ਮੈਲਬਰਨ : ਮਿਸ਼ਿਗਨ ਦੇ ਇੱਕ ਸਿੱਖ ਹਾਈ ਸਕੂਲ ਵਿਦਿਆਰਥੀ ਨੇ AP World History Modern ਕਿਤਾਬ ਵਿੱਚ ਸਿੱਖ ਧਰਮ ਬਾਰੇ ਗਲਤ ਜਾਣਕਾਰੀ ਫੜ ਕੇ ਇਸ ਨੂੰ ਚੁਣੌਤੀ ਦਿੱਤੀ। ਕਿਤਾਬ ਵਿੱਚ ਸਿੱਖੀ ਨੂੰ “ਹਿੰਦੂ ਧਰਮ ਅਤੇ ਇਸਲਾਮ ਦਾ ਮਿਲਾਪ” ਦੱਸਿਆ ਗਿਆ ਸੀ। ਵਿਦਿਆਰਥੀ ਨੇ ਇਹ ਗਲਤੀ ਦਰਸਾ ਕੇ Sikh Coalition ਨਾਲ ਸੰਪਰਕ ਕੀਤਾ। ਇਸ ਸੰਸਥਾ ਨੇ ਵਿਦਵਾਨਾਂ ਅਤੇ ਅਧਿਆਪਕਾਂ ਨਾਲ ਮਿਲ ਕੇ ਸਹੀ ਜਾਣਕਾਰੀ ਤਿਆਰ ਕੀਤੀ। ਹਾਰਵਰਡ ਯੂਨੀਵਰਸਿਟੀ ਦੇ ਹਰਪ੍ਰੀਤ ਸਿੰਘ ਸਮੇਤ ਵਿਦਵਾਨਾਂ ਨੇ ਸਿੱਖੀ ਨੂੰ ਦੁਨੀਆ ਦਾ ਪੰਜਵਾਂ ਸਭ ਤੋਂ ਵੱਡਾ, ਖ਼ੁਦਮੁਖ਼ਤਿਆਰ ਧਰਮ ਵਜੋਂ ਦਰਸਾਉਣ ਲਈ ਸੁਧਾਰ ਸੁਝਾਏ।
ਪ੍ਰਕਾਸ਼ਕ Perfection Learning ਨੇ ਇਹ ਸੁਧਾਰ ਮਨਜ਼ੂਰ ਕਰ ਲਏ ਹਨ ਅਤੇ 2026 ਦੇ ਬਸੰਤ ਵਿੱਚ ਨਵੀਂ ਛਪਾਈ ਵਿੱਚ ਸਹੀ ਜਾਣਕਾਰੀ ਸ਼ਾਮਲ ਕਰਨ ਦਾ ਐਲਾਨ ਕੀਤਾ ਹੈ। ਇਹ ਕਦਮ Sikh Coalition ਦੀ ਉਸ ਮੁਹਿੰਮ ਦਾ ਹਿੱਸਾ ਹੈ ਜੋ ਅਮਰੀਕੀ ਸਕੂਲਾਂ ਵਿੱਚ ਸਿੱਖ ਧਰਮ ਦੀ ਸਹੀ ਸਿੱਖਿਆ ਯਕੀਨੀ ਬਣਾਉਣ ਲਈ ਚੱਲ ਰਹੀ ਹੈ। Sikh Coalition ਦੀ ਸੀਨੀਅਰ ਮੈਨੇਜਰ ਸਵਲੀਨ ਸਿੰਘ ਨੇ ਕਿਹਾ ਕਿ ਇਹ ਸੁਧਾਰ “ਪਸੰਦ ਦਾ ਨਹੀਂ, ਸੱਚ ਅਤੇ ਸਿੱਖਿਆ ਦੀ ਇਮਾਨਦਾਰੀ ਦਾ ਮਾਮਲਾ ਹੈ।” ਇਹ ਜਿੱਤ ਸਿੱਖ ਵਿਦਿਆਰਥੀਆਂ ਅਤੇ ਕਮਿਊਨਿਟੀ ਲਈ ਸਿੱਖਿਆਕ ਨਿਆਂ ਦੀ ਵੱਡੀ ਮਿਸਾਲ ਹੈ।
