ਮੈਲਬਰਨ : ਆਸਟ੍ਰੇਲੀਆ ਦੇ ਫੈਡਰਲ ਸੰਸਦ ਮੈਂਬਰਾਂ ਦੀ ਤਨਖਾਹ ‘ਚ 1 ਜੁਲਾਈ ਤੋਂ 3.5 ਫੀਸਦੀ ਦਾ ਵਾਧਾ ਹੋਵੇਗਾ ਜੋ ਪਿਛਲੇ ਦਹਾਕੇ ਦਾ ਦੂਜਾ ਸਭ ਤੋਂ ਵੱਡਾ ਵਾਧਾ ਹੈ। ਪ੍ਰਧਾਨ ਮੰਤਰੀ ਐਂਥਨੀ ਅਲਬਾਨੀਜ਼ ਦੀ ਤਨਖਾਹ 20,000 ਡਾਲਰ ਵਧ ਕੇ 6,07,500 ਡਾਲਰ ਪ੍ਰਤੀ ਸਾਲ ਹੋ ਜਾਵੇਗੀ, ਜਦੋਂ ਕਿ ਵਿਰੋਧੀ ਧਿਰ ਦੇ ਨੇਤਾ ਪੀਟਰ ਡਟਨ ਦੀ ਤਨਖਾਹ 14,617 ਡਾਲਰ ਵਧ ਕੇ 4,32,250 ਡਾਲਰ ਪ੍ਰਤੀ ਸਾਲ ਹੋ ਜਾਵੇਗੀ। ਸੰਸਦ ਮੈਂਬਰਾਂ ਦੀ ਬੇਸ ਤਨਖਾਹ 2,33,650 ਡਾਲਰ ਹੋਵੇਗੀ। ਹਾਲਾਂਕਿ ਇਹ ਵਾਧਾ ਹਾਲ ਹੀ ਵਿੱਚ 3.75٪ ਘੱਟੋ ਘੱਟ ਤਨਖਾਹ ਵਾਧੇ ਅਤੇ 3.6٪ ਦੀ ਮਹਿੰਗਾਈ ਦਰ ਨਾਲੋਂ ਘੱਟ ਹੈ। Independent Remuneration Tribunal (IRT) ਨੇ ਚੋਟੀ ਦੇ ਸਰਕਾਰੀ ਮੁਲਾਜ਼ਮਾਂ ਦੀਆਂ ਤਨਖਾਹਾਂ ਵਿੱਚ ਵੀ ਵਾਧਾ ਕੀਤਾ ਹੈ, ਜਿਨ੍ਹਾਂ ਵਿੱਚੋਂ ਕੁਝ ਦੀ ਕਮਾਈ 1 ਮਿਲੀਅਨ ਡਾਲਰ ਤੋਂ ਵੀ ਵੱਧ ਹੈ।
ਹਾਲਾਂਕਿ ਤਨਖ਼ਾਹ ’ਚ ਇਸ ਵਾਧੇ ਦੀ ਆਲੋਚਨਾ ਸ਼ੁਰੂ ਹੋ ਗਈ ਹੈ। ਪੱਤਰਕਾਰ ਜਸਟਿਨ ਸਮਿਥ ਅਤੇ ਸੁਜ਼ੈਨ ਮੋਸਟਿਨ ਨੇ ਇੱਕ ਟਾਕ ਸ਼ੋਅ ਵਿੱਚ ਚੋਟੀ ਦੇ ਸਰਕਾਰੀ ਮੁਲਾਜ਼ਮਾਂ ਦੀ ਤਨਖ਼ਾਹ ’ਚ ਵਾਧੇ ‘ਤੇ ਸਵਾਲ ਉਠਾਏ ਅਤੇ ਇਸ ਦੀ ਤੁਲਨਾ ਆਮ ਨਾਗਰਿਕਾਂ ਦੇ ਵਿੱਤੀ ਸੰਘਰਸ਼ਾਂ ਨਾਲ ਕੀਤੀ। IRT ਨੇ ਇਸ ਵਾਧੇ ਦਾ ਬਚਾਅ ਕਰਦਿਆਂ ਕਿਹਾ ਕਿ 2015 ਤੋਂ ਲੈ ਕੇ ਹੁਣ ਤੱਕ ਕੁੱਲ 18.25٪ ਦਾ ਵਾਧਾ ਹੋਇਆ ਹੈ, ਜਦੋਂ ਕਿ ਇਸੇ ਮਿਆਦ ਵਿੱਚ ਜਨਤਕ ਅਤੇ ਨਿੱਜੀ ਖੇਤਰਾਂ ਵਿੱਚ 24.4٪ ਦਾ ਵਾਧਾ ਹੋਇਆ ਹੈ।
