ਮੈਲਬਰਨ : Canberra ’ਚ Treasurer Jim Chalmers ਅਤੇ Finance Minister Katy Gallagher ਨੇ ਐਲਾਨ ਕੀਤਾ ਕਿ ਇਸ ਵਾਰ 12 ਮਈ ਨੂੰ ਪੇਸ਼ ਹੋਣ ਜਾ ਰਿਹਾ ਬਜਟ ‘ambitious’ ਹੋਵੇਗਾ, ਜਿਸ ਵਿੱਚ ਸਰਕਾਰੀ ਖਰਚੇ ਘਟਾਉਣ ’ਤੇ ਖਾਸ ਧਿਆਨ ਦਿੱਤਾ ਜਾਵੇਗਾ। ਸਰਕਾਰ ਨੇ 2.7 ਬਿਲੀਅਨ ਡਾਲਰ ਦੀ ਬਚਤ ਦਾ ਟੀਚਾ ਰੱਖਿਆ ਹੈ, ਜੋ ਹਰ ਵਿਭਾਗ ਵਿੱਚੋਂ ਕੱਟਾਂ ਰਾਹੀਂ ਹਾਸਲ ਕੀਤਾ ਜਾਵੇਗਾ। ਇਸ ਦੌਰਾਨ ਆਸਟ੍ਰੇਲੀਅਨ ਫ਼ਾਈਨੈਂਸ਼ੀਅਲ ਰੀਵਿਊ ਨੇ ਵੀ ਖ਼ਬਰ ਦਿੱਤੀ ਕਿ ਹਜ਼ਾਰਾਂ ਸਰਕਾਰੀ ਨੌਕਰੀਆਂ ’ਚ ਕਮੀ ਕੀਤੀ ਜਾ ਸਕਦੀ ਹੈ।
ਟੈਕਸ ਸੁਧਾਰਾਂ ਵਿੱਚ Capital Gains Tax (CGT) ਛੋਟ ਅਤੇ Negative Gearing ‘ਤੇ ਬਦਲਾਅ ਦੀ ਸੰਭਾਵਨਾ ਹੈ। ਇਹ ਨੀਤੀਆਂ ਹਾਊਸਿੰਗ ਸੰਕਟ ਨੂੰ ਵਧਾਉਣ ਲਈ ਜ਼ਿੰਮੇਵਾਰ ਮੰਨੀਆਂ ਜਾ ਰਹੀਆਂ ਹਨ ਅਤੇ ਸਰਕਾਰ ਇਨ੍ਹਾਂ ਨੂੰ ਨਿਆਂਯੋਗ ਬਣਾਉਣ ਦੀ ਕੋਸ਼ਿਸ਼ ਕਰ ਰਹੀ ਹੈ।
NDIS ’ਚੋਂ 15 ਬਿਲੀਅਨ ਡਾਲਰ ਕੱਟ ਕੀਤੇ ਜਾਣਗੇ, ਧੋਖਾਧੜੀ ਰੋਕਣ ਅਤੇ ਖਰਚੇ ਘਟਾਉਣ ਲਈ ਨਵੇਂ ਨਿਯਮ ਲਾਗੂ ਹੋਣਗੇ। ਇਸ ਨਾਲ ਭਵਿੱਖ ਵਿੱਚ ਯੋਜਨਾ ਦੇ ਹਿੱਸੇਦਾਰਾਂ ਦੀ ਗਿਣਤੀ ਘਟਣ ਦੀ ਸੰਭਾਵਨਾ ਹੈ। ਹਾਲਾਂਕਿ ਰੱਖਿਆ ਖੇਤਰ ਨੂੰ 53 ਬਿਲੀਅਨ ਡਾਲਰ ਵਾਧੂ ਫੰਡ ਮਿਲੇਗਾ, ਜਿਸ ਨਾਲ 2033 ਤੱਕ GDP ਦਾ 3% ਰੱਖਿਆ ’ਤੇ ਖਰਚਿਆ ਜਾਵੇਗਾ।
ਫ਼ਿਊਲ ’ਤੇ ਟੈਕਸ ਛੋਟ ਨਾਲ ਡਰਾਈਵਰਾਂ ਨੂੰ ਰਾਹਤ ਮਿਲੇਗੀ, ਜਦਕਿ ਵਰਕਰਾਂ ਲਈ 1000 ਡਾਲਰ ਤੱਕ ਤੁਰੰਤ ਟੈਕਸ ਛੋਟ ਦਾ ਐਲਾਨ ਕੀਤਾ ਗਿਆ ਹੈ। ਇਹ ਬਜਟ ਆਸਟ੍ਰੇਲੀਆ ਦੀ ਅਰਥਵਿਵਸਥਾ ਨੂੰ ਗਲੋਬਲ ਅਣਿਸ਼ਚਿਤਤਾ ਦੇ ਦੌਰ ਵਿੱਚ ਸੰਭਾਲਣ ਅਤੇ ਨਵੀਂ ਪੀੜ੍ਹੀ ਲਈ ਨਿਆਂਯੋਗ ਮੌਕੇ ਪੈਦਾ ਕਰਨ ਵੱਲ ਇੱਕ ਵੱਡਾ ਕਦਮ ਮੰਨਿਆ ਜਾ ਰਿਹਾ ਹੈ।
