ਮੈਲਬਰਨ : ਇੱਕ ਨਵੀਂ ਅੰਕੜਿਆਂ ਅਧਾਰਿਤ ਰਿਪੋਰਟ ਅਨੁਸਾਰ ਆਸਟ੍ਰੇਲੀਆ ਵਿੱਚ ਇਮੀਗ੍ਰੇਸ਼ਨ ਘਟਾਉਣਾ ਹਾਊਸਿੰਗ ਸੰਕਟ ਦਾ ਹੱਲ ਨਹੀਂ, ਸਗੋਂ ਇਸ ਨੂੰ ਹੋਰ ਗੰਭੀਰ ਬਣਾ ਸਕਦਾ ਹੈ।
ਸਰਕਾਰੀ ਅੰਕੜਿਆਂ ਮੁਤਾਬਕ 2022–23 ਵਿੱਚ ਨੈੱਟ ਓਵਰਸੀਜ਼ ਮਾਈਗ੍ਰੇਸ਼ਨ 5.48 ਲੱਖ ਲੋਕਾਂ ਦਾ ਵਾਧਾ ਹੋਇਆ, ਜਿਸ ਨਾਲ ਘਰਾਂ ਦੀ ਮੰਗ ਰਿਕਾਰਡ ਪੱਧਰ ’ਤੇ ਪਹੁੰਚ ਗਈ। ਪਰ ਮਾਹਿਰ ਚੇਤਾਵਨੀ ਦੇ ਰਹੇ ਹਨ ਕਿ ਜੇ ਮਾਈਗ੍ਰੇਸ਼ਨ ਘਟਾਈ ਗਈ ਤਾਂ ਨਿਰਮਾਣ ਖੇਤਰ ਲਈ ਕਾਮਿਆਂ ਦੀ ਗਿਣਤੀ ਵੀ ਘਟ ਜਾਵੇਗੀ।
ਆਸਟ੍ਰੇਲੀਆਈ ਬਿਊਰੋ ਆਫ਼ ਸਟੈਟਿਸਟਿਕਸ ਅਨੁਸਾਰ ਬਿਲਡਿੰਗ ਟ੍ਰੇਡਜ਼ ਦੇ ਕਰੀਬ 40% ਕਰਮਚਾਰੀ ਪਰਵਾਸੀ ਜਾਂ ਉਨ੍ਹਾਂ ਦੀ ਦੂਜੀ ਪੀੜ੍ਹੀ ਹਨ।
ਦੇਸ਼ ਵਿਚ ਪਹਿਲਾਂ ਹੀ ਘਰਾਂ ਦੀ ਘਾਟ ਲਗਭਗ 1.75 ਲੱਖ ਯੂਨਿਟਾਂ ਦੀ ਹੈ ਅਤੇ ਜੁਲਾਈ 2025 ਵਿੱਚ ਰਾਸ਼ਟਰੀ ਪੱਧਰ ’ਤੇ ਕਿਰਾਏ ਦੀ ਖਾਲੀ ਦਰ ਸਿਰਫ਼ 1.1% ਰਹਿ ਗਈ ਸੀ। ਨੈਸ਼ਨਲ ਹਾਊਸਿੰਗ ਫਾਇਨੈਂਸ ਐਂਡ ਇਨਵੈਸਟਮੈਂਟ ਕਾਰਪੋਰੇਸ਼ਨ (NHFIC) ਦਾ ਅੰਦਾਜ਼ਾ ਹੈ ਕਿ 2029 ਤੱਕ ਮੰਗ ਪੂਰੀ ਕਰਨ ਲਈ ਆਸਟ੍ਰੇਲੀਆ ਨੂੰ 12 ਲੱਖ ਤੋਂ ਵੱਧ ਨਵੇਂ ਘਰਾਂ ਦੀ ਲੋੜ ਹੋਵੇਗੀ।
ਵਿਸ਼ਲੇਸ਼ਕਾਂ ਅਨੁਸਾਰ ਮਾਈਗ੍ਰੇਸ਼ਨ ਘਟਾਉਣ ਦਾ ਅਰਥ ਹੈ ਅੱਜ ਖਰੀਦਦਾਰ ਘਟ ਜਾਣਗੇ ਪਰ ਕੱਲ੍ਹ ਘਰ ਵੀ ਘੱਟ ਬਣਨਗੇ। ਇਸ ਅਸਮਾਨਤਾ ਨਾਲ ਦਰਮਿਆਨੇ ਸਮੇਂ ਵਿੱਚ ਘਰਾਂ ਅਤੇ ਕਿਰਾਏ ਦੀਆਂ ਕੀਮਤਾਂ ਹੋਰ ਵਧਣ ਦਾ ਖਤਰਾ ਹੈ।
ਮਾਹਿਰ ਕਹਿੰਦੇ ਹਨ ਕਿ ਜੇ ਸਪਲਾਈ ਵਧਾਉਣ ਲਈ ਵੱਡੇ ਪੱਧਰ ਦੀ ਯੋਜਨਾ ਨਾ ਬਣਾਈ ਗਈ ਤਾਂ ਮਾਈਗ੍ਰੇਸ਼ਨ ਕੱਟ ਘਰਾਂ ਨੂੰ ਹੋਰ ਮਹਿੰਗਾ ਕਰ ਸਕਦੀ ਹੈ। ਇਸ ਲਈ ਸੰਤੁਲਿਤ skilled migration intake ਨੂੰ ਬਹੁਤ ਜ਼ਰੂਰੀ ਮੰਨਿਆ ਜਾ ਰਿਹਾ ਹੈ।
