ਮੈਲਬਰਨ: ਇਕ ਨਵੇਂ ਸਰਵੇਖਣ ਨੇ ਇਹ ਖੁਲਾਸਾ ਕੀਤਾ ਹੈ ਕਿ ਸਿਖਿਆ ਪ੍ਰਾਪਤ ਕਰਨ ਲਈ ਆਸਟ੍ਰੇਲੀਆ ਦੁਨੀਆ ਭਰ ਦੇ ਵਿਦਿਆਰਥੀਆਂ ਲਈ ਦੂਜਾ ਸਭ ਤੋਂ ਪਸੰਦੀਦਾ ਮੁਲਕ ਬਣ ਗਿਆ ਹੈ ਅਤੇ ਇਹ ਕੈਨੇਡਾ ਤੋਂ ਥੋੜ੍ਹਾ ਹੀ ਪਿੱਛੇ ਹੈ। ਗਲੋਬਲ ਐਜੂਕੇਸ਼ਨ ਸਪੈਸ਼ਲਿਸਟ ਆਈ.ਡੀ.ਪੀ. ਐਜੂਕੇਸ਼ਨ ਵੱਲੋਂ ਕਰਵਾਏ ਗਏ ‘ਐਮਰਜਿੰਗ ਫਿਊਚਰਜ਼ 4 ਸਰਵੇਖਣ’ ਨੇ ਦਿਖਾਇਆ ਹੈ ਕਿ ਸਰਵੇਖਣ ਕੀਤੇ ਗਏ 10,000 ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਵਿੱਚੋਂ ਇੱਕ ਚੌਥਾਈ ਨੇ ਆਸਟ੍ਰੇਲੀਆ ਨੂੰ ਅਧਿਐਨ ਲਈ ਪਹਿਲੇ ਪਸੰਦੀਦਾ ਸਥਾਨ ਵਜੋਂ ਚੁਣਿਆ।
ਯੂਨਾਈਟਿਡ ਕਿੰਗਡਮ (UK) 22 ਫ਼ੀ ਸਦੀ ਦੇ ਨਾਲ ਆਸਟਰੇਲੀਆ ਅਤੇ ਕੈਨੇਡਾ ਦੋਵਾਂ ਤੋਂ ਪਿੱਛੇ ਰਿਹਾ, ਜਦਕਿ ਅਮਰੀਕਾ ਸਿਰਫ 19 ਫ਼ੀ ਸਦੀ ਵਿਦਿਆਰਥੀਆਂ ਦੀ ਪਸੰਦ ਸੀ। ਸਭ ਤੋਂ ਵੱਧ ਨੇਪਾਲ, ਵੀਅਤਨਾਮ ਅਤੇ ਇੰਡੋਨੇਸ਼ੀਆ ਦੇ ਵਿਦਿਆਰਥੀਆਂ ਨੇ ਅਧਿਐਨ ਲਈ ਆਸਟ੍ਰੇਲੀਆ ਨੂੰ ਉਨ੍ਹਾਂ ਦੀ ਪਹਿਲੀ ਪਸੰਦ ਦਸਿਆ। ਗ੍ਰੈਜੂਏਟ ਰੁਜ਼ਗਾਰ ਵਿਕਲਪਾਂ ਬਾਰੇ ਵਿਦਿਆਰਥੀਆਂ ਦੀ ਧਾਰਨਾ ਅਤੇ ਅਧਿਐਨ ਤੋਂ ਬਾਅਦ ਦੀਆਂ ਕੰਮ ਦੀਆਂ ਨੀਤੀਆਂ ਆਸਟ੍ਰੇਲੀਆ ਦੇ ਰੈਂਕ ਵਿੱਚ ਵਾਧੇ ਲਈ ਮੁੱਖ ਕਾਰਕ ਸਨ। ਇਨ੍ਹਾਂ ਕਾਰਕਾਂ ’ਚ ਕ੍ਰਮਵਾਰ 3.6 ਅਤੇ 3 ਫ਼ੀ ਸਦੀ ਦਾ ਵਾਧਾ ਹੋਇਆ ਹੈ। ਇਸ ਸਾਲ ਜੁਲਾਈ ਵਿੱਚ ਆਸਟ੍ਰੇਲੀਆ ਵਿੱਚ ਲਗਭਗ 654,870 ਵਿਦਿਆਰਥੀ ਵੀਜ਼ਾ ਧਾਰਕ ਸਨ – ਸਾਲ ਦੇ ਅੰਤ ਤੱਕ 750,000 ਤੱਕ ਪਹੁੰਚਣ ਦਾ ਅਨੁਮਾਨ ਹੈ।
ਇਹ ਅੰਕੜੇ ਆਸਟਰੇਲੀਆ ਦੇ ਵੱਡੇ ਸ਼ਹਿਰਾਂ ਵਿੱਚ ਕਿਰਾਏ ਦੇ ਸੰਕਟ ਦਾ ਸਾਹਮਣਾ ਕਰਨ ਦੇ ਦੌਰਾਨ ਆਏ ਹਨ। ਸਰਵੇਖਣ ਕੀਤੇ ਗਏ ਮੌਜੂਦਾ ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਵਿੱਚੋਂ ਇੱਕ ਤਿਹਾਈ ਤੋਂ ਵੱਧ (35 ਫ਼ੀਸਦੀ) ਨੇ ਕਿਹਾ ਕਿ ਕੈਂਪਸ ਦੇ ਨੇੜੇ ਉਨ੍ਹਾਂ ਦੇ ਕਿਰਾਏ ਦੀ ਰਿਹਾਇਸ਼ ਦੀ ਲਾਗਤ ਉਨ੍ਹਾਂ ਦੇ ਬਜਟ ਨਾਲੋਂ ਵੱਧ ਹੈ। ਇੱਕ ਹੋਰ ਤਿਹਾਈ ਉੱਤਰਦਾਤਾ ਨੇ ਕਿਹਾ ਕਿ ਉਨ੍ਹਾਂ ਨੇ ਕੈਂਪਸ ਤੋਂ ਬਹੁਤ ਦੂਰ ਕਿਰਾਏ ‘ਤੇ ਲਿਆ ਸੀ ਕਿਉਂਕਿ ਇਹ ਵਧੇਰੇ ਸਸਤੇ ਸਨ।
