ਮੈਲਬਰਨ: ਬੀਅਰ ’ਤੇ ਟੈਕਸ ’ਚ ਦੋ ਫ਼ੀਸਦੀ ਦੇ ਵਾਧੇ ਤੋਂ ਬਾਅਦ ਇਸ ਦੀ ਕੀਮਤ 15 ਡਾਲਰ ਪ੍ਰਤੀ ਪਿੰਟ ਤੋਂ ਵੱਧ ਹੋਣ ਵਾਲੀ ਹੈ। 5 ਫਰਵਰੀ ਤੋਂ ਬਾਅਦ ਬੀਅਰ ਪੀਣ ਦੇ ਸ਼ੌਕੀਨਾਂ ਨੂੰ ਲਗਭਗ 90 ਸੈਂਟ ਪ੍ਰਤੀ ਪਿੰਟ ਜ਼ਿਆਦਾ ਦੇਣੇ ਪੈਣਗੇ। ਬਰੂਅਰਜ਼ ਐਸੋਸੀਏਸ਼ਨ ਆਫ ਆਸਟ੍ਰੇਲੀਆ ਦੇ ਮੁੱਖ ਕਾਰਜਕਾਰੀ ਜੌਨ ਪ੍ਰੈਸਟਨ ਨੇ ਦੱਸਿਆ ਕਿ ਨਾਰਵੇ ਅਤੇ ਫਿਨਲੈਂਡ ਤੋਂ ਬਾਅਦ ਆਸਟ੍ਰੇਲੀਆ ਬੀਅਰ ’ਤੇ ਸਭ ਤੋਂ ਵੱਧ ਟੈਕਸ ਲਾਉਂਦਾ ਹੈ। ਮਈ 2022 ਵਿਚ ਪਿਛਲੀਆਂ ਫੈਡਰਲ ਚੋਣਾਂ ਤੋਂ ਬਾਅਦ ਬੀਅਰ ਪੀਣ ਵਾਲਿਆਂ ਲਈ ਐਕਸਾਈਜ਼ ਟੈਕਸ ਵਿਚ ਲਗਭਗ 15 ਪ੍ਰਤੀਸ਼ਤ ਦਾ ਵਾਧਾ ਹੋਇਆ ਹੈ। ਬੀਅਰ ਦੇ ਸਲੈਬ ’ਤੇ ਟੈਕਸ ਹੁਣ 20 ਡਾਲਰ ਹੋ ਗਿਆ ਹੈ।
ਸਪਿਰਿਟ ਅਤੇ ਬੀਅਰ ‘ਤੇ ਲਗਾਇਆ ਜਾਣ ਵਾਲਾ ਟੈਕਸ – ਜਿਸ ਨੂੰ ਐਕਸਾਈਜ਼ ਟੈਕਸ ਵਜੋਂ ਜਾਣਿਆ ਜਾਂਦਾ ਹੈ – ਹਰੇਕ ਪੀਣ ਵਾਲੇ ਪਦਾਰਥ ’ਚ ਅਲਕੋਹਲ ਦੀ ਮਾਤਰਾ ਦੇ ਅਧਾਰ ਤੇ ਵੱਖੋ-ਵੱਖ ਹੁੰਦਾ ਹੈ। ਸਰਕਾਰ ਵੱਲੋਂ ਵਸੂਲੇ ਜਾਣ ਵਾਲੇ ਐਕਸਾਈਜ਼ ਟੈਕਸ ਦੀ ਰਕਮ ਮਹਿੰਗਾਈ ਨਾਲ ਵੀ ਜੁੜੀ ਹੋਈ ਹੈ, ਕੱਲ੍ਹ ਜਾਰੀ ਅਧਿਕਾਰਤ ਅੰਕੜਿਆਂ ਤੋਂ ਪਤਾ ਲੱਗਦਾ ਹੈ ਕਿ 31 ਦਸੰਬਰ ਨੂੰ ਖਤਮ ਹੋਏ ਤਿੰਨ ਮਹੀਨਿਆਂ ਵਿੱਚ ਮਹਿੰਗਾਈ ਵਿੱਚ 4.1 ਪ੍ਰਤੀਸ਼ਤ ਦਾ ਵਾਧਾ ਹੋਇਆ। ਐਕਸਾਈਜ਼ ਟੈਕਸ ਦੀਆਂ ਦਰਾਂ ਨੂੰ ਸਾਲ ਵਿੱਚ ਦੋ ਵਾਰ – ਅਗਸਤ ਅਤੇ ਫਰਵਰੀ ਵਿੱਚ – ਮਹਿੰਗਾਈ ਦੀ ਗਤੀ ਦੇ ਅਧਾਰ ’ਤੇ ਐਡਜਸਟ ਕੀਤਾ ਜਾਂਦਾ ਹੈ।
