ਮੈਲਬਰਨ: ਆਸਟ੍ਰੇਲੀਆ ਦੇ ਵਿਦੇਸ਼ ਮੰਤਰੀ ਪੈਨੀ ਵੋਂਗ ਨੇ ਆਸਟ੍ਰੇਲੀਆਈ ਅਤੇ ਭਾਰਤ ਵਿਚਕਾਰ ਮੈਤਰੀ ਫੈਲੋਸ਼ਿਪ ਪ੍ਰੋਗਰਾਮ (Maitri Fellowships program) ਦਾ ਐਲਾਨ ਕੀਤਾ ਹੈ ਜਿਸ ਅਧੀਨ ਦੋਹਾਂ ਦੇਸ਼ਾਂ ਦੇ ਖੋਜਕਰਤਾ ਇੱਕ-ਦੂਜੇ ਦੇਸ਼ ’ਚ ਅਕਾਦਮਿਕ ਸਮਰੱਥਾ ਦਾ ਨਿਰਮਾਣ ਕਰਨ ਲਈ ਆ ਅਤੇ ਜਾ ਸਕਣਗੇ। ਇਹ ਐਲਾਨ ਉਨ੍ਹਾਂ ਨੇ ਭਾਰਤ ਨਾਲ ‘ਟੂ ਪਲੱਸ ਟੂ’ ਗੱਲਬਾਤ ਲਈ ਆਪਣੇ ਨਵੀਂ ਦਿੱਲੀ ਦੌਰੇ ਦੌਰਾਨ ਕੀਤਾ। ਇਹ ਪ੍ਰੋਗਰਾਮ ਵਿਦੇਸ਼ੀ ਅਤੇ ਵਪਾਰ ਨੀਤੀ ਪਲੇਸਮੈਂਟ ਆਸਟ੍ਰੇਲੀਆ ਅਤੇ ਭਾਰਤ ਵਿੱਚ ਅਕਾਦਮਿਕ ਸਮਰੱਥਾ ਦਾ ਨਿਰਮਾਣ ਕਰੇਗਾ ਅਤੇ ਦੋਹਾਂ ਦੇਸ਼ ਵਿੱਚ ਸਮਕਾਲੀ ਦ੍ਰਿਸ਼ਟੀਕੋਣਾਂ ਦੀ ਸਮਝ ਨੂੰ ਡੂੰਘਾ ਕਰੇਗਾ।
ਇਸ ਮੌਕੇ ਵਿਦੇਸ਼ ਮੰਤਰੀ ਪੈਨੀ ਵੋਂਗ ਨੇ ਕਿਹਾ, ‘‘ਮੈਤਰੀ ਫੈਲੋਸ਼ਿਪ ਪ੍ਰੋਗਰਾਮ ਆਸਟ੍ਰੇਲੀਆਈ ਸਰਕਾਰ ਵੱਲੋਂ ਆਸਟ੍ਰੇਲੀਆ-ਭਾਰਤ ਸਬੰਧਾਂ, ਸਾਡੇ ਸਾਂਝੇ ਹਿੱਤਾਂ ਅਤੇ ਸਾਂਝੀਆਂ ਚੁਣੌਤੀਆਂ ਦੀ ਵਿਆਪਕ ਅਤੇ ਡੂੰਘੀ ਸਮਝ ਲਈ ਕੀਤਾ ਇੱਕ ਨਿਵੇਸ਼ ਹੈ। ਦੋਹਾਂ ਦੇਸ਼ਾਂ ਵਿਚਕਾਰ ਵਧ ਰਹੀ ਸਾਂਝੇਦਾਰੀ ਨਾਲ ਇਸ ਸਮਝ ਦੀ ਮਹੱਤਤਾ ਹੋਰ ਵੀ ਮਹੱਤਵਪੂਰਨ ਹੋ ਜਾਂਦੀ ਹੈ।’’
