ਮੈਲਬਰਨ: ਆਸਟ੍ਰੇਲੀਆਈ ਪੇਸ਼ੇਵਰ ਫੁੱਟਬਾਲ ਵਿਚ ਪੈਸੇ ਬਦਲੇ ਮੈਚ ਹਾਰਨ ਦੇ ਦੋਸ਼ਾਂ ਤੋਂ ਬਾਅਦ ਤਰਥੱਲੀ ਮੱਚ ਗਈ ਹੈ। ਲੀਗ ਕਲੱਬ Macarthur FC ਦੇ ਕਪਤਾਨ ’ਤੇ ਦੋ ਨੌਜਵਾਨ ਸਾਥੀਆਂ ਨੂੰ 10 ਹਜ਼ਾਰ ਡਾਲਰ ਬਦਲੇ ਜਾਣਬੁੱਝ ਕੇ ਪੀਲਾ ਕਾਰਡ ਦਿਵਾਉਣ ਦੇ ਦੋਸ਼ ਲੱਗੇ ਹਨ।

ਫੁੱਟਬਾਲ ਆਸਟ੍ਰੇਲੀਆ ਨੇ ਕਥਿਤ ਸੱਟੇਬਾਜ਼ੀ ਭ੍ਰਿਸ਼ਟਾਚਾਰ ਦੇ ਮਾਮਲੇ ’ਚ Macarthur FC ਦੇ ਤਿੰਨ ਖਿਡਾਰੀਆਂ ਨੂੰ ਮੁਅੱਤਲ ਕਰ ਦਿੱਤਾ ਹੈ। ਇਹ ਮੁਅੱਤਲੀਆਂ ਉਦੋਂ ਤੱਕ ਲਾਗੂ ਰਹਿਣਗੀਆਂ ਜਦੋਂ ਤੱਕ ਅਪਰਾਧਿਕ ਦੋਸ਼ ਖਤਮ ਨਹੀਂ ਹੋ ਜਾਂਦੇ। ਫੁੱਟਬਾਲ ਆਸਟ੍ਰੇਲੀਆ ਦੇ CEO ਜੇਮਸ ਜਾਨਸਨ ਦਾ ਕਹਿਣਾ ਹੈ ਕਿ ਗੈਰ-ਕਾਨੂੰਨੀ ਸੱਟੇਬਾਜ਼ੀ ਦੀ ਸਾਡੀ ਖੇਡ ਵਿਚ ਕੋਈ ਜਗ੍ਹਾ ਨਹੀਂ ਹੈ।

Macarthur FC ਦੇ ਕਪਤਾਨ ਯੂਲੀਸੇਸ ਡੇਵਿਲਾ ਅਤੇ ਸਾਥੀ ਖਿਡਾਰੀ ਕਿਰਿਨ ਬਾਕਸ ਅਤੇ ਕਲੇਟਨ ਲੁਈਸ ਨੂੰ ਮੈਚ ਫਿਕਸਿੰਗ ਵਿੱਚ ਕਥਿਤ ਤੌਰ ‘ਤੇ ਸ਼ਾਮਲ ਹੋਣ ਦੇ ਦੋਸ਼ ਵਿੱਚ ਗ੍ਰਿਫਤਾਰ ਕੀਤਾ ਗਿਆ ਸੀ। ਸ਼ੁੱਕਰਵਾਰ ਨੂੰ ਤਿੰਨਾਂ ਖਿਡਾਰੀਆਂ ‘ਤੇ ਅਧਿਕਾਰਤ ਤੌਰ ‘ਤੇ ਦੋਸ਼ ਲਗਾਏ ਗਏ ਸਨ ਅਤੇ ਉਨ੍ਹਾਂ ਨੂੰ ਜ਼ਮਾਨਤ ‘ਤੇ ਰਿਹਾਅ ਕਰ ਦਿੱਤਾ ਗਿਆ ਸੀ। ਦਾਵਿਲਾ 24 ਜੂਨ ਨੂੰ ਅਦਾਲਤ ਵਿੱਚ ਪੇਸ਼ ਹੋਵੇਗਾ।

ਜਾਂਚਕਰਤਾਵਾਂ ਦਾ ਦੋਸ਼ ਹੈ ਕਿ 24 ਨਵੰਬਰ ਅਤੇ 9 ਦਸੰਬਰ ਨੂੰ ਖੇਡੇ ਗਏ ਮੈਚ ਦੌਰਾਨ ਪੀਲੇ ਕਾਰਡ ਨਾਲ ਛੇੜਛਾੜ ਕੀਤੀ ਗਈ ਸੀ। ਇਹ ਵੀ ਦੋਸ਼ ਲਾਇਆ ਗਿਆ ਹੈ ਕਿ 20 ਅਪ੍ਰੈਲ ਅਤੇ 4 ਮਈ ਨੂੰ ਮੈਚ ਦੌਰਾਨ ਵੀ ਅਜਿਹੀਆਂ ਕੋਸ਼ਿਸ਼ਾਂ ਕੀਤੀਆਂ ਗਈਆਂ ਸਨ ਜੋ ਸਫਲ ਨਹੀਂ ਹੋ ਸਕੀਆਂ ਸਨ।