ਮੈਲਬਰਨ: ਆਸਟ੍ਰੇਲੀਆ ਭਰ ਵਿਚ ਹਜ਼ਾਰਾਂ ਵਿਦਿਆਰਥੀ ਜਲਵਾਯੂ ਤਬਦੀਲੀ (Climate Change) ’ਤੇ ਸਰਕਾਰ ਦੀ ਕਾਰਵਾਈ ਦੀ ਘਾਟ ਦਾ ਵਿਰੋਧ ਕਰਨ ਲਈ ਸੜਕਾਂ ’ਤੇ ਉਤਰ ਆਏ। ਸ਼ੁੱਕਰਵਾਰ ਨੂੰ ਹੋਏ ਵਿਰੋਧ ਪ੍ਰਦਰਸ਼ਨ ’ਚ ਹਿੱਸਾ ਲੈਣ ਲਈ ਵਿਦਿਆਰਥੀਆਂ ਨੇ ਸਕੂਲ ਤੋਂ ‘ਜਲਵਾਯੂ ਡਾਕਟਰ ਦੇ ਸਰਟੀਫਿਕੇਟ’ ਦੀ ਵਰਤੋਂ ਕਰ ਕੇ ਬਿਮਾਰੀ ਦੀ ਛੁੱਟੀ ਲੈਂਦਿਆਂ ਦੇਖਿਆ ਗਿਆ। ਵਿਰੋਧ ਪ੍ਰਦਰਸ਼ਨ ਮੈਲਬੌਰਨ ਅਤੇ ਸਿਡਨੀ ਵਰਗੇ ਵੱਡੇ ਸ਼ਹਿਰਾਂ ਵਿੱਚ ਕੀਤੇ ਗਏ, ਜਿਨ੍ਹਾਂ ’ਚ 11 ਸਾਲ ਦੀ ਉਮਰ ਦੇ ਵਿਦਿਆਰਥੀ ਵੀ ਸ਼ਾਮਲ ਸਨ। ਵਿਦਿਆਰਥੀਆਂ ਨੇ ਜਲਵਾਯੂ ਪਰਿਵਰਤਨ ਦਾ ਮੁਕਾਬਲਾ ਕਰਨ ਲਈ ਸਰਕਾਰ ਵੱਲੋਂ ਭਰਪੂਰ ਕੋਸ਼ਿਸ਼ਾਂ ਨਾ ਕੀਤੇ ਜਾਣ ਪ੍ਰਤੀ ਆਪਣੀ ਨਿਰਾਸ਼ਾ ਜ਼ਾਹਰ ਕੀਤੀ।
ਮੈਲਬੌਰਨ ’ਚ ਹਜ਼ਾਰਾਂ ਲੋਕ ਫਲੈਗਸਟਾਫ ਗਾਰਡਨ ਵਿੱਚ ਇਕੱਠੇ ਹੋਏ ਅਤੇ ਸ਼ਹਿਰ ਦੇ ਕੇਂਦਰ ਵਿੱਚ ਮਾਰਚ ਕੀਤਾ। ਪ੍ਰਦਰਸ਼ਨਕਾਰੀਆਂ ਨੇ ਆਵਾਜਾਈ ਠੱਪ ਕਰ ਦਿੱਤੀ ਅਤੇ ਕਈ ਮੁੱਖ ਚੌਰਾਹਿਆਂ ’ਤੇ ਧਰਨੇ ਦਿੱਤੇ। ਸਿਡਨੀ ਵਿੱਚ, ਸੈਂਕੜੇ ਲੋਕ ਵਾਤਾਵਰਣ ਮੰਤਰੀ ਤਾਨਿਆ ਪਲੀਬਰਸੇਕ ਦੇ ਦਫ਼ਤਰ ਦੇ ਬਾਹਰ ਇਕੱਠੇ ਹੋਏ।