ਖੋਜ ਆਸਟ੍ਰੇਲੀਆ ਅਤੇ ਭਾਰਤ ਦੇ ਆਰਥਿਕ ਰੁਝਾਨਾਂ ਅਤੇ ਭੂ-ਰਣਨੀਤਕ ਹਿੱਤਾਂ ਦੇ ਮੁੱਦਿਆਂ ’ਤੇ ਕੇਂਦਰਿਤ ਹੋਵੇਗੀ। ਯੋਗ ਆਸਟ੍ਰੇਲੀਅਨ ਸੰਸਥਾਵਾਂ ਨੂੰ ਪਲੇਸਮੈਂਟ ਲਈ ਮਾਹਿਰਾਂ ਨੂੰ ਨਾਮਜ਼ਦ ਕਰਨ ਦਾ ਸੱਦਾ ਦਿੱਤਾ ਗਿਆ ਹੈ। ਪ੍ਰੋਗਰਾਮ ਦੀਆਂ ਤਿੰਨ ਧਾਰਾਵਾਂ ਹਨ:
- ਭਾਰਤੀ ਸੀਨੀਅਰ ਖੋਜਕਰਤਾਵਾਂ ਲਈ ਆਸਟ੍ਰੇਲੀਆ ’ਚ ਲੰਬੇ ਸਮੇਂ ਦੀ ਫੈਲੋਸ਼ਿਪ (1-2 ਸਾਲ)
- ਭਾਰਤ ਦੇ ਸ਼ੁਰੂਆਤੀ ਤੋਂ ਕੈਰੀਅਰ ਦੇ ਅੱਧ ’ਚ ਖੋਜਕਰਤਾਵਾਂ ਲਈ ਆਸਟ੍ਰੇਲੀਆ ਦੀ ਥੋੜ੍ਹੇ ਸਮੇਂ ਦੀ ਫੈਲੋਸ਼ਿਪ (6 ਮਹੀਨਿਆਂ ਤੱਕ)
- ਆਸਟ੍ਰੇਲੀਆ ਦੇ ਸ਼ੁਰੂਆਤੀ ਤੋਂ ਕੈਰੀਅਰ ਦੇ ਅੱਧ ’ਚ ਖੋਜਕਰਤਾਵਾਂ ਨੂੰ ਭਾਰਤ ਜਾਣ ਲਈ ਥੋੜ੍ਹੇ ਸਮੇਂ ਦੀ ਫੈਲੋਸ਼ਿਪ (6 ਮਹੀਨਿਆਂ ਤੱਕ)
ਮੈਤਰੀ ਫੈਲੋਸ਼ਿਪਸ ਪ੍ਰੋਗਰਾਮ ਦਾ ਸੰਚਾਲਨ ਸੈਂਟਰ ਫਾਰ ਆਸਟ੍ਰੇਲੀਆ-ਇੰਡੀਆ ਰਿਲੇਸ਼ਨਜ਼ ਵੱਲੋਂ ਕੀਤਾ ਜਾਵੇਗਾ। ਸੈਂਟਰ ਫਾਰ ਆਸਟ੍ਰੇਲੀਆ-ਇੰਡੀਆ ਰਿਲੇਸ਼ਨਜ਼ ਦੇ ਸੀ.ਈ.ਓ. ਟਿਮ ਥਾਮਸ ਨੇ ਇਸ ਬਾਰੇ ਕਿਹਾ, ‘‘ਸੈਂਟਰ ਫਾਰ ਆਸਟ੍ਰੇਲੀਆ-ਇੰਡੀਆ ਰਿਲੇਸ਼ਨਜ਼ ਜਾਗਰੂਕ ਜਨਤਕ ਟਿੱਪਣੀਆਂ ਅਤੇ ਬਹਿਸ ਰਾਹੀਂ ਆਸਟ੍ਰੇਲੀਆ ਅਤੇ ਭਾਰਤ ਵਿਚਕਾਰ ਆਪਸੀ ਸਮਝ ਨੂੰ ਵਧਾਉਣ ਲਈ ਵਚਨਬੱਧ ਹੈ।”
ਹੋਰ ਵੇਰਵੇ australiaindiacentre.org.au ‘ਤੇ ਮਿਲ ਸਕਦੇ ਹਨ।
