ਮੈਲਬਰਨ: ਪਹਿਲਾਂ ਹੀ ਸੰਕਟ ’ਚ ਘਿਰੇ ਆਸਟ੍ਰੇਲੀਆ ਦੇ ਹਾਊਸਿੰਗ ਸੈਕਟਰ ਲਈ ਇੱਕ ਹੋਰ ਬੁਰੀ ਖ਼ਬਰ ਹੈ। 2023 ਦੀ Infrastructure Market Capacity report ਅਨੁਸਾਰ ਆਸਟ੍ਰੇਲੀਆ ਅੰਦਰ ਉਸਾਰੀ ਦੇ ਕੰਮਾਂ ’ਚ ਲੱਗੇ ਕਾਮਿਆਂ ਦੀ ਵੱਡੀ ਕਮੀ ਹੈ ਅਤੇ ਨਾਲ ਹੀ ਨਿਰਮਾਣ ਸਮੱਗਰੀ ਤੱਕ ਪਹੁੰਚ ਕਰਨ ਵਿੱਚ ਵੀ ਕਈ ਚੁਣੌਤੀਆਂ ਨੂੰ ਉਜਾਗਰ ਕੀਤਾ ਗਿਆ ਹੈ। ਇਸ ਨੂੰ ਦੇਸ਼ ਦੇ ਰਿਹਾਇਸ਼, ਬੁਨਿਆਦੀ ਢਾਂਚੇ ਅਤੇ ਊਰਜਾ ਏਜੰਡੇ ਲਈ ਸੰਭਾਵਿਤ ਖਤਰੇ ਵਜੋਂ ਦੇਖਿਆ ਜਾ ਰਿਹਾ ਹੈ।
ਰਿਪੋਰਟ ਅਨੁਸਾਰ ਜਨਤਕ ਬੁਨਿਆਦੀ ਢਾਂਚੇ ’ਚ ਰਿਕਾਰਡ 229,000 ਕਾਮਿਆਂ ਦੀ ਘਾਟ ਹੈ। ਰਿਪੋਰਟ ਅਜਿਹੇ ਸਮੇਂ ਆਈ ਹੈ ਜਦੋਂ ਐਲਬਨੀਜ਼ੀ ਸਰਕਾਰ ਨੇ ਆਸਟ੍ਰੇਲੀਆ ਦੇ ‘ਟੁੱਟ ਚੁੱਕੇ’ ਪ੍ਰਵਾਸ ਸਿਸਟਮ ’ਚ ਸੁਧਾਰ ਕਰਨ ਦਾ ਐਲਾਨ ਕੀਤਾ ਹੈ ਅਤੇ ਕਿਹਾ ਹੈ ਕਿ ਦੇਸ਼ ਅੰਦਰ ਆਉਣ ਵਾਲੇ ਪ੍ਰਵਾਸੀਆਂ ਦੀ ਗਿਣਤੀ ਅਗਲੇ ਦੋ ਸਾਲਾਂ ’ਚ ਅੱਧੀ ਕਰ ਦਿੱਤੀ ਜਾਵੇਗੀ ਅਤੇ ਸਿਰਫ਼ ਉੱਚ ਹੁਨਰਮੰਦਾਂ ਨੂੰ ਹੀ ਦੇਸ਼ ’ਚ ਰਹਿਣ ਦਿੱਤਾ ਜਾਵੇਗਾ।
ਪੰਜ ਸਾਲਾਂ ਵਿੱਚ 230 ਅਰਬ ਡਾਲਰ ਦੀ ਇੱਕ ਵੱਡੀ ਜਨਤਕ ਬੁਨਿਆਦੀ ਢਾਂਚਾ ਪਾਈਪਲਾਈਨ, 1.2 ਮਿਲੀਅਨ ਨਵੇਂ ਘਰ ਬਣਾਉਣ ਦੀ ਯੋਜਨਾ ਅਤੇ ਊਰਜਾ ਖੇਤਰ ਵਿੱਚ ਵੱਡੇ ਨਿਵੇਸ਼ ਕਾਰਨ ਨਿਰਮਾਣ ਸਮੱਗਰੀ, ਹੁਨਰ ਅਤੇ ਕਿਰਤ ਦੀ ਮੰਗ ਇਤਿਹਾਸਕ ਉੱਚੇ ਪੱਧਰ ’ਤੇ ਹੈ। ਇਸ ਲਈ ਉਦਯੋਗ ਨੂੰ ਵਧੇਰੇ ਇੰਜੀਨੀਅਰਾਂ, ਹੁਨਰਮੰਦ ਕਿੱਤਿਆਂ ਅਤੇ ਮਜ਼ਦੂਰਾਂ ਅਤੇ ਨੇੜੇ ਤੋਂ ਨੇੜੇ ਮੌਜੂਦ ਸਟੀਲ ਅਤੇ ਸੀਮੈਂਟ ਤੱਕ ਪਹੁੰਚ ਦੀ ਲੋੜ ਹੈ।
ਰਿਪੋਰਟ ਵਿੱਚ ਉਸਾਰੀ ਉਦਯੋਗ ਦਾ ਸਾਹਮਣਾ ਕਰ ਰਹੀ ਸਪਲਾਈ ਅਤੇ ਮੰਗ ਸੰਤੁਲਨ ਵਿੱਚ ਸੁਧਾਰ ਕਰਨ ਲਈ ਆਸਟ੍ਰੇਲੀਆਈ ਸਰਕਾਰ ਲਈ 14 ਸਿਫਾਰਸ਼ਾਂ ਕੀਤੀਆਂ ਗਈਆਂ ਹਨ। ਇਸ ਵਿੱਚ ਘਰੇਲੂ ਸਮਰੱਥਾ ਦਾ ਨਿਰਮਾਣ ਅਤੇ ਨਵੇਂ ਘੱਟ ਨਿਕਾਸ ਨਿਰਮਾਣ ਸਮੱਗਰੀ, ਜਿਵੇਂ ਕਿ ਰੀਸਾਈਕਲ ਕੀਤੀ ਸਮੱਗਰੀ ਲਈ ਬਾਜ਼ਾਰਾਂ ਦਾ ਨਿਰਮਾਣ ਸ਼ਾਮਲ ਹੈ।
