ਮੈਲਬਰਨ: ਇਮੀਗ੍ਰੇਸ਼ਨ ਨੂੰ ਘਟਾਉਣ ਦੇ ਉਦੇਸ਼ ਨਾਲ ਆਸਟ੍ਰੇਲੀਆ ਸਰਕਾਰ ਦੀਆਂ ਸਖਤ ਵਿਦਿਆਰਥੀ ਵੀਜ਼ਾ ਨੀਤੀਆਂ ਕਾਰਨ ਅੱਠ ਆਸਟ੍ਰੇਲੀਆਈ ਯੂਨੀਵਰਸਿਟੀਆਂ ਨੇ ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਲਈ ਆਪਣੇ ਦਰਵਾਜ਼ੇ ਬੰਦ ਕਰ ਦਿੱਤੇ ਹਨ। ਇਨ੍ਹਾਂ ਯੂਨੀਵਰਸਿਟੀਆਂ ’ਚ ਵੈਸਟਰਨ ਸਿਡਨੀ ਯੂਨੀਵਰਸਿਟੀ, ਮੈਕਕੁਏਰੀ, ਵੋਲੋਂਗੋਂਗ, ਲੈਟਰੋਬ, ਡੀਕਿਨ, ਸੈਂਟਰਲ ਕੁਈਨਜ਼ਲੈਂਡ, ਐਡੀਥ ਕੋਵਾਨ ਅਤੇ ਕੈਪਲਾਨ ਬਿਜ਼ਨਸ ਸਕੂਲ ਸ਼ਾਮਲ ਹਨ। ਯੂਨੀਵਰਸਿਟੀਆਂ ਉਮੀਦਵਾਰਾਂ ਵੱਲੋਂ ਅਦਾ ਕੀਤੀਆਂ ਸਾਰੀਆਂ ਫੀਸਾਂ ਵਾਪਸ ਕਰ ਦੇਣਗੀਆਂ।
ਨਵੀਂ ਇਮੀਗ੍ਰੇਸ਼ਨ ਨੀਤੀ ਯੂਨੀਵਰਸਿਟੀਆਂ ਨੂੰ ਉਨ੍ਹਾਂ ਦੇ ਜੋਖਮ ਦੇ ਪੱਧਰ ਦੇ ਅਧਾਰ ‘ਤੇ ਰੈਂਕ ਦਿੰਦੀ ਹੈ, ਜਿਸ ਵਿੱਚ ਗਰੁੱਪ 1 ਯੂਨੀਵਰਸਿਟੀਆਂ ਵਿੱਚ ਅਰਜ਼ੀ ਦੇਣ ਵਾਲੇ ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਨੂੰ ਤਰਜੀਹ ਦਿੱਤੀ ਜਾਂਦੀ ਹੈ। ਗਰੁੱਪ 2 ਅਤੇ 3 ਯੂਨੀਵਰਸਿਟੀਆਂ ਵਿੱਚ ਅਰਜ਼ੀ ਦੇਣ ਵਾਲਿਆਂ ਲਈ, ਵੀਜ਼ਾ ਅਰਜ਼ੀ ਪ੍ਰਕਿਰਿਆ ਵਿੱਚ ਵਧੇਰੇ ਸਮਾਂ ਲੱਗੇਗਾ ਅਤੇ ਅੰਗਰੇਜ਼ੀ ਦੀ ਮੁਹਾਰਤ ਅਤੇ ਵਿੱਤੀ ਸਮਰੱਥਾ ਦੇ ਵਾਧੂ ਸਬੂਤ ਦੀ ਲੋੜ ਹੋਵੇਗੀ। ਇਸ ਲਈ ਆਪਣੀ ਸਾਖ ਕਾਇਮ ਰੱਖਣ ਲਈ ਇਨ੍ਹਾਂ ਯੂਨੀਵਰਸਿਟੀਆਂ ਨੇ ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਲਈ ਆਪਣੇ ਦਰਵਾਜ਼ੇ ਬੰਦ ਕਰਨ ਦਾ ਫੈਸਲਾ ਕੀਤਾ ਹੈ।
ਬਹੁਤ ਸਾਰੀਆਂ ਸੰਸਥਾਵਾਂ ਨੇ ਮੁੱਖ ਤੌਰ ‘ਤੇ ਭਾਰਤ, ਨੇਪਾਲ ਅਤੇ ਪਾਕਿਸਤਾਨ ਦੇ ਉਮੀਦਵਾਰਾਂ ਦੀਆਂ ਦਾਖਲਾ ਪੇਸ਼ਕਸ਼ਾਂ ਨੂੰ ਰੱਦ ਕਰਨ ਦਾ ਫੈਸਲਾ ਕੀਤਾ ਹੈ, ਜਿਨ੍ਹਾਂ ’ਚ ਵੀਜ਼ਾ ਰੱਦ ਕੀਤੇ ਜਾਣ ਦੀ ਉੱਚ ਦਰ ਹੈ। ਇਹ ਜੁਲਾਈ 2025 ਤੱਕ ਵਿਦੇਸ਼ਾਂ ਵਿੱਚ ਸ਼ੁੱਧ ਪ੍ਰਵਾਸ ਨੂੰ 250,000 ਤੱਕ ਘਟਾਉਣ ਦੀ ਸਰਕਾਰ ਦੀ ਯੋਜਨਾ ਦੇ ਜਵਾਬ ਵਿੱਚ ਹੈ, ਜਿਸ ਕਾਰਨ ਵੀਜ਼ਾ ਇਨਕਾਰ ਵਿੱਚ ਵਾਧਾ ਹੋਇਆ ਹੈ। ਦਸੰਬਰ 2023 ਤਕ ਖ਼ਤਮ ਹੋਏ ਛੇ ਮਹੀਨਿਆਂ ਦੌਰਾਨ ਵੀਜ਼ਾ ਮਨਜ਼ੂਰੀ ਦੀ ਦਰ ਸਿਰਫ਼ 80 ਫ਼ੀਸਦੀ ਰਹਿ ਗਈ ਸੀ ਜੋ ਪਿਛਲੇ ਤਿੰਨ ਸਾਲਾਂ ’ਚ ਸਭ ਤੋਂ ਮਾੜੀ ਸਥਿਤੀ ਹੈ।
ਆਸਟਰੇਲੀਆ ਦੀਆਂ ਨਵੀਆਂ ਮਾਈਗ੍ਰੇਸ਼ਨ ਸੈਟਿੰਗਾਂ ਦੇ ਤਹਿਤ, ਸੰਭਾਵਿਤ ਵਿਦਿਆਰਥੀਆਂ ਨੂੰ ਹੁਣ ਜ਼ਿਆਦਾ ਬੱਚਤ, ਅੰਗਰੇਜ਼ੀ ਦੀ ਮੁਹਾਰਤ ਦਾ ਉੱਚ ਪੱਧਰ ਸਾਬਤ ਕਰਨਾ ਪਵੇਗਾ, ਅਤੇ ਵੀਜ਼ਾ ਅਰਜ਼ੀ ਪ੍ਰਕਿਰਿਆ ਦੇ ਹਿੱਸੇ ਵਜੋਂ ਇੱਕ ਅਸਲ ਵਿਦਿਆਰਥੀ ਟੈਸਟ ਪਾਸ ਕਰਨਾ ਲਾਜ਼ਮੀ ਹੈ। ਇਹ ਨਵਾਂ ