ਆਸਟ੍ਰੇਲੀਅਨ ਲੋਕਾਂ ਨੇ ਘੱਟ ਕੀਤਾ ਸ਼ਰਾਬ ਪੀਣਾ, ਜਾਣੋ ਕੀ ਕਹਿੰਦੀ ਹੈ ਨਵੀਂ ਰਿਪੋਰਟ

ਮੈਲਬਰਨ : ਆਸਟ੍ਰੇਲੀਆ ਵਿੱਚ ਪਿਛਲੇ ਦੋ ਦਹਾਕਿਆਂ ਦੌਰਾਨ ਸ਼ਰਾਬ ਪੀਣ ਦੀਆਂ ਆਦਤਾਂ ਵਿੱਚ ਵੱਡਾ ਬਦਲਾਅ ਆਇਆ ਹੈ। ਨੌਜਵਾਨ ਪੀੜ੍ਹੀ, ਖਾਸ ਕਰਕੇ 14–17 ਸਾਲ ਦੇ ਬੱਚਿਆਂ ਵਿੱਚ ਸ਼ਰਾਬ ਪੀਣ ਦੀ ਦਰ ਕਾਫ਼ੀ ਘਟੀ ਹੈ। 2001 ਵਿੱਚ ਲਗਭਗ 69% ਨਾਬਾਲਗਾਂ ਨੇ ਸ਼ਰਾਬ ਪੀਤੀ ਸੀ, ਜਦਕਿ 2022–23 ਵਿੱਚ ਇਹ ਦਰ ਸਿਰਫ਼ 31% ਰਹਿ ਗਈ। ਇਸੇ ਤਰ੍ਹਾਂ 18–24 ਸਾਲ ਦੇ ਨੌਜਵਾਨਾਂ ਵਿੱਚ ਮਹੀਨੇ ਵਿੱਚ ਘੱਟੋ-ਘੱਟ ਇੱਕ ਵਾਰ, ਮਨਜ਼ੂਰਸ਼ੁਦਾ, ਚਾਰ ਤੋਂ ਵੱਧ ਪੈੱਗ ਪੀਣ ਵਾਲਿਆਂ ਦੀ ਗਿਣਤੀ 2004 ਵਿੱਚ 56.9% ਸੀ, ਜੋ 2022–23 ਵਿੱਚ 40.8% ਹੋ ਗਈ।

Australian Institute of Health and Welfare (AIHW) ਦੀ ਰਿਪੋਰਟ ਅਨੁਸਾਰ, ਹਾਲਾਂਕਿ ਵੱਡੀ ਉਮਰ ਦੇ ਲੋਕ, ਖਾਸ ਕਰਕੇ 50 ਅਤੇ 60 ਸਾਲ ਦੇ, ਅਜੇ ਵੀ ਰਾਸ਼ਟਰੀ ਸਿਹਤ ਮਾਪਦੰਡਾਂ ਤੋਂ ਵੱਧ ਪੀ ਰਹੇ ਹਨ। 60 ਸਾਲ ਦੇ ਮਰਦਾਂ ਵਿੱਚੋਂ 44% ਅਤੇ 50 ਸਾਲ ਦੀਆਂ ਔਰਤਾਂ ਵਿੱਚੋਂ 28% ਲੋਕ ਖਤਰਨਾਕ ਪੱਧਰ ’ਤੇ ਸ਼ਰਾਬ ਪੀ ਰਹੇ ਹਨ। 70 ਸਾਲ ਤੋਂ ਵੱਧ ਉਮਰ ਵਾਲਿਆਂ ਵਿੱਚ ਵੀ 23.6% ਲੋਕ ਹਫ਼ਤੇ ਵਿੱਚ 10 ਤੋਂ ਵੱਧ ਪੈੱਗ ਪੀਂਦੇ ਹਨ।

ਸਿਹਤ ਮਾਹਰ ਚੇਤਾਵਨੀ ਦੇ ਰਹੇ ਹਨ ਕਿ ਵੱਧ ਸ਼ਰਾਬ ਪੀਣ ਨਾਲ ਕੈਂਸਰ, ਦਿਲ ਦੀਆਂ ਬਿਮਾਰੀਆਂ ਅਤੇ ਹੋਰ ਗੰਭੀਰ ਸਮੱਸਿਆਵਾਂ ਦਾ ਖਤਰਾ ਵਧਦਾ ਹੈ। COVID ਦੌਰਾਨ ਔਰਤਾਂ ਨੂੰ ਖਾਸ ਤੌਰ ’ਤੇ ਆਨਲਾਈਨ ਵਿਗਿਆਪਨ ਰਾਹੀਂ ਟਾਰਗੇਟ ਕੀਤਾ ਗਿਆ। ਹਾਲਾਂਕਿ, ਕੁਝ ਲੋਕ ਹੁਣ ਘੱਟ-ਸ਼ਰਾਬ ਜਾਂ ਬਿਨਾ-ਸ਼ਰਾਬ ਵਾਲੇ ਵਿਕਲਪਾਂ ਵੱਲ ਵੱਧ ਰਹੇ ਹਨ। ਕੁੱਲ ਮਿਲਾ ਕੇ, ਆਸਟ੍ਰੇਲੀਆ ਵਿੱਚ ਸ਼ਰਾਬ ਪੀਣ ਦੀਆਂ ਆਦਤਾਂ ਹੌਲੀ-ਹੌਲੀ ਘਟ ਰਹੀਆਂ ਹਨ।