ਮੈਲਬਰਨ: ਕੁਈਨਜ਼ਲੈਂਡ ਦੇ ਪੇਂਡੂ ਇਲਾਕੇ ’ਚ 26 ਗ੍ਰੀਨਹਾਉਸਾਂ ਵਿੱਚ ਉੱਗੇ ਹੋਏ ਲਗਭਗ 14,000 ਭੰਗ ਦੇ ਪੌਦੇ ਜ਼ਬਤ ਕੀਤੇ ਗਏ ਹਨ। ਇਹ ਇਸ ਮਹੀਨੇ ਸਟੇਟ ’ਚ ਖੇਤਾਂ ’ਤੇ ਦੂਜਾ ਵੱਡਾ ਛਾਪਾ ਹੈ ਅਤੇ ਪੁਲਿਸ ਦਾ ਅੰਦਾਜ਼ਾ ਹੈ ਕਿ ਗੈਰ-ਕਾਨੂੰਨੀ ਫਸਲ ਦੀ ਕੀਮਤ 70 ਲੱਖ ਡਾਲਰ ਹੈ। ਬ੍ਰਿਸਬੇਨ ਤੋਂ ਲਗਭਗ 450 ਕਿਲੋਮੀਟਰ ਉੱਤਰ ਵਿਚ, ਰੋਜ਼ਡੇਲ ਵਿਚ ਮੰਗਲਵਾਰ ਨੂੰ ਅਧਿਕਾਰੀਆਂ ਵੱਲੋਂ ਖੇਤਾਂ ’ਤੇ ਛਾਪੇਮਾਰੀ ਕਰਨ ਤੋਂ ਬਾਅਦ ਛੇ ਲੋਕਾਂ ਨੂੰ ਗ੍ਰਿਫਤਾਰ ਕੀਤਾ ਗਿਆ। ਪੁਲਿਸ ਨੇ ਇਹ ਵੀ ਕਿਹਾ ਕਿ ਉਨ੍ਹਾਂ ਨੂੰ 15 ਕਿਲੋ ਸੁੱਕੀ ਭੰਗ ਮਿਲੀ।
ਪੁਲਿਸ ਨੇ ਕਿਹਾ ਕਿ 27 ਤੋਂ 40 ਸਾਲ ਦੀ ਉਮਰ ਦੇ ਗ੍ਰਿਫ਼ਤਾਰ ਵਿਅਕਤੀਆਂ ਨੂੰ ਕਈ ਨਸ਼ੀਲੇ ਪਦਾਰਥਾਂ ਦੇ ਦੋਸ਼ਾਂ ਦਾ ਸਾਹਮਣਾ ਕਰਨਾ ਪਵੇਗਾ। ਇਨ੍ਹਾਂ ’ਚੋਂ ਦੋ ’ਤੇ ਗੈਰ-ਕਾਨੂੰਨੀ ਨਾਗਰਿਕ ਹੋਣ ਦਾ ਵੀ ਦੋਸ਼ ਹੈ। ਸਾਰਿਆਂ ਨੂੰ ਜ਼ਮਾਨਤ ਦੇਣ ਤੋਂ ਇਨਕਾਰ ਕਰ ਦਿੱਤਾ ਗਿਆ ਹੈ ਅਤੇ ਆਉਣ ਵਾਲੇ ਦਿਨਾਂ ਵਿੱਚ ਇਨ੍ਹਾਂ ਦੇ ਬੰਡਾਬਰਗ ਮੈਜਿਸਟ੍ਰੇਟ ਅਦਾਲਤ ’ਚ ਪੇਸ਼ ਹੋਣ ਦੀ ਉਮੀਦ ਹੈ।
ਇਹ ਛਾਪਾ ਇਸ ਮਹੀਨੇ ਦੇ ਸ਼ੁਰੂ ਵਿਚ ਫਰੇਜ਼ਰ ਤੱਟ ’ਤੇ ਇਕ ਜਾਇਦਾਦ ’ਤੇ ਛਾਪੇਮਾਰੀ ਕਰਨ ਅਤੇ ਇਕ ਫਾਰਮ ’ਤੇ ਵਿਸ਼ਾਲ ਸੁਰੰਗਾਂ ਵਿਚ ਉੱਗ ਰਹੀ 60 ਲੱਖ ਡਾਲਰ ਤੋਂ ਵੱਧ ਦੀ ਭੰਗ ਨੂੰ ਜ਼ਬਤ ਕਰਨ ਤੋਂ ਬਾਅਦ ਮਾਰਿਆ ਗਿਆ ਹੈ। ਉਸ ਛਾਪੇ ’ਚ 18 ਲੋਕਾਂ ਨੂੰ ਗ੍ਰਿਫਤਾਰ ਕੀਤਾ ਗਿਆ ਅਤੇ 80 ਨਸ਼ੀਲੇ ਪਦਾਰਥਾਂ ਨਾਲ ਸਬੰਧਤ ਅਪਰਾਧਾਂ ਦੇ ਦੋਸ਼ ਲਾਏ ਗਏ ਸਨ। ਪੁਲਿਸ ਦੋਵਾਂ ਖੇਤਾਂ ਵਿਚਕਾਰ ਸੰਭਾਵੀ ਸਬੰਧਾਂ ਦੀ ਜਾਂਚ ਕਰ ਰਹੀ ਹੈ।
ਡਿਟੈਕਟਿਵ ਇੰਸਪੈਕਟਰ ਬ੍ਰੈਡ ਫੈਲਪਸ ਨੇ ਕਿਹਾ, ‘‘ਇਸ ਸਾਲ ਡਰੱਗ ਅਤੇ ਗੰਭੀਰ ਅਪਰਾਧ ਸਮੂਹ ਵੱਲੋਂ ਪਛਾਣਿਆ ਗਿਆ ਇਹ ਸੱਤਵਾਂ ਫਾਰਮ ਹੈ। ਅਸੀਂ ਜਾਣਦੇ ਹਾਂ ਕਿ ਇਹ ਸਮੂਹ ਉਤਪਾਦਨ ਅਤੇ ਸਪਲਾਈ ਦੇ ਇੱਕ ਵਧੀਆ ਰਾਸ਼ਟਰੀ ਨੈਟਵਰਕ ਦੇ ਅੰਦਰ ਕੰਮ ਕਰਦੇ ਹਨ, ਅਤੇ ਅਸੀਂ ਚਲ ਰਹੀ ਜਾਂਚ ਦੇ ਹਿੱਸੇ ਵਜੋਂ ਇਨ੍ਹਾਂ ਵਿਰੁਧ ਕੰਮ ਕਰਨਾ ਜਾਰੀ ਰੱਖਾਂਗੇ।’’
