ਮੈਲਬਰਨ: ਆਸਟ੍ਰੇਲੀਆ ਦੇ ਵਪਾਰ ਮੰਤਰੀ ਡੌਨ ਫੈਰੇਲ ਨੇ ਕਿਹਾ ਹੈ ਕਿ ਆਸਟ੍ਰੇਲੀਆ ਅਤੇ ਯੂਰਪੀਅਨ ਯੂਨੀਅਨ (EU) ਵਿਚਕਾਰ ਵਪਾਰਕ ਸੌਦੇ ਬਾਰੇ ਇੱਕ ਗੱਲਬਾਤ (Trade talks) ਸਿਰੇ ਨਹੀਂ ਚੜ੍ਹ ਸਕੀ। ਆਸਟਰੇਲੀਅਨ ਮੀਟ ਲਈ ਬਿਹਤਰ ਪਹੁੰਚ ਅਤੇ ਯੂਰਪੀਅਨ ਯੂਨੀਅਨ ਦੇ ਸਮਾਨ ਲਈ ਸੁਰੱਖਿਆ ਦੋਹਾਂ ਧਿਰਾਂ ਵਿਚਕਾਰ ਜਾਪਾਨ ’ਚ ਇੱਕ ਜੀ 7 ਮੀਟਿੰਗ ਦੇ ਦੌਰਾਨ ਹੋਈ ਗੱਲਬਾਤ ’ਚ ਇੱਕ ਵੱਡੀ ਰੁਕਾਵਟ ਸਾਬਤ ਹੋਈ।
ਫੈਰੇਲ ਦੇ ਸੋਮਵਾਰ ਨੂੰ ਯੂਰਪੀਅਨ ਯੂਨੀਅਨ ਦੇ ਵਪਾਰ ਅਤੇ ਖੇਤੀਬਾੜੀ ਮੰਤਰੀਆਂ ਨਾਲ ਇੱਕ ਸੌਦੇ ਨੂੰ ਅੰਤਿਮ ਰੂਪ ਦੇਣ ਲਈ ਮੰਤਰੀ ਪੱਧਰੀ ਗੱਲਬਾਤ ਵਿੱਚ ਸ਼ਾਮਲ ਹੋਣ ਦੀ ਉਮੀਦ ਸੀ ਪਰ ਸ਼ੁਰੂਆਤੀ ਗੱਲਬਾਤ ਸਮਝੌਤੇ ਨਾ ਬਣ ਸਕਣ ਕਾਰਨ ਉਹ ਬੈਠਕ ’ਚੋਂ ਬਾਹਰ ਹੋ ਗਏ।ਫੈਰੇਲ ਨੇ ਕਿਹਾ, ‘‘ਗੱਲਬਾਤ ਜਾਰੀ ਰਹੇਗੀ, ਅਤੇ ਮੈਨੂੰ ਉਮੀਦ ਹੈ ਕਿ ਇੱਕ ਦਿਨ ਅਸੀਂ ਇੱਕ ਸੌਦੇ ’ਤੇ ਦਸਤਖਤ ਕਰਾਂਗੇ ਜੋ ਆਸਟਰੇਲੀਆ ਅਤੇ ਸਾਡੇ ਯੂਰਪੀਅਨ ਦੋਸਤਾਂ ਦੋਵਾਂ ਨੂੰ ਲਾਭ ਪਹੁੰਚਾਏਗਾ।’’
ਖੇਤੀਬਾੜੀ ਉਤਪਾਦਾਂ ’ਤੇ ਪਿਆ Trade talks ’ਚ ਰੇੜਕਾ
ਈ.ਯੂ. ਦੇ ਬੁਲਾਰੇ ਨੇ ਕਿਹਾ ਕਿ ਉਨ੍ਹਾਂ ਦਾ ਕਮਿਸ਼ਨ ਗੱਲਬਾਤ ਜਾਰੀ ਰੱਖਣ ਲਈ ਤਿਆਰ ਹੈ। ਬੁਲਾਰੇ ਨੇ ਕਿਹਾ, ‘‘ਆਸ਼ਾ ਹੈ ਸੌਦਾ ਛੇਤੀ ਹੀ ਕਰ ਲਿਆ ਜਾਵੇਗਾ। ਭਾਵੇਂ ਓਸਾਕਾ ’ਚ ਮੰਤਰੀ ਪੱਧਰੀ ਵਿਚਾਰ-ਵਟਾਂਦਰੇ ਵਿੱਚ ਉਹੀ ਤਰੱਕੀ ਨਹੀਂ ਦਿਖਾਈ ਦਿੱਤੀ।’’ ਉਨ੍ਹਾਂ ਕਿਹਾ, ‘‘ਆਸਟਰੇਲੀਅਨ ਧਿਰ ਨੇ ਖੇਤੀਬਾੜੀ ਦੀਆਂ ਮੰਗਾਂ ਨੂੰ ਦੁਬਾਰਾ ਪੇਸ਼ ਕੀਤਾ ਜੋ ਹਾਲ ਹੀ ਵਿੱਚ ਹੋਈ ਗੱਲਬਾਤ ਅਤੇ ਸੀਨੀਅਰ ਅਧਿਕਾਰੀਆਂ ਵਿਚਕਾਰ ਹੋਈ ਪ੍ਰਗਤੀ ਨੂੰ ਨਹੀਂ ਦਰਸਾਉਂਦੀਆਂ।’’
ਜੁਲਾਈ ਵਿੱਚ ਵੀ ਗੱਲਬਾਤ ਟੁੱਟ ਗਈ ਜਦੋਂ ਆਸਟ੍ਰੇਲੀਆ ਗੱਲਬਾਤ ਤੋਂ ਦੂਰ ਹੋ ਗਿਆ ਅਤੇ ਦਾਅਵਾ ਕੀਤਾ ਕਿ ਇਸ ਦੇ ਫਾਰਮ ਸੈਕਟਰ ਨੂੰ ਯੂਰਪੀਅਨ ਬਾਜ਼ਾਰਾਂ ਤੱਕ ਲੋੜੀਂਦੀ ਪਹੁੰਚ ਨਹੀਂ ਮਿਲੇਗੀ। ਫੈਡਰਲ ਸਰਕਾਰ, ਨੈਸ਼ਨਲ ਫਾਰਮਰਜ਼ ਫੈਡਰੇਸ਼ਨ ਅਤੇ ਹੋਰ ਉਦਯੋਗ ਸਮੂਹਾਂ ਦੇ ਸਹਿਯੋਗ ਨਾਲ, ਗੱਲਬਾਤ ਕਰਦੀ ਰਹੀ।