‘ਟੂ ਪਲੱਸ ਟੂ’ ਗੱਲਬਾਤ ’ਚ ਉਠਿਆ ਵਿਦਿਆਰਥੀਆਂ ਅਤੇ ਪੇਸ਼ੇਵਰਾਂ ਦਾ ਮੁੱਦਾ
ਦੋਹਾਂ ਦੇਸ਼ਾਂ ਦੇ ਮੰਤਰੀਆਂ ਵਿਚਕਾਰ ‘ਟੂ ਪਲੱਸ ਟੂ’ ਗੱਲਬਾਤ ਦੌਰਾਨ ਮੰਤਰੀਆਂ ਨੇ ਵਿਦਿਆਰਥੀਆਂ ਅਤੇ ਪੇਸ਼ੇਵਰਾਂ ਦੀ ਦੋਹਾਂ ਦੇਸ਼ਾਂ ਵਿਚਕਾਰ ਆਵਾਜਾਈ ਨੂੰ ਬਿਹਤਰ ਕਰਨ ਦੇ ਰਸਤਿਆਂ ਦੀ ਵੀ ਖੋਜ ਕੀਤੀ, ਜੋ ਇੰਡੋ-ਪੈਸੀਫਿਕ ਵਿੱਚ ਭਰੋਸੇਯੋਗ ਅਤੇ ਲਚਕੀਲੇ ਸਪਲਾਈ ਚੇਨ ਨੂੰ ਉਤਸ਼ਾਹਿਤ ਕਰਨ ਲਈ ਸਾਂਝੀ ਵਚਨਬੱਧਤਾ ਨੂੰ ਦਰਸਾਉਂਦਾ ਹੈ।
ਇਸ ਦੌਰਾਨ ਭਾਰਤ ਅਤੇ ਆਸਟ੍ਰੇਲੀਆ ਨੇ ‘ਮੁਕਤ, ਖੁੱਲ੍ਹੇ, ਸੰਮਲਿਤ ਅਤੇ ਨਿਯਮ-ਅਧਾਰਿਤ’ ਇੰਡੋ-ਪੈਸੀਫਿਕ ਖੇਤਰ ਲਈ ਸਾਂਝੇ ਸਮਰਪਣ ’ਤੇ ਜ਼ੋਰ ਦਿੰਦੇ ਹੋਏ ਆਰਥਿਕ ਅਤੇ ਸੁਰੱਖਿਆ ਸਬੰਧਾਂ ਨੂੰ ਮਜ਼ਬੂਤ ਕਰਨ ਲਈ ਆਪਣੀ ਵਚਨਬੱਧਤਾ ਦੀ ਵੀ ਪੁਸ਼ਟੀ ਕੀਤੀ ਹੈ। ਭਾਰਤ-ਆਸਟ੍ਰੇਲੀਆ ਦੇ ਵਿਦੇਸ਼ ਮੰਤਰੀਆਂ ਦੀ ਫਰੇਮਵਰਕ ਗੱਲਬਾਤ ਦੇ ਅੰਤ ਵਿੱਚ, ਵਿਦੇਸ਼ ਮੰਤਰੀ ਐਸ. ਜੈਸ਼ੰਕਰ ਨੇ ਆਸਟ੍ਰੇਲੀਆ, ਭਾਰਤ, ਜਾਪਾਨ ਅਤੇ ਅਮਰੀਕਾ ਦੇ ਕੁਆਡ ਗਰੁੱਪਿੰਗ ਦੀ ਆਗਾਮੀ ਮੀਟਿੰਗ ਦੀਆਂ ਤਿਆਰੀਆਂ ਨੂੰ ਉਜਾਗਰ ਕੀਤਾ।ਵਿਚਾਰ-ਵਟਾਂਦਰੇ ਦੌਰਾਨ ਦੋਵਾਂ ਧਿਰਾਂ ਨੇ ਵਿਆਪਕ ਆਰਥਿਕ ਸਹਿਯੋਗ ਸਮਝੌਤਾ (CECA) ਗੱਲਬਾਤ ਨੂੰ ਅੱਗੇ ਵਧਾਉਣ ਦੇ ਮਹੱਤਵ ਨੂੰ ਰੇਖਾਂਕਿਤ ਕੀਤਾ।