ਮੈਲਬਰਨ : ਆਸਟ੍ਰੇਲੀਆ ਵਿੱਚ ਸਿਹਤ ਖੇਤਰ ਨਾਲ ਜੁੜੇ ਡਾਕਟਰਾਂ ਅਤੇ ਹੋਰ ਪ੍ਰੈਕਟੀਸ਼ਨਰਾਂ ਵਿਰੁੱਧ ਪੁਰਾਣੀਆਂ ਜਿਨਸੀ ਦੁਰਵਿਵਹਾਰ ਦੇ ਮਾਮਲੇ ਹੁਣ ਜਨਤਕ ਕੀਤੇ ਜਾਣਗੇ। ਨਵੇਂ ਕਾਨੂੰਨੀ ਸੁਧਾਰ ਅਨੁਸਾਰ, ਜਦੋਂ ਵੀ ਕਿਸੇ ਸਿਹਤ ਪ੍ਰੋਫੈਸ਼ਨਲ ਵਿਰੁੱਧ ਜਿਨਸੀ ਦੁਰਵਿਵਹਾਰ ਦਾ ਪਤਾ ਲਗਦਾ ਹੈ, ਉਹ ਹਮੇਸ਼ਾ ਲਈ ਰਿਕਾਰਡ ‘ਤੇ ਰਹੇਗਾ। ਪਹਿਲਾਂ ਸਿਰਫ਼ ਸਰਗਰਮ ਕਾਰਵਾਈਆਂ ਹੀ ਜਨਤਕ ਹੁੰਦੀਆਂ ਸਨ, ਜਿਸ ਨਾਲ ਮਰੀਜ਼ ਪੁਰਾਣੀਆਂ ਘਟਨਾਵਾਂ ਤੋਂ ਬੇਖ਼ਬਰ ਰਹਿੰਦੇ ਸਨ।
ਇਹ ਨਵਾਂ ਕਾਨੂੰਨ ਡਾਕਟਰਾਂ, ਨਰਸਾਂ, ਡੈਂਟਿਸਟਾਂ, ਮਨੋਵਿਗਿਆਨੀਆਂ, ਫਾਰਮਾਸਿਸਟਾਂ ਅਤੇ ਫਿਜ਼ਿਓਥੈਰਾਪਿਸਟਾਂ ਸਮੇਤ ਸਾਰੇ ਪ੍ਰੈਕਟੀਸ਼ਨਰਾਂ ‘ਤੇ ਲਾਗੂ ਹੋਵੇਗਾ। ਇਸ ਹਫ਼ਤੇ ਜਾਰੀ ਕੀਤੇ ਗਏ ਰਿਕਾਰਡਾਂ ਵਿੱਚ 107 ਪ੍ਰੈਕਟੀਸ਼ਨਰਾਂ ਦੇ ਨਾਮ ਸਾਹਮਣੇ ਆਏ ਹਨ, ਜਿਨ੍ਹਾਂ ਵਿੱਚੋਂ 21 ਅਜੇ ਵੀ ਪ੍ਰੈਕਟਿਸ ਕਰ ਰਹੇ ਹਨ, ਜਦਕਿ ਬਾਕੀ 86 ਦੀ ਰਜਿਸਟ੍ਰੇਸ਼ਨ ਰੱਦ ਹੋ ਚੁੱਕੀ ਹੈ। ਸਭ ਤੋਂ ਵੱਧ ਕੇਸ ਨਿਊ ਸਾਊਥ ਵੇਲਜ਼ (35) ਵਿੱਚ ਦਰਜ ਕੀਤੇ ਗਏ ਹਨ। ਵਿਕਟੋਰੀਆ ’ਚ 31, ਸਾਊਥ ਆਸਟ੍ਰੇਲੀਆ ’ਚ 16, ਕੁਈਨਜ਼ਲੈਂਡ ’ਚ 14, ਵੈਸਟਰਨ ਆਸਟ੍ਰੇਲੀਆ ’ਚ 7, ਤਸਮਾਨੀਆ ’ਚ 3 ਅਤੇ ਨੌਰਦਰਨ ਟੈਰੀਟਰੀ ’ਚ 1 ਕੇਸ ਦਰਜ ਹੈ।
ਆਸਟ੍ਰੇਲੀਆਈ ਹੈਲਥ ਪ੍ਰੈਕਟੀਸ਼ਨਰ ਰੈਗੂਲੇਸ਼ਨ ਏਜੰਸੀ (AHPRA) ਦੇ ਮੁਖੀ Justin Untersteiner ਨੇ ਕਿਹਾ ਕਿ ਇਹ ਕਦਮ ਮਰੀਜ਼ਾਂ ਨੂੰ ਜਾਣਕਾਰੀ ਦੇ ਕੇ ਸੁਰੱਖਿਆ ਵਧਾਉਂਦਾ ਹੈ। ਉਨ੍ਹਾਂ ਦੇ ਅਨੁਸਾਰ, “ਜਿਨਸੀ ਦੁਰਵਿਵਹਾਰ ਭਰੋਸੇ ਦੀ ਗੰਭੀਰ ਉਲੰਘਣਾ ਹੈ ਜੋ ਮਰੀਜ਼ਾਂ ਅਤੇ ਪੂਰੇ ਸਿਸਟਮ ਲਈ ਤਬਾਹੀਕਾਰ ਸਾਬਤ ਹੁੰਦੀ ਹੈ।”
