ਮੈਲਬਰਨ: ਨਿਊਜ਼ੀਲੈਂਡ ’ਚ ਦਿਨ-ਬ-ਦਿਨ ਵਧਦੀ ਮਹਿੰਗਾਈ ਕਾਰਨ ਲੋਕਾਂ ਨੇ ਰੈਸਟੋਰੈਂਟਾਂ ’ਚ ਜਾਣਾ ਘੱਟ ਕਰ ਦਿੱਤਾ ਹੈ। ਮਸ਼ਹੂਰ ਰੈਸਟੋਰੈਂਟ ਵੀ ਇਨ੍ਹੀਂ ਦਿਨੀਂ ਖ਼ਾਲੀ ਨਜ਼ਰ ਆ ਰਹੇ ਹਨ। ਰੋਟੋਰੂਆ (Rotorua) ਦੇ ਪੁਰਸਕਾਰ ਜੇਤੂ ਰੈਸਟੋਰੈਂਟ ‘ਦ ਇੰਡੀਅਨ ਸਟਾਰ’ ਦੇ ਗਾਹਕਾਂ ਦੀ ਗਿਣਤੀ ’ਚ ਕਾਫੀ ਗਿਰਾਵਟ ਆਈ ਹੈ। ਕਦੇ ਰੈਸਟੋਰੈਂਟ ਵਿੱਚ 130 ਲੋਕਾਂ ਦੀ ਆਪਣੀ ਪੂਰੀ ਸਮਰੱਥਾ ਨਾਲ ਭਰਿਆ ਰਿਹੰਦਾ ਸੀ, ਪਰ ਹੁਣ ਇੱਥੇ 30 ਕੁ ਲੋਕ ਵੀ ਆ ਜਾਣ ਤਾਂ ਇਹ ਖੁਸ਼ਕਿਸਮਤ ਦੀ ਗੱਲ ਹੁੰਦੀ ਹੈ। ਰੋਟੋਰੂਆ ਦੇ ਹੋਰ ਰੈਸਟੋਰੈਂਟਾਂ ਦੇ ਨਾਲ ਇਹ ਵੀ ਭੋਜਨ ਦੀਆਂ ਵਧੀਆਂ ਕੀਮਤਾਂ, ਤਨਖਾਹਾਂ, ਓਵਰਹੈੱਡ ਅਤੇ ਗਾਹਕਾਂ ਵਿੱਚ ਭਾਰੀ ਗਿਰਾਵਟ ਨਾਲ ਜੂਝ ਰਿਹਾ ਹੈ। ਮਾਲਕ ਰੇ ਸਿੰਘ ਨੂੰ ਸਟਾਫ ਦੀ ਗਿਣਤੀ 15 ਤੋਂ ਘਟਾ ਕੇ 11 ਕਰਨੀ ਪਈ ਹੈ।
ਜ਼ਿਕਰਯੋਗ ਹੈ ਕਿ ਨਿਊਜ਼ੀਲੈਂਡ ’ਚ ਪਿਛਲੇ 12 ਮਹੀਨਿਆਂ ਦੌਰਾਨ ਭੋਜਨ ਦੀਆਂ ਕੀਮਤਾਂ ਵਿੱਚ 8٪ ਦਾ ਵਾਧਾ ਹੋਇਆ ਹੈ, ਫਲਾਂ ਅਤੇ ਸਬਜ਼ੀਆਂ ਵਿੱਚ 22٪ ਅਤੇ ਮੀਟ, ਪੋਲਟਰੀ ਅਤੇ ਮੱਛੀ ਵਿੱਚ 7٪ ਦਾ ਵਾਧਾ ਹੋਇਆ ਹੈ, ਜੋ ਚਾਰ ਦਹਾਕਿਆਂ ਵਿੱਚ ਸਭ ਤੋਂ ਤੇਜ਼ ਵਾਧਾ ਹੈ। ਇਸ ਬਾਰੇ ਰੈਸਟੋਰੈਂਟ ਐਸੋਸੀਏਸ਼ਨ ਦੀ ਮੁੱਖ ਕਾਰਜਕਾਰੀ ਮੈਰੀਸਾ ਬਿਡੋਇਸ ਨੇ ਕਿਹਾ ਕਿ ਚੰਗੇ ਕਾਰੋਬਾਰ ਦੌਰਾਨ ਵੀ ਉਦਯੋਗ ਵਿਚ ਮੁਨਾਫਾ ਬਹੁਤ ਘੱਟ ਸੀ, ਜੋ ਆਮ ਤੌਰ ’ਤੇ ਸਿਰਫ 2-4٪ ਤੱਕ ਰਹਿੰਦਾ ਸੀ।
