ਮੈਲਬਰਨ: ਇਸ ਮਹੀਨੇ ਆਸਟ੍ਰੇਲੀਆ ਅਤੇ ਨਿਊਜ਼ੀਲੈਂਡ ਵਸਦੇ ਪੰਜਾਬੀਆਂ ਲਈ ਆਰਾਮਦਾਇਕ ਅਤੇ ਸਹਿਜ ਸਫ਼ਰ ਦੇ ਇੱਕ ਨਵੇਂ ਯੁੱਗ ਦੀ ਸ਼ੁਰੂਆਤ ਹੋਣ ਜਾ ਰਹੀ ਹੈ। ਫਲਾਈ ਅੰਮ੍ਰਿਤਸਰ ਪਹਿਲ ਦੇ ਗਲੋਬਲ ਕੋਆਰਡੀਨੇਟਰ ਸਮੀਪ ਸਿੰਘ ਗੁਮਟਾਲਾ ਨੇ ਦਸਿਆ ਹੈ ਕਿ ਇਨ੍ਹਾਂ ਦੇਸ਼ਾਂ ਵਿੱਚ ਵਸਦੇ ਪੰਜਾਬੀ ਹੁਣ ਪੰਜਾਬ ਦੇ ਸਭ ਤੋਂ ਵੱਡੇ ਸ੍ਰੀ ਗੁਰੂ ਰਾਮਦਾਸ ਜੀ ਅੰਤਰਰਾਸ਼ਟਰੀ ਹਵਾਈ ਅੱਡੇ ਤਕ ਸਿੱਧੀ ਉਡਾਣ (Direct Flight) ਭਰ ਸਕਣਗੇ। ਅੰਮ੍ਰਿਤਸਰ ਲਈ ਸਿੱਧੀਆਂ ਉਡਾਣਾਂ ਦਾ ਇਹ ਸੁਨਹਿਰੀ ਮੌਕਾ ਮਲੇਸ਼ੀਆ ਦੀਆਂ ਵੱਡੀਆਂ ਏਅਰਲਾਈਨਾਂ (ਬਾਟਿਕ ਏਅਰ, ਏਅਰ ਏਸ਼ੀਆ) ਵੱਲੋਂ ਉਡਾਣਾਂ ਦਾ ਸੰਚਾਲਨ ਕਰਨ ਨਾਲ ਸੰਭਵ ਹੋਇਆ ਹੈ।
8 ਨਵੰਬਰ ਤੋਂ ਮਲੇਸ਼ੀਆ ਦੀ ਪ੍ਰਮੁੱਖ ਏਅਰਲਾਈਨ ਆਪਣੇ ਕੇਂਦਰ ਕੁਆਲਾਲੰਪੁਰ ਤੋਂ ਪਵਿੱਤਰ ਸ਼ਹਿਰ ਅੰਮ੍ਰਿਤਸਰ ਲਈ ਦੋ-ਹਫਤਾਵਾਰੀ ਸਿੱਧੀਆਂ ਉਡਾਣਾਂ ਸ਼ੁਰੂ ਕਰੇਗੀ, ਜੋ ਪੰਜਾਬ ਨੂੰ ਆਸਟ੍ਰੇਲੀਆ, ਨਿਊਜ਼ੀਲੈਂਡ, ਥਾਈਲੈਂਡ, ਇੰਡੋਨੇਸ਼ੀਆ, ਹਾਂਗਕਾਂਗ, ਫਿਲੀਪੀਨਜ਼ ਅਤੇ ਵੀਅਤਨਾਮ ਨਾਲ ਜੋੜ ਦੇਵੇਗੀ। ਇਹ ਇੱਕ ਬਹੁਤ ਹੀ ਸਹੂਲਤਜਨਕ ਸਿੱਧਾ ਸਫ਼ਰ ਪ੍ਰਦਾਨ ਕਰੇਗੀ। ਇਨ੍ਹਾਂ ਸ਼ਹਿਰਾਂ ਵਿੱਚ ਮੈਲਬੋਰਨ, ਸਿਡਨੀ, ਐਡੀਲੇਡ, ਬ੍ਰਿਸਬੇਨ, ਆਕਲੈਂਡ, ਬੈਂਕਾਕ, ਫੁਕੇਟ, ਬਾਲੀ, ਹੋ ਚੀ ਮਿਨਹ ਸਿਟੀ, ਮਨੀਲਾ ਅਤੇ ਹੋਰ ਸ਼ਾਮਲ ਹਨ। ਇਹ ਅੰਮ੍ਰਿਤਸਰ ਲਈ ਸੰਚਾਲਨ ਸ਼ੁਰੂ ਕਰਨ ਵਾਲੀ ਤੀਜੀ ਮਲੇਸ਼ੀਅਨ ਏਅਰਲਾਈਨ ਹੋਵੇਗੀ ਅਤੇ ਹਰ ਹਫ਼ਤੇ ਕੁੱਲ 700 ਲੋਕ ਸਫ਼ਰ ਕਰ ਸਕਣਗੇ। ਏਅਰਲਾਈਨ ਵਨ ਵਰਲਡ ਅਲਾਇੰਸ ਦਾ ਵੀ ਹਿੱਸਾ ਹੈ, ਜੋ ਕਿ ਆਸਟ੍ਰੇਲੀਆ ਦੇ ਕੈਂਟਾਸ ਸਮੇਤ ਕਈ ਦੇਸ਼ਾਂ ਦੀਆਂ ਏਅਰਲਾਈਨਾਂ ਨਾਲ ਕੋਡਸ਼ੇਅਰ ਕਰਦੀ ਹੈ ਅਤੇ ਕਈ ਹੋਰ ਸ਼ਹਿਰਾਂ ਲਈ ਅੱਗੇ ਕਨੈਕਸ਼ਨ ਦੀ ਪੇਸ਼ਕਸ਼ ਕਰਦੀ ਹੈ। ਆਸਟ੍ਰੇਲੀਆ ਅਤੇ ਨਿਊਜ਼ੀਲੈਂਡ ਦੇ ਸ਼ਹਿਰਾਂ ਤਕ ਸਫ਼ਰ ਸਿਰਫ 15-17 ਘੰਟਿਆਂ ਵਿੱਚ ਪੂਰੀ ਕੀਤਾ ਜਾ ਸਕਦਾ ਹੈ।
ਸਿੰਗਾਪੁਰ ਏਅਰਲਾਈਨਜ਼ ਵੀ ਬਦਲਣ ਜਾ ਰਿਹੈ ਸਮਾਂ-ਸਾਰਣੀ
ਸਹੂਲਤਜਨਕ ਕੁਨੈਕਟੀਵਿਟੀ ਨੂੰ ਹੋਰ ਬਿਹਤਰ ਬਣਾਉਣ ਲਈ, ਸਿੰਗਾਪੁਰ ਏਅਰਲਾਈਨਜ਼ ਸਕੂਟ ਵੀ ਨਵੰਬਰ ਤੋਂ ਲੈ ਕੇ ਮਾਰਚ ਦੇ ਅਖੀਰ ਤੱਕ ਸਰਦੀਆਂ ਦੇ ਮੌਸਮ ਦੌਰਾਨ ਆਪਣਾ ਸਮਾਂ-ਸਾਰਣੀ ਬਦਲ ਰਹੀ ਹੈ। ਇਹ ਫਲਾਈਟ ਹੁਣ ਸਵੇਰੇ 9:05 ਵਜੇ ਅੰਮ੍ਰਿਤਸਰ ਪਹੁੰਚੇਗੀ ਅਤੇ ਸਵੇਰੇ 10:30 ਵਜੇ ਸਿੰਗਾਪੁਰ ਲਈ ਰਵਾਨਾ ਹੋਵੇਗੀ। ਏਅਰਲਾਈਨ ਇਸ ਰੂਟ ’ਤੇ ਆਪਣੇ 335- ਜਾਂ 375-ਸੀਟ ਵਾਲੇ ਬੋਇੰਗ 787 ਡ੍ਰੀਮਲਾਈਨਰ ਏਅਰਕ੍ਰਾਫਟ ਦਾ ਸੰਚਾਲਨ ਕਰਦੀ ਹੈ, ਪ੍ਰਤੀ ਹਫਤੇ ਕੁੱਲ ਲਗਭਗ 3,430 ਸੀਟਾਂ ਦੀ ਪੇਸ਼ਕਸ਼ ਕਰਦੀ ਹੈ।
