ਛੋਟੇ ਸ਼ਹਿਰਾਂ ਦੇ ਲੋਕ ਵੱਡੇ ਸ਼ਹਿਰਾਂ ਨਾਲੋਂ ਵੱਧ ਖੁਸ਼ — Australian Unity Wellbeing Index ਦੇ ਨਤੀਜਿਆਂ ਨੇ ਕੀਤਾ ਸੋਚਣ ਲਈ ਮਜਬੂਰ!

ਮੈਲਬਰਨ : ਆਸਟ੍ਰੇਲੀਆ ਯੂਨਿਟੀ ਅਤੇ ਡੀਕਿਨ ਯੂਨੀਵਰਸਿਟੀ ਵੱਲੋਂ ਜਾਰੀ 25ਵੇਂ Australian Unity Wellbeing Index ਨੇ ਦਰਸਾਇਆ ਹੈ ਕਿ ਆਸਟ੍ਰੇਲੀਆ ਦੇ ਛੋਟੇ ਸ਼ਹਿਰਾਂ ਅਤੇ ਖੇਤਰੀ ਇਲਾਕਿਆਂ ਵਿੱਚ ਰਹਿਣ ਵਾਲੇ ਲੋਕ ਵੱਡੇ ਸ਼ਹਿਰਾਂ ਨਾਲੋਂ ਕਾਫ਼ੀ ਵੱਧ ਸੰਤੁਸ਼ਟ ਅਤੇ ਖੁਸ਼ ਹਨ। ਸਰਵੇਖਣ ਵਿੱਚ ਲਗਭਗ 90 ਹਜ਼ਾਰ ਆਸਟ੍ਰੇਲੀਆਈਆਂ ਦੀ ਰਾਏ ਸ਼ਾਮਲ ਕੀਤੀ ਗਈ।

ਰਿਪੋਰਟ ਮੁਤਾਬਕ, Bendigo, Wagga Wagga, Toowoomba, Ballarat, Shepperton, Dubbo ਅਤੇ Launceston ਵਰਗੇ ਦਰਮਿਆਨੇ ਆਕਾਰ ਦੇ ਸ਼ਹਿਰਾਂ ਦੇ ਨਿਵਾਸੀਆਂ ਨੇ ਆਪਣੀ ਜ਼ਿੰਦਗੀ, ਰਿਸ਼ਤਿਆਂ ਅਤੇ ਕਮਿਊਨਟੀ ਨਾਲ ਜੁੜਾਅ ਨੂੰ “ਉੱਚ ਦਰਜੇ ਦੀ ਖੁਸ਼ਹਾਲੀ” ਵਜੋਂ ਦਰਸਾਇਆ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਛੋਟੀ ਕਮਿਊਨਟੀ, ਘੱਟ ਟ੍ਰੈਫਿਕ, ਕੁਦਰਤੀ ਵਾਤਾਵਰਣ ਅਤੇ ਬਿਹਤਰ ਕੰਮ–ਜੀਵਨ ਸੰਤੁਲਨ ਨੇ ਉਨ੍ਹਾਂ ਦੀ ਜੀਵਨ ਗੁਣਵੱਤਾ ’ਚ ਸੁਧਾਰ ਕੀਤਾ ਹੈ।

ਵਿਦਵਾਨਾਂ ਅਨੁਸਾਰ, ਵੱਡੇ ਸ਼ਹਿਰਾਂ — ਜਿਵੇਂ Sydney, Melbourne ਅਤੇ Brisbane — ਦੇ ਲੋਕਾਂ ਵਿੱਚ ਮਹਿੰਗਾਈ, ਹਾਉਸਿੰਗ ਕ੍ਰਾਈਸਿਸ, ਅਤੇ ਕੰਮ ਦਾ ਦਬਾਅ ਵਧਣ ਕਾਰਨ ਖੁਸ਼ੀ ਦੇ ਅੰਕ ਕਾਫ਼ੀ ਘੱਟ ਰਹੇ ਹਨ।

ਰਿਪੋਰਟ ਦਾ ਨਿਚੋੜ ਹੈ ਕਿ “ਆਸਟ੍ਰੇਲੀਆ ਦੀ ਅਸਲੀ ਖੁਸ਼ਹਾਲੀ ਸਿਰਫ਼ GDP ਜਾਂ ਆਰਥਿਕ ਵਾਧੇ ਵਿੱਚ ਨਹੀਂ, ਸਗੋਂ ਛੋਟੀਆਂ ਕਮਿਊਨਟੀਜ਼ ਦੇ ਜੀਵਨ ਸੰਤੁਲਨ ਅਤੇ ਆਪਸੀ ਸਬੰਧਾਂ ਵਿੱਚ ਵੱਸਦੀ ਹੈ।”