ਕੈਨਬਰਾ: ਆਸਟ੍ਰੇਲੀਅਨ ਅੰਕੜਾ ਵਿਭਾਗ (ABS) ਦੇ ਤਾਜ਼ਾ ਅੰਕੜਿਆਂ ਅਨੁਸਾਰ, ਆਸਟ੍ਰੇਲੀਆ ਦੀ ਨੈੱਟ ਓਵਰਸੀਜ਼ ਮਾਈਗ੍ਰੇਸ਼ਨ (NOM) 2022 ਤੋਂ ਬਾਅਦ ਆਪਣੇ ਸਭ ਤੋਂ ਹੇਠਲੇ ਪੱਧਰ ’ਤੇ ਆ ਗਈ ਹੈ। ਦਸੰਬਰ ਤੱਕ ਦੇ 12 ਮਹੀਨਿਆਂ ’ਚ ਦੇਸ਼ ਦੀ ਆਬਾਦੀ 1.5 ਫੀਸਦੀ ਵਧ ਕੇ 27.8 ਮਿਲੀਅਨ ਹੋ ਗਈ ਹੈ। ਇਸ ਵਾਧੇ ਵਿੱਚ 111,500 ਲੋਕਾਂ ਦਾ ਕੁਦਰਤੀ ਵਾਧਾ (ਜਨਮ ਅਤੇ ਮੌਤਾਂ ਦਾ ਅੰਤਰ) ਅਤੇ 301,000 ਲੋਕਾਂ ਦੀ ਨੈੱਟ ਓਵਰਸੀਜ਼ ਮਾਈਗ੍ਰੇਸ਼ਨ ਸ਼ਾਮਲ ਹੈ।
ਇੰਟਰਨੈਸ਼ਨਲ ਸਟੂਡੈਂਟਸ ਅਤੇ ਟੈਂਪਰੇਰੀ ਵੀਜ਼ਾ ਧਾਰਕਾਂ ਦੀ ਗਿਣਤੀ ਵਿੱਚ ਲਗਾਤਾਰ ਗਿਰਾਵਟ
ਇਸ ਦੌਰਾਨ, ਦੇਸ਼ ਵਿੱਚ ਹਾਊਸਿੰਗ ਅਤੇ ਰਿਹਾਇਸ਼ੀ ਸੰਕਟ ਨੂੰ ਲੈ ਕੇ ਸਰਕਾਰ ਨੂੰ ਵਿਰੋਧੀਆਂ ਦੀ ਤਿੱਖੀ ਆਲੋਚਨਾ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਪ੍ਰਧਾਨ ਮੰਤਰੀ Anthony Albanese ਨੇ ਕਿਹਾ ਹੈ ਕਿ ਉਹ ਮਾਈਗ੍ਰੇਸ਼ਨ ਦੀ ਗਿਣਤੀ ਨੂੰ ਹੋਰ ਘਟਾ ਕੇ 225,000 ਪ੍ਰਤੀ ਸਾਲ ਤੱਕ ਲਿਆਉਣਗੇ, ਜੋ ਕਿ ਉਨ੍ਹਾਂ ਦੇ ਮੁਤਾਬਕ ਦੇਸ਼ ਲਈ ਬਿਲਕੁਲ ਸਹੀ ਗਿਣਤੀ ਹੈ। ਇਮੀਗ੍ਰੇਸ਼ਨ ਮੰਤਰੀ Tony Burke ਨੇ ਸਪੱਸ਼ਟ ਕੀਤਾ ਕਿ ਸਰਕਾਰ ਹੁਣ ਸਿਰਫ਼ ਲੋੜੀਂਦੇ ਸਕਿਲਡ ਵਰਕਰਾਂ ਨੂੰ ਪਹਿਲ ਦੇ ਰਹੀ ਹੈ, ਜਿਸ ਕਾਰਨ ਇੰਟਰਨੈਸ਼ਨਲ ਸਟੂਡੈਂਟਸ ਅਤੇ ਟੈਂਪਰੇਰੀ ਵੀਜ਼ਾ ਧਾਰਕਾਂ ਦੀ ਗਿਣਤੀ ਵਿੱਚ ਲਗਾਤਾਰ ਗਿਰਾਵਟ ਆ ਰਹੀ ਹੈ।
ਦੂਜੇ ਪਾਸੇ, ਵਿਰੋਧੀ ਧਿਰ ਦੇ ਬੁਲਾਰੇ Jonno Duniam ਨੇ ਕਿਹਾ ਕਿ 301,000 ਦੀ ਗਿਣਤੀ ਅਜੇ ਵੀ ਬਹੁਤ ਜ਼ਿਆਦਾ ਹੈ, ਜਿਸ ਨਾਲ public infrastructure ਅਤੇ ਕਿਰਾਏ ਦੇ ਮਕਾਨਾਂ ’ਤੇ ਭਾਰੀ ਦਬਾਅ ਬਣਿਆ ਹੋਇਆ ਹੈ। One Nation ਪਾਰਟੀ ਦੀ ਆਗੂ Pauline Hanson ਨੇ ਵੀ ਇਸ ਮੁੱਦੇ ’ਤੇ ਸਰਕਾਰ ਨੂੰ ਘੇਰਿਆ ਹੈ ਅਤੇ ਇਮੀਗ੍ਰੇਸ਼ਨ ਨੂੰ ਦੇਸ਼ ਦੇ ਮੌਜੂਦਾ ਸੰਕਟ ਦਾ ਮੁੱਖ ਕਾਰਨ ਦੱਸਿਆ ਹੈ।
