ਆਸਟ੍ਰੇਲੀਆ ’ਚ ਬੇਘਰੇ ਲੋਕਾਂ ਬਾਰੇ ਚਿੰਤਾਜਨਕ ਅੰਕੜੇ ਆਏ ਸਾਹਮਣੇ, 25% ਲੋਕ ਆਪਣਾ ਘਰ ਗੁਆਉਣ ਬਾਰੇ ਚਿੰਤਤ

ਮੈਲਬਰਨ : ਸਾਲਵੇਸ਼ਨ ਆਰਮੀ ਦੀ ਇਕ ਰਿਪੋਰਟ ਅਨੁਸਾਰ, ਇੱਕ ਚੌਥਾਈ ਆਸਟ੍ਰੇਲੀਆਈ ਲੋਕਾਂ ਨੂੰ ਰਹਿਣ-ਸਹਿਣ ਦੀ ਲਾਗਤ ਦੇ ਸੰਕਟ ਕਾਰਨ ਬੇਘਰ ਹੋਣ ਦਾ ਡਰ ਹੈ। ਸਰਵੇਖਣ ਵਿੱਚ ਪਾਇਆ ਗਿਆ ਕਿ 25٪ ਲੋਕ ਆਪਣਾ ਘਰ ਗੁਆਉਣ ਬਾਰੇ ਚਿੰਤਤ ਹਨ, ਜਦੋਂ ਕਿ ਵਿੱਤੀ ਰਾਹਤ ਸਹਾਇਤਾ ਪ੍ਰਾਪਤ ਕਰਨ ਵਾਲੇ 1500 ਲੋਕਾਂ ਦੇ ਇੱਕ ਵੱਖਰੇ ਸਰਵੇਖਣ ਤੋਂ ਪਤਾ ਚੱਲਿਆ ਹੈ ਕਿ 71٪ ਲੋਕ ਹਾਊਸਿੰਗ ਤਣਾਅ ਵਿੱਚ ਰਹਿ ਰਹੇ ਹਨ, 33٪ ਲੋਕ ਸਮੇਂ ਸਿਰ ਆਪਣਾ ਕਿਰਾਇਆ ਵੀ ਨਹੀਂ ਭਰ ਪਾ ਰਹੇ ਹਨ। ਜਦਕਿ 19٪ ਲੋਕ ਤਾਂ ਵਿੱਤੀ ਤੰਗੀ ਕਾਰਨ ਆਪਣੀ ਕਾਰ ਵਿੱਚ ਰਹਿਣ ਲਈ ਮਜਬੂਰ ਹਨ। ਸਾਲਵੇਸ਼ਨ ਆਰਮੀ ਇਸ ਮੁੱਦੇ ਨੂੰ ਸਮਝਣ ਲਈ ‘ਹੋਮਲੈੱਸਨੈੱਸ ਵੀਕ’ (5-11 ਅਗਸਤ) ਦੌਰਾਨ ਇੱਕ ਆਨਲਾਈਨ ਸਰਵੇਖਣ ਕਰ ਰਹੀ ਹੈ। ਸੰਗਠਨ ਨੇ ਪਿਛਲੇ ਸਾਲ ਲੋੜਵੰਦ ਲੋਕਾਂ ਨੂੰ 1.2 ਮਿਲੀਅਨ ਤੋਂ ਵੱਧ ਰਾਤਾਂ ਤਕ ਦੀ ਰਿਹਾਇਸ਼ ਪ੍ਰਦਾਨ ਕੀਤੀ ਅਤੇ ਇਹ ਬੇਘਰੇ ਲੋਕਾਂ ਨੂੰ ਘਰ ਦੇਣ ਲਈ ਸਮੂਹਿਕ ਕਾਰਵਾਈ ਦੀ ਮੰਗ ਕਰ ਰਹੀ ਹੈ।