ਮੈਲਬਰਨ : ਆਸਟ੍ਰੇਲੀਆ ਦੇ ਸਟੇਟ NSW ’ਚ ਹੁਣ ਮਕਾਨ ਮਾਲਕਾਂ ਆਪਣੇ ਕਿਰਾਏਦਾਰਾਂ ਨੂੰ ਬਗ਼ੈਰ ਕਿਸੇ ਕਾਰਨ ਦੱਸੇ ਮਕਾਨ ਛੱਡਣ ਲਈ ਮਜਬੂਰ ਨਹੀਂ ਕਰ ਸਕਣਗੇ, ਜਿਸ ਨੂੰ ਲੱਖਾਂ ਕਿਰਾਏਦਾਰਾਂ ਲਈ ਵੱਡੀ ਜਿੱਤ ਮੰਨਿਆ ਜਾ ਰਿਹਾ ਹੈ। ਕਈ ਸਾਲਾਂ ਦੀ ਮੰਗ ਤੋਂ ਬਾਅਦ, ਪਾਰਲੀਮੈਂਟ ਵਿੱਚ ਇੱਕ ਇਤਿਹਾਸਕ ਸੋਧ ਬਿੱਲ ਪਾਸ ਕੀਤਾ ਗਿਆ ਹੈ ਜੋ NSW ਵਿੱਚ ਕਿਸੇ ਕਿਰਾਏਦਾਰ ਨੂੰ ਬਿਨਾਂ ਕਿਸੇ ਜਾਇਜ਼ ਕਾਰਨ ਤੋਂ ਬਾਹਰ ਕੱਢਣ ’ਤੇ ਪਾਬੰਦੀ ਲਗਾਉਂਦਾ ਹੈ। ਉਨ੍ਹਾਂ ’ਤੇ ਜੁਰਮਾਨਾ ਲਾਗੂ ਹੋਵੇਗਾ ਜੋ ਲੀਜ਼ ਖਤਮ ਕਰਨ ਲਈ ਵਾਜਬ ਕਾਰਨ ਪ੍ਰਦਾਨ ਨਹੀਂ ਕਰਦੇ ਹਨ। ਇਨ੍ਹਾਂ ਕਾਰਨਾਂ ਵਿੱਚ ਕਿਰਾਏਦਾਰੀ ਸਮਝੌਤਿਆਂ ਦੀ ਉਲੰਘਣਾ, ਜਾਇਦਾਦ ਦੀ ਵਿਕਰੀ, ਮਕਾਨ ਮਾਲਕ ਜਾਂ ਪਰਿਵਾਰ ਦਾ ਆਉਣਾ, ਜਾਂ ਮਹੱਤਵਪੂਰਨ ਨਵੀਨੀਕਰਨ ਸ਼ਾਮਲ ਹਨ। ACT, ਵਿਕਟੋਰੀਆ, ਕੁਈਨਜ਼ਲੈਂਡ, ਸਾਊਥ ਆਸਟ੍ਰੇਲੀਆ ਅਤੇ ਤਸਮਾਨੀਆ ’ਚ ਇਹ ਸੁਧਾਰ ਪਹਿਲਾਂ ਤੋਂ ਹੀ ਲਾਗੂ ਹਨ।
ਹੋਰ ਵੀ ਵੱਡੀਆਂ ਤਬਦੀਲੀਆਂ ਪੇਸ਼
ਰਿਹਾਇਸ਼ੀ ਕਿਰਾਏਦਾਰੀ ਸੋਧ ਬਿੱਲ 2024 ਨੇ NSW ਵਿੱਚ ਕਿਰਾਏ ਦੀ ਪ੍ਰਣਾਲੀ ਵਿੱਚ ਵੱਡੀਆਂ ਤਬਦੀਲੀਆਂ ਪੇਸ਼ ਕੀਤੀਆਂ, ਜਿਸ ਅਨੁਸਾਰ ਹੁਣ NSW ਵਿੱਚ ਕਿਰਾਏਦਾਰਾਂ ਨੂੰ ਪਾਲਤੂ ਜਾਨਵਰ ਰੱਖਣ ਦੀ ਇਜਾਜ਼ਤ ਦੀ ਬੇਨਤੀ ਕਰਨ ਦਾ ਅਧਿਕਾਰ ਵੀ ਹੋਵੇਗਾ ਅਤੇ ਮਕਾਨ ਮਾਲਕ ਸਿਰਫ ਕਾਨੂੰਨੀ ਕਾਰਨਾਂ ਦੀ ਸੂਚੀ ਦੇ ਤਹਿਤ ਇਨਕਾਰ ਕਰ ਸਕਦੇ ਹਨ। ਕਿਰਾਇਆ ਵੀ ਹੁਣ ਲੀਜ਼ ਦੀ ਲੰਬਾਈ ਦੀ ਪਰਵਾਹ ਕੀਤੇ ਬਿਨਾਂ ਹਰ 12 ਮਹੀਨਿਆਂ ਵਿੱਚ ਸਿਰਫ ਇੱਕ ਵਾਰ ਵਧਾਇਆ ਜਾ ਸਕਦਾ ਹੈ, ਅਤੇ ਬੈਕਗ੍ਰਾਉਂਡ ਚੈੱਕ ਫੀਸ ‘ਤੇ ਪਾਬੰਦੀ ਹੋਵੇਗੀ। ਇਹ ਸਾਰੇ ਸੁਧਾਰ ਸੰਭਾਵਤ ਤੌਰ ’ਤੇ 2025 ਦੇ ਸ਼ੁਰੂ ਵਿੱਚ ਲਾਗੂ ਹੋਣਗੇ।
