ਮੈਲਬਰਨ: ਈਰਾਨ ’ਚ ਇੱਕ ਫ਼ੁੱਟਬਾਲ ਮੈਚ ਖੇਡਣ ਗਏ ਮਸ਼ਹੂਰ ਖਿਡਾਰੀ Cristiano Ronaldo ਵਿਰੁਧ ਦੇਸ਼ ਦੇ ਕਈ ਵਕੀਲਾਂ ਨੇ ਸ਼ਿਕਾਇਤ ਦਰਜ ਕਰਵਾ ਦਿਤੀ। ਅਲ ਨਾਸਰ ਲਈ ਖੇਡਣ ਵਾਲੇ ਇਸ ਫ਼ੁਟਬਾਲਰ ਨੇ ਸਤੰਬਰ ਵਿੱਚ ਏਸ਼ੀਅਨ ਚੈਂਪੀਅਨਜ਼ ਲੀਗ ਲਈ ਆਪਣੀ ਟੀਮ ਨਾਲ ਈਰਾਨ ਦੇ ਦੌਰੇ ਦੌਰਾਨ ਈਰਾਨੀ ਚਿੱਤਰਕਾਰ ਫਾਤਿਮਾ ਹਮੀਮੀ ਨਾਲ ਮੁਲਾਕਾਤ ਕੀਤੀ ਸੀ। ਫ਼ਾਤਿਮਾ ਅਪਾਹਜ ਹੈ ਅਤੇ ਰੋਨਾਲਡੋ ਦੀ ਵੱਡੀ ਪ੍ਰਸ਼ੰਸਕ ਹੈ। ਹਮੀਮੀ ਨੇ ਰੋਨਾਲਡੋ ਨੂੰ ਇਕ ਪੇਂਟਿੰਗ ਗਿਫਟ ਕੀਤੀ ਸੀ। ਆਪਣੀ ਮੁਲਾਕਾਤ ਦੀ ਇਹ ਤਸਵੀਰ ਪੁਰਤਗਾਲੀ ਖਿਡਾਰੀ ਨੇ ਸੋਸ਼ਲ ਮੀਡੀਆ ’ਤੇ ਪੋਸਟ ਕੀਤੀ ਸੀ ਜਿਸ ’ਚ ਰੋਨਾਲਡੋ ਪੇਂਟਰ ਨੂੰ ਜੱਫੀ ਪਾਉਂਦੇ ਹੋਏ ਦਿਸ ਰਹੇ ਹਨ।
ਇਸੇ ਤਸਵੀਰ ਨੇ ਈਰਾਨ ਦੇ ਵਕੀਲਾਂ ਦਾ ਧਿਆਨ ਖਿੱਚਿਆ, ਕਿਉਂਕਿ ਦੇਸ਼ ਦੇ ਕਾਨੂੰਨਾਂ ਅਨੁਸਾਰ ਕਿਸੇ ਕੁਆਰੀ ਔਰਤ ਨੂੰ ਜੱਫੀ ਪਾਉਣਾ ਪਾਪ ਹੈ ਅਤੇ ਵਿਭਚਾਰ ਦਾ ਇੱਕ ਰੂਪ ਹੈ। ਈਰਾਨੀ ਅਦਾਲਤ ਨੇ ਵਕੀਲਾਂ ਵੱਲੋਂ ਕੀਤੀ ਸ਼ਿਕਾਇਤ ’ਤੇ ਤੁਰੰਤ ਕਾਰਵਾਈ ਕੀਤੀ ਅਤੇ ਰੋਲਾਲਡੋ ਨੂੰ 99 ਕੌੜਿਆਂ ਦੀ ਸਜ਼ਾ ਸੁਣਾ ਦਿੱਤੀ। ਜੇਕਰ ਰੋਨਾਲਡੋ ਕਦੇ ਵੀ ਈਰਾਨ ਦਾ ਮੁੜ ਦੌਰਾ ਕਰਦਾ ਹੈ ਤਾਂ ਉਸ ਨੂੰ ਗ੍ਰਿਫ਼ਤਾਰ ਕਰ ਕੇ ਇਹ ਸਜ਼ਾ ਦਿੱਤੀ ਜਾਵੇਗੀ।
