੇ ਅਹੁਦੇ ਦੀ ਸਹੁੰ ਚੁੱਕ ਲਈ ਹੈ। ਉਨ੍ਹਾਂ ਨਾਲ Jarrod Bleijie ਨੇ ਵੀ ਸਟੇਟ ਦੇ ਮੰਤਰੀ ਵਜੋਂ ਸਹੁੰ ਚੁੱਕੀ ਅਤੇ ਅੰਤਰਿਮ ਸਰਕਾਰ ਬਣਾਈ। ਇਸ ਹਫ਼ਤੇ ਦੇ ਅਖ਼ੀਰ ਤਕ ਪੂਰੀ ਕੈਬਿਨੇਟ ਬਣਾਈ ਜਾਵੇਗੀ।

ਸਾਬਕਾ ਪ੍ਰੀਮੀਅਰ ਸਟੀਵਨ ਮਾਈਲਜ਼ ਨੇ ਆਪਣੀ ਹਾਰ ਸਵੀਕਾਰ ਕਰ ਲਈ ਹੈ, ਜਿਸ ਨਾਲ ਸਟੇਟ ਵਿੱਚ ਲੇਬਰ ਪਾਰਟੀ ਦੇ ਲਗਭਗ 10 ਸਾਲਾਂ ਦੇ ਸ਼ਾਸਨ ਦਾ ਅੰਤ ਹੋਇਆ। ਮਾਈਲਜ਼ ਨੇ ਲੇਬਰ ਲਈ ਚੁਣੌਤੀਪੂਰਨ ਚੋਣਾਂ ਨੂੰ ਸਵੀਕਾਰ ਕੀਤਾ ਪਰ ਮੁਹਿੰਮ ਜਾਂ ਪ੍ਰੀਮੀਅਰ ਵਜੋਂ ਆਪਣੇ ਕਾਰਜਕਾਲ ਬਾਰੇ ਕੋਈ ਪਛਤਾਵਾ ਜ਼ਾਹਰ ਨਹੀਂ ਕੀਤਾ।

ਚੋਣਾਂ ਵਿੱਚ ਲੇਬਰ ਪਾਰਟੀ ਦੇ ਵਿਰੁੱਧ ਇੱਕ ਮਹੱਤਵਪੂਰਣ ਝੁਕਾਅ ਵੇਖਿਆ ਗਿਆ, ਜਿਸ ਵਿੱਚ ਪਾਰਟੀ ਨੇ 13 ਸੀਟਾਂ ਗੁਆ ਦਿੱਤੀਆਂ ਅਤੇ 30 ਸੀਟਾਂ ਜਿੱਤੀਆਂ, ਜਦੋਂ ਕਿ LNP ਨੂੰ 13 ਸੀਟਾਂ ਦਾ ਫਾਇਦਾ ਹੋਇਆ। ਨਤੀਜੇ ਕੁਈਨਜ਼ਲੈਂਡ ਵਾਸੀਆਂ ਵਿੱਚ ਤਬਦੀਲੀ ਦੀ ਮਜ਼ਬੂਤ ਇੱਛਾ ਦਾ ਸੰਕੇਤ ਦਿੰਦੇ ਹਨ, Crisafulli ਦੀ ਚੋਣ ਮੁਹਿੰਮ ਅਪਰਾਧ, ਰਹਿਣ-ਸਹਿਣ ਦੀ ਲਾਗਤ, ਰਿਹਾਇਸ਼ ਦੀ ਸਮਰੱਥਾ ਅਤੇ ਸਿਹਤ ਵਰਗੇ ਪ੍ਰਮੁੱਖ ਮੁੱਦਿਆਂ ’ਤੇ ਕੇਂਦਰਤ ਹੈ।