ਵਿਦੇਸ਼ੀ ਮੂਲ ਦੇ ਡਰਾਈਵਰਾਂ ਨੂੰ ਹੈਵੀ ਵਹੀਕਲ ਲਾਇਸੈਂਸ ਦੇਣ ਲਈ ਵੱਧ ਤਜਰਬੇ ਦੀ ਕੀਤੀ ਵਕਾਲਤ
ਮੈਲਬਰਨ: ਸਾਊਥ ਆਸਟ੍ਰੇਲੀਆ ਦੇ ਆਇਰ ਹਾਈਵੇਅ ‘ਤੇ ਇਕ ਹਾਦਸੇ ‘ਚ ਮਾਰੇ ਗਏ ਨੇਵਿਲ ਨਾਂ ਦੇ ਟਰੱਕ ਡਰਾਈਵਰ ਦੀ ਵਿਧਵਾ ਡੇਲਫੀਨ ਮੁਗ੍ਰਿਜ ਨੇ ਸਰਕਾਰ ਵੱਲੋਂ ਟਰੱਕਿੰਗ ਉਦਯੋਗ ‘ਚ ਸੁਧਾਰ ਕਰਨ ਲਈ ਪਟੀਸ਼ਨ ਸ਼ੁਰੂ ਕੀਤੀ ਹੈ। 4 ਅਪ੍ਰੈਲ ਨੂੰ ਵਾਪਰੇ ਇਸ ਹਾਦਸੇ ਵਿੱਚ ਪੰਜਾਬੀ ਮੂਲ ਦੇ ਵਿਕਟੋਰੀਅਨ ਟਰੱਕ ਡਰਾਈਵਰ ਯਾਦਵਿੰਦਰ ਸਿੰਘ ਭੱਟੀ ਅਤੇ NSW ਦੇ ਇੱਕ ਹੋਰ ਪੰਜਾਬੀ ਮੂਲ ਦੇ ਹੀ 25 ਸਾਲ ਦੇ ਵਿਅਕਤੀ ਦੀ ਵੀ ਮੌਤ ਹੋ ਗਈ ਸੀ।
ਮੁਗ੍ਰਿਜ ਟਰੱਕ ਡਰਾਈਵਰਾਂ ਨੂੰ ਵੱਡੇ ਟਰੱਕ ਚਲਾਉਣ ਦੇ ਯੋਗ ਹੋਣ ਤੋਂ ਪਹਿਲਾਂ ਵਧੇਰੇ ਤਜਰਬਾ ਰੱਖਣ ਦੀ ਵਕਾਲਤ ਕਰ ਰਹੀ ਹੈ। ਉਸਦਾ ਮੰਨਣਾ ਹੈ ਕਿ ਡਰਾਈਵਰਾਂ ਨੂੰ ਆਪਣਾ ਹੈਵੀ ਵਹੀਕਲ ਲਾਇਸੈਂਸ ਪ੍ਰਾਪਤ ਕਰਨ ਤੋਂ ਪਹਿਲਾਂ ਇੱਕ ਸਾਲ ਲਈ ਨਿਯਮਤ ਕਾਰ, ਹਲਕੇ ਸਖਤ ਅਤੇ ਦਰਮਿਆਨੇ ਸਖਤ Class C ਲਾਇਸੈਂਸ ਰੱਖਣੇ ਚਾਹੀਦੇ ਹਨ। ਭਾਰੀ ਅਤੇ ਮਲਟੀਪਲ ਕੰਬੀਨੇਸ਼ਨ ਟਰੱਕ ਲਾਇਸੈਂਸਾਂ ਲਈ, ਉਹ ਹੇਠਲੀਆਂ ਸ਼੍ਰੇਣੀਆਂ ਵਿੱਚ ਡਰਾਈਵਿੰਗ ਅਨੁਭਵ ਦਾ ਪ੍ਰਦਰਸ਼ਨ ਵੀ ਚਾਹੁੰਦੀ ਹੈ।
ਇਸ ਪਟੀਸ਼ਨ ਨੂੰ SA ਰੋਡ ਟਰਾਂਸਪੋਰਟ ਐਸੋਸੀਏਸ਼ਨ ਦੇ ਕਾਰਜਕਾਰੀ ਨਿਰਦੇਸ਼ਕ ਸਟੀਵ ਸ਼ੀਅਰ ਦਾ ਸਮਰਥਨ ਹਾਸਲ ਹੈ। ਇਸ ਦਾ ਉਦੇਸ਼ ਇਹ ਯਕੀਨੀ ਕਰਨਾ ਹੈ ਕਿ ਵਿਦੇਸ਼ੀ ਮੂਲ ਦੇ ਡਰਾਈਵਰ ਇਨ੍ਹਾਂ ਗਾਈਡਲਾਈਨਜ਼ ਦੀ ਪਾਲਣਾ ਕੀਤੇ ਬਿਨਾਂ ਆਸਟ੍ਰੇਲੀਆ ਵਿੱਚ ਹੈਵੀ ਵਹੀਕਲ ਲਾਇਸੈਂਸ ਪ੍ਰਾਪਤ ਨਾ ਕਰ ਸਕਣ, ਜਿਸ ਨਾਲ ਸੜਕਾਂ ਸੁਰੱਖਿਅਤ ਹੋ ਜਾਣ ਦਾ ਦਾਅਵਾ ਕੀਤਾ ਜਾ ਰਿਹਾ ਹੈ। ਮੁਗ੍ਰਿਜ ਨੇ ਆਪਣੇ ਮਰਹੂਮ ਪਤੀ, ਜੋ ਸਲਿਮ ਦੇ ਨਾਂ ਨਾਲ ਇਲਾਕੇ ’ਚ ਮਸ਼ਹੂਰ ਸਨ, ਆਪਣੇ ਪਿੱਛੇ 20 ਬੱਚੇ, ਮਤਰੇਏ ਬੱਚੇ ਅਤੇ ਪੋਤੇ-ਪੋਤੀਆਂ ਛੱਡ ਗਏ ਹਨ। ਇਸ ਦੁਖਾਂਤ ਨੇ ਪੂਰੇ ਟਰੱਕਿੰਗ ਉਦਯੋਗ ਨੂੰ ਹਿਲਾ ਕੇ ਰੱਖ ਦਿੱਤਾ ਹੈ।
