ਮੈਲਬਰਨ : ਆਸਟ੍ਰੇਲੀਆ ਵਿੱਚ ਪਹਿਲੀ ਵਾਰ ਘਰ ਖਰੀਦਣ ਵਾਲਿਆਂ (First Home Buyers) ਲਈ ਸਰਕਾਰ ਦੀ 5% ਡਿਪਾਜ਼ਿਟ ਸਕੀਮ ਨੇ ਵੱਡੀ ਰਾਹਤ ਦਿੱਤੀ ਹੈ। 1 ਅਕਤੂਬਰ ਤੋਂ ਲਾਗੂ ਬਦਲਾਵਾਂ ਤੋਂ ਬਾਅਦ ਕੇਵਲ ਚਾਰ ਮਹੀਨਿਆਂ ਵਿੱਚ 22,900 ਤੋਂ ਵੱਧ ਗਾਰੰਟੀ ਜਾਰੀ ਹੋਈਆਂ ਹਨ, ਜੋ ਪਿਛਲੇ ਸਮੇਂ ਨਾਲੋਂ 75% ਵੱਧ ਹਨ। ਹੁਣ ਇਹ ਸਕੀਮ ਹਰ ਆਮਦਨ ਵਾਲੇ ਲਈ ਖੁੱਲ੍ਹੀ ਹੈ ਅਤੇ ਪ੍ਰਾਪਰਟੀ ਕੀਮਤਾਂ ਦੀ ਹੱਦ ਵੀ ਵਧਾ ਦਿੱਤੀ ਗਈ ਹੈ। ਉਦਾਹਰਨ ਲਈ, ਸਿਡਨੀ ਵਿੱਚ 1.5 ਮਿਲੀਅਨ ਡਾਲਰ ਤੱਕ ਦੇ ਘਰ ਇਸ ਯੋਜਨਾ ਹੇਠ ਆ ਸਕਦੇ ਹਨ।
ਖਰੀਦਦਾਰ ਸਿਰਫ 5% ਡਿਪਾਜ਼ਿਟ ਨਾਲ ਘਰ ਲੈ ਸਕਦੇ ਹਨ ਅਤੇ ਲੈਂਡਰਜ਼ ਮਾਰਟਗੇਜ ਇਨਸ਼ੋਰੈਂਸ ਤੋਂ ਬਚ ਸਕਦੇ ਹਨ ਕਿਉਂਕਿ ਸਰਕਾਰ 15% ਲੋਨ ਦੀ ਗਾਰੰਟੀ ਦਿੰਦੀ ਹੈ। ਇਸ ਸਕੀਮ ਦਾ ਸਭ ਤੋਂ ਵੱਧ ਲਾਭ 30 ਸਾਲ ਤੋਂ ਘੱਟ ਉਮਰ ਦੇ ਲੋਕਾਂ, ਰੀਜਨਲ ਖਰੀਦਦਾਰਾਂ ਅਤੇ ਕੀ ਵਰਕਰਾਂ ਨੇ ਲਿਆ ਹੈ। ਹਾਲਾਂਕਿ, ਅਰਥਸ਼ਾਸਤਰੀਆਂ ਨੇ ਚੇਤਾਵਨੀ ਦਿੱਤੀ ਹੈ ਕਿ ਇਹ ਮੰਗ ਵਧਾਉਣ ਵਾਲੀ ਨੀਤੀ ਘਰਾਂ ਦੀਆਂ ਕੀਮਤਾਂ ਨੂੰ ਹੋਰ ਚੜ੍ਹਾ ਸਕਦੀ ਹੈ।
