ਮੈਲਬਰਨ : ਏਅਰਲਾਈਨਜ਼ ਵਿਰੁਧ ਸਰਕਾਰ ਦੀ ਚਿਰਉਡੀਕਵੀਂ ਕਾਰਵਾਈ ਦੇ ਤਹਿਤ ਆਸਟ੍ਰੇਲੀਆ ਦੇ ਲੋਕ ਹੁਣ ਕੈਂਸਲ ਕੀਤੀਆਂ ਗਈਆਂ ਜਾਂ ਅਣਉਚਿਤ ਤੌਰ ’ਤੇ ਲੇਟ ਹੋਈਆਂ ਉਡਾਣਾਂ ਲਈ ਨਕਦ ਰਿਫੰਡ ਪ੍ਰਾਪਤ ਕਰਨ ਦੇ ਯੋਗ ਹੋਣਗੇ। ਆਸਟ੍ਰੇਲੀਆ ਸਰਕਾਰ ਨੇ ਹਵਾਬਾਜ਼ੀ ’ਤੇ ਇਕ ਵ੍ਹਾਈਟ ਪੇਪਰ ਜਾਰੀ ਕੀਤਾ ਹੈ, ਜਿਸ ਦਾ ਉਦੇਸ਼ ਉਦਯੋਗ ਵਿਚ ਮੁਕਾਬਲੇਬਾਜ਼ੀ ਅਤੇ ਪਾਰਦਰਸ਼ਤਾ ਵਧਾਉਣਾ ਹੈ। ਉਮੀਦ ਕੀਤੀ ਜਾ ਰਹੀ ਹੈ ਕਿ ਵਧਦੀ ਲਾਗਤ ਅਤੇ ਦੋ ਏਅਰਲਾਈਨਾਂ ਦੇ ਬੰਦ ਹੋ ਜਾਣ ਤੋਂ ਬਾਅਦ ਉਡਾਣਾਂ ’ਚ ਸੁਧਾਰ ਹੋ ਸਕੇਗਾ।
ਇਹ ਇਕ ਨਵਾਂ ‘ਚਾਰਟਰ ਆਫ ਰਾਈਟਸ’ ਪੇਸ਼ ਕਰੇਗਾ, ਜਿਸ ਨਾਲ ਏਅਰਲਾਈਨ ਗਾਹਕਾਂ ਨੂੰ ਉਨ੍ਹਾਂ ਉਡਾਣਾਂ ਲਈ ਰਿਫੰਡ ਕਰਨ ਦਾ ਅਧਿਕਾਰ ਮਿਲੇਗਾ ਜੋ ਰੁਕਾਵਟ, ਰੱਦ ਹੋਣ ਜਾਂ ਗ਼ੈਰਜ਼ਰੂਰੀ ਤੌਰ ’ਤੇ ਦੇਰੀ ਨਾਲ ਚੱਲਦੀਆਂ ਹਨ। ਟਰਾਂਸਪੋਰਟ ਮੰਤਰੀ ਕੈਥਰੀਨ ਕਿੰਗ ਕਿਹਾ ਕਿ ਏਅਰਲਾਈਨਾਂ ਅਕਸਰ ਆਸਟ੍ਰੇਲੀਆਈ ਲੋਕਾਂ ਨਾਲ ਨਿਰਪੱਖ ਵਿਵਹਾਰ ਨਹੀਂ ਕਰਦੀਆਂ।
ਕੈਥਰੀਨ ਕਿੰਗ ਵੱਲੋਂ ਪੇਸ਼ ਵਾਈਟ ਪੇਪਰ ’ਚ ਵੱਡੇ ਹਵਾਈ ਅੱਡਿਆਂ ’ਤੇ ਏਅਰਲਾਈਨਾਂ ਵੱਲੋਂ ਉਡਾਣ ਭਰਨ ਅਤੇ ਉਤਰਨ ਦੇ ਸਲਾਟਾਂ ਦੀ ਦੁਰਵਰਤੋਂ ਨੂੰ ਦੂਰ ਕਰਨ ਦੇ ਨਾਲ-ਨਾਲ ਹਵਾਈ ਅੱਡਿਆਂ ਅਤੇ ਏਅਰਲਾਈਨਾਂ ਵਿਚਾਲੇ ਕੀਮਤਾਂ ਦੀ ਗੱਲਬਾਤ ਵਿਚ ਤਬਦੀਲੀਆਂ ਨੂੰ ਦੂਰ ਕਰਨ ਲਈ ਸੁਧਾਰਾਂ ਦਾ ਪ੍ਰਸਤਾਵ ਹੈ। ਬਾਜ਼ਾਰ ਵਿਚ Qantas ਦੇ ਦਬਦਬੇ ਦੀ ਆਲੋਚਨਾ ਤੋਂ ਬਾਅਦ ਸਰਕਾਰ ਇਸ ਗੱਲ ਦੀ ਵੀ ਸਮੀਖਿਆ ਕਰਨ ਦੀ ਯੋਜਨਾ ਬਣਾ ਰਹੀ ਹੈ ਕਿ ਸੰਸਦੀ ਅਧਿਕਾਰੀ ਕਿਸ ਏਅਰਲਾਈਨ ਨਾਲ ਯਾਤਰਾ ਕਰਦੇ ਹਨ।