ਵੈਸੇ ਇਸ ਸਮੇਂ, ਰੋਨਾਲਡੋ ਦੇ ਇਰਾਨ ਵਾਪਸ ਜਾਣ ਦੀ ਸੰਭਾਵਨਾ ਘੱਟ ਹੈ ਕਿਉਂਕਿ ਅਲ ਨਾਸਰ ਨੇੜ ਭਵਿੱਖ ’ਚ ਈਰਾਨ ਵਿੱਚ ਨਹੀਂ ਖੇਡਣ ਵਾਲਾ। ਹਾਲਾਂਕਿ, ਹਾਲਾਤ ਬਦਲ ਸਕਦੇ ਹਨ ਜੇਕਰ ਸਾਊਦੀ ਪ੍ਰੋਫੈਸ਼ਨਲ ਲੀਗ ਦੀ ਟੀਮ ਬਾਅਦ ਵਿੱਚ ਏਸ਼ੀਅਨ ਚੈਂਪੀਅਨਜ਼ ਲੀਗ ਵਿੱਚ ਇੱਕ ਈਰਾਨੀ ਟੀਮ ਦੇ ਵਿਰੁੱਧ ਡਰਾਅ ਖੇਡਦੀ ਹੈ। ਜੇਕਰ ਅਜਿਹਾ ਹੁੰਦਾ ਹੈ, ਤਾਂ ਅਲ ਨਾਸਰ ਨੂੰ ਅਗਲੀ ਵਾਰੀ ਈਰਾਨ ਦੀ ਯਾਤਰਾ ਦੌਰਾਨ ਰੋਨਾਲਡੋ ਨੂੰ ਪਿੱਛੇ ਛੱਡਣ ਲਈ ਮਜਬੂਰ ਹੋਣਾ ਪੈ ਸਕਦਾ ਹੈ।
ਹਾਲਾਂਕਿ, ਇਹ ਦੱਸਿਆ ਗਿਆ ਹੈ ਕਿ ਰੋਨਾਲਡੋ ਸਜ਼ਾ ਤੋਂ ਬਚ ਵੀ ਸਕਦਾ ਹੈ। ਅਜਿਹਾ ਕਰਨ ਲਈ ਰੋਨਾਲਡੋ ਨੂੰ ਆਪਣੇ ਕੰਮਾਂ ਲਈ ਪਛਤਾਵਾ ਦਿਖਾਉਣ ਦੀ ਲੋੜ ਹੋਵੇਗੀ। ਇਸ ਤੋਂ ਇਲਾਵਾ, ਉਸ ਨੂੰ ਸਮੱਸਿਆ ਨੂੰ ਹੱਲ ਕਰਨ ਲਈ ਕਥਿਤ ਤੌਰ ’ਤੇ ਈਰਾਨੀ ਅਧਿਕਾਰੀਆਂ ਤੋਂ ਮੁਆਫੀ ਮੰਗਣੀ ਪਵੇਗੀ। ਇਹ ਵੀ ਦਾਅਵਾ ਕੀਤਾ ਗਿਆ ਹੈ ਕਿ ਜੇਕਰ ਕਿਸੇ ਜੱਜ ਨੂੰ ਕਾਰਵਾਈਆਂ ਸਜ਼ਾਯੋਗ ਨਹੀਂ ਲਗਦੀਆਂ ਹਨ, ਤਾਂ ਵੀ ਰੋਨਾਲਡੋ ਕਿਸੇ ਵੀ ਸਜ਼ਾ ਤੋਂ ਬਚ ਜਾਵੇਗਾ।