ਇੱਕ ਸਰਵੇਖਣ ਤੋਂ ਪਤਾ ਲੱਗਿਆ ਹੈ ਕਿ ਪਿਛਲੇ ਸਾਲ ਦੀ ਇਸੇ ਮਿਆਦ ਦੇ ਮੁਕਾਬਲੇ ਕੰਪਨੀ ਦੇ ਬੰਦ ਹੋਣ ’ਚ 40٪ ਦਾ ਵਾਧਾ ਹੋਇਆ ਸੀ। ਇਸ ਵਿਚ ਇਹ ਵੀ ਪਾਇਆ ਗਿਆ ਕਿ ਸਰਵੇਖਣ ਵਿਚ ਸ਼ਾਮਲ ਨਿਊਜ਼ੀਲੈਂਡ ਦੇ 70 ਫੀਸਦੀ ਕਾਰੋਬਾਰਾਂ ਦਾ ਮੰਨਣਾ ਹੈ ਕਿ ਅਗਲੇ 12 ਮਹੀਨੇ ਹੋਰ ਵੀ ਮੁਸ਼ਕਲ ਹੋਣ ਜਾ ਰਹੇ ਹਨ।
ਰੋਟੋਰੂਆ ਵਿਚ ਛੇ ਰੈਸਟੋਰੈਂਟਾਂ ਅਤੇ ਇਕ ਕੈਫੇ ਦੇ ਮਾਲਕ ਦੀਪਕ ਕੁੰਡਲ ਨੇ ਵੀ ਕਿਹਾ ਕਿ ਖਾਣ-ਪੀਣ ਦੀਆਂ ਕੀਮਤਾਂ ਵਧ ਗਈਆਂ ਹਨ। ਉਨ੍ਹਾਂ ਨੇ ਇਹ ਵੀ ਦੱਸਿਆ ਕਿ ਹਾਲਾਂਕਿ ਉਨ੍ਹਾਂ ਨੂੰ ਸਟਾਫ ਦੀ ਛਾਂਟੀ ਨਹੀਂ ਕਰਨੀ ਪਈ ਹੈ, ਪਰ ਉਨ੍ਹਾਂ ਦੇ ਕੰਮ ਦੇ ਘੰਟੇ ਘਟਾਉਣੇ ਪਏ ਹਨ। ਰੋਟੋਰੂਆ ਦੇ ਰੈਸਟੋਰੈਂਟ ਆਮਦਨੀ ਲਈ ਸੈਰ-ਸਪਾਟੇ ’ਤੇ ਬਹੁਤ ਜ਼ਿਆਦਾ ਨਿਰਭਰ ਕਰਦੇ ਸਨ, ਖ਼ਾਸਕਰ ਆਕਲੈਂਡ ਦੇ ਸੈਲਾਨੀ। ਸਰਦੀਆਂ ਦੇ ਮੌਸਮ ਅਤੇ ਇਸ ਸਾਲ ਕਾਨਫਰੰਸਾਂ ਦੀ ਘਾਟ ਕਾਰਨ ਕਾਰੋਬਾਰ ਮੰਦਾ ਰਿਹਾ।
ਟੌਰੰਗਾ ਦੇ ਕਰੂਜ਼ ਸਮੁੰਦਰੀ ਜਹਾਜ਼ ਹੀ ਗਾਹਕਾਂ ਦੀ ਗਿਣਤੀ ਨੂੰ ਵਧਾ ਰਹੇ ਸਨ, ਅਕਤੂਬਰ ਦੇ ਅੱਧ ਅਤੇ ਅਪ੍ਰੈਲ 2024 ਦੇ ਅੱਧ ਦੇ ਵਿਚਕਾਰ 100 ਤੋਂ ਵੱਧ ਕਰੂਜ਼ ਸਮੁੰਦਰੀ ਜਹਾਜ਼ਾਂ ਦਾ ਦੌਰਾ ਕਰਨ ਲਈ ਤਿਆਰ ਹਨ। ਰੇ ਸਿੰਘ ਦਾ ਮੰਨਣਾ ਹੈ ਕਿ ਪਿਛਲੇ ਕੁਝ ਮਹੀਨਿਆਂ ’ਚ ਕਾਰੋਬਾਰ ’ਚ ਥੋੜ੍ਹਾ ਸੁਧਾਰ ਹੋਇਆ ਹੈ ਪਰ ਉਹ ਵਿਦੇਸ਼ੀ ਅਤੇ ਘਰੇਲੂ ਸੈਲਾਨੀਆਂ ਨੂੰ ਵਾਪਸ ਆਉਣ ਦੀ ਉਮੀਦ ਕਰ ਰਹੇ ਹਨ, ਸਥਾਨਕ ਲੋਕ ਅਜੇ ਵੀ ਰੈਸਟੋਰੈਂਟਾਂ ’ਚ ਬਹੁਤ ਘੱਟ ਜਾ ਰਹੇ ਹਨ।