ਵਿਦਿਆਰਥੀ ਮੰਗ ਕਰ ਰਹੇ ਹਨ ਕਿ ਸਰਕਾਰ ਸੰਕਟ ਵਧਾਉਣ ਵਾਲੀਆਂ ਕਾਰਵਾਈਆਂ ਲਈ ਫੰਡ ਦੇਣਾ ਬੰਦ ਕਰੇ ਜੋ ਧਰਤੀ ਨੂੰ ਖ਼ਤਮ ਕਰ ਰਿਹਾ ਹੈ। ਉਹ ਆਪਣੇ ਭਵਿੱਖ ’ਤੇ ਜਲਵਾਯੂ ਪਰਿਵਰਤਨ ਦੇ ਪ੍ਰਭਾਵ ਬਾਰੇ ਖਾਸ ਤੌਰ ’ਤੇ ਚਿੰਤਤ ਹਨ, ਇੱਕ ਵਿਦਿਆਰਥਣ ਨੇ ਕਿਹਾ ਕਿ ਉਹ ਚਿੰਤਤ ਹੈ ਕਿ ਜੇਕਰ ਜਲਵਾਯੂ ਤਬਦੀਲੀ ’ਤੇ ਅਸਲ ਕਾਰਵਾਈ ਨਾ ਹੋਈ ਤਾਂ ਉਸ ਦਾ ਭਵਿੱਖ ਧੁੰਦਲਾ ਹੋ ਜਾਵੇਗਾ।
ਟੋਰੇਸ ਸਟ੍ਰੇਟ ਆਈਲੈਂਡਰ ਲਾਅ ਦੀ ਵਿਦਿਆਰਥੀ ਚੇਲਸੀ ਅਨੀਬਾ ਮੈਲਬੌਰਨ ਵਿੱਚ ਹੋਏ ਪ੍ਰਦਰਸ਼ਨ ਵਿੱਚ ਸ਼ਾਮਲ ਹੋਈ ਤਾਂ ਜੋ ਇਹ ਉਜਾਗਰ ਕੀਤਾ ਜਾ ਸਕੇ ਕਿ ਕਿਵੇਂ ਉਸ ਦੇ ਲੋਕ ਜਲਵਾਯੂ ਤਬਦੀਲੀ ਵਿਰੁਧ ਲੜਾਈ ’ਚ ਸਭ ਤੋਂ ਅੱਗੇ ਹਨ। ਉਸ ਨੇ ਸਮਝਾਇਆ ਕਿ ਜਲਵਾਯੂ ਤਬਦੀਲੀ ਉਨ੍ਹਾਂ ਦੇ ਘਰਾਂ ਅਤੇ ਰਵਾਇਤੀ ਭੋਜਨ ਸਰੋਤਾਂ ਨੂੰ ਪ੍ਰਭਾਵਤ ਕਰ ਰਹੀ ਹੈ, ਅਤੇ ਇਸ ਕਾਰਨ ਹੀ ਸਮੁੰਦਰ ਦੇ ਪਾਣੀ ਦਾ ਪੱਧਰ ਵੱਧ ਰਿਹਾ ਹੈ। ਟੋਰੇਸ ਸਟ੍ਰੇਟ ਆਈਲੈਂਡਰ ਬਜ਼ੁਰਗਾਂ ਪਾਬਈ ਪਬਾਈ ਅਤੇ ਪਾਲ ਕਬਾਈ, ਜੋ ਕਿ ਜਲਵਾਯੂ ਤਬਦੀਲੀ ਵਿਰੁਧ ਕਾਰਵਾਈ ਨਾ ਕਰਨ ਲਈ ਆਸਟਰੇਲੀਆਈ ਸਰਕਾਰ ਦੇ ਵਿਰੁੱਧ ਇੱਕ ਇਤਿਹਾਸਕ ਅਦਾਲਤੀ ਕੇਸ ਲੜ ਰਹੇ ਹਨ ਅਤੇ ਸੁਣਵਾਈ ਲਈ ਮੈਲਬੌਰਨ ਵਿੱਚ ਹਨ, ਨੇ ਵੀ ਹੜਤਾਲ ਵਿੱਚ ਬੋਲਿਆ।
