ਮੈਲਬਰਨ: Commonwealth Bank ਬ੍ਰਾਂਚਾਂ ਨੇ ਆਪਣੀ ਨੀਤੀ ਨੂੰ ਬਦਲ ਕੇ ਸਿਰਫ ਆਪਣੇ ਬੈਂਕ ਨਾਲ ਜੁੜੇ ਗਾਹਕਾਂ ਨੂੰ ਆਪਣੀਆਂ ਸ਼ਾਖਾਵਾਂ ਵਿੱਚ ਨਕਦੀ ਦਾ ਆਦਾਨ-ਪ੍ਰਦਾਨ ਕਰਨ ਦੀ ਇਜਾਜ਼ਤ ਦਿੱਤੀ ਹੈ। ਸੀ.ਬੀ.ਏ. ਦੇ ਬੁਲਾਰੇ ਨੇ ਕਿਹਾ ਕਿ ਇਹ ਤਬਦੀਲੀ ਜੂਨ 2023 ਤੋਂ ਲਾਗੂ ਹੋ ਗਈ ਹੈ, ਇਹ ਯਕੀਨੀ ਬਣਾਉਣ ਲਈ ਕਿ ਬ੍ਰਾਂਚ ਟੀਮਾਂ ‘‘ਗਾਹਕਾਂ ਲਈ ਬਿਹਤਰੀਨ ਸੇਵਾ ਪ੍ਰਦਾਨ ਕਰਨ ‘ਤੇ ਧਿਆਨ ਦੇਣ ਦੇ ਯੋਗ ਹਨ।’’ ਹਾਲਾਂਕਿ ਇਸ ਨਾਲ ਇਲਾਕੇ ’ਚ ਉਨ੍ਹਾਂ ਕਾਰੋਬਾਰਾਂ ਲਈ ਚੁਣੌਤੀਆਂ ਪੈਦਾ ਹੋ ਸਕਦੀਆਂ ਹਨ ਜੋ ਹੋਰ ਵਿੱਤੀ ਸੰਸਥਾਵਾਂ ਨਾਲ ਬੈਂਕਿੰਗ ਕਰਦੇ ਹਨ।
ਇਸ ਦੌਰਾਨ, ਦੇਸ਼ ਭਰ ਵਿੱਚ ਕਈ ਥਾਵਾਂ ’ਤੇ Commonwealth Bank ’ਚ ਕਾਊਂਟਰ ’ਤੇ ਹੁਣ ਨਕਦੀ ਉਪਲਬਧ ਨਹੀਂ ਹੈ, ਜਿੱਥੇ ਨਵੇਂ ਸਪੈਸ਼ਲਿਸਟ ਸੈਂਟਰ ਹੁਣ ‘ਵਧੇਰੇ ਗੁੰਝਲਦਾਰ ਬੈਂਕਿੰਗ ਲੋੜਾਂ’ ’ਤੇ ਕੇਂਦ੍ਰਿਤ ਹਨ। ਗਾਹਕ ਇਸ ਦੀ ਬਜਾਏ ਸਾਈਟ ’ਤੇ ਮੌਜੂਦ ATM ’ਤੇ Cash ਕਢਵਾ ਸਕਦੇ ਹਨ ਜਾਂ ਜਮ੍ਹਾ ਕਰ ਸਕਦੇ ਹਨ।
ਸਪੈਸ਼ਲਿਸਟ ਸੈਂਟਰ ਬ੍ਰਿਸਬੇਨ, ਮੈਲਬੋਰਨ ਅਤੇ ਸਿਡਨੀ ਵਿੱਚ ਸਥਿਤ ਹਨ, ਹਾਲਾਂਕਿ ਕਾਮਨਵੈਲਥ ਬੈਂਕ ਨੇ ਅਜੇ ਤੱਕ ਪ੍ਰਭਾਵਿਤ ਸਥਾਨਾਂ ਦੀ ਪੁਸ਼ਟੀ ਨਹੀਂ ਕੀਤੀ ਹੈ। ਨਵੇਂ ਕੇਂਦਰ ਆਮ ਗਾਹਕ ਸਹਾਇਤਾ ਅਤੇ ਹੋਮ ਲੋਨ, ਕਾਰੋਬਾਰੀ ਕਰਜ਼ਿਆਂ ਅਤੇ ਬੱਚਤ ਟੀਚਿਆਂ ਵਿੱਚ ਮਦਦ ਦੀ ਪੇਸ਼ਕਸ਼ ਕਰਦੇ ਹਨ। ਗਾਹਕ ਕੇਂਦਰਾਂ ’ਤੇ ਬੈਂਕ ਚੈੱਕ ਅਤੇ ਅੰਤਰਰਾਸ਼ਟਰੀ ਮਨੀ ਟ੍ਰਾਂਸਫਰ ਦੀ ਸੇਵਾ ਵੀ ਪ੍ਰਾਪਤ ਕਰ ਸਕਦੇ ਹਨ। ਕਾਮਨਵੈਲਥ ਬੈਂਕ ਦੇ ਗਾਹਕ ਕਾਰਡ ਰਹਿਤ ਨਕਦੀ ਦੀ ਵਰਤੋਂ ਕਰ ਕੇ ਬੈਂਕ ਦੀ ਐਪ ਰਾਹੀਂ ਪੈਸੇ ਕਢਵਾ ਸਕਦੇ ਹਨ ਅਤੇ ਜਮ੍ਹਾ ਵੀ ਕਰ ਸਕਦੇ ਹਨ।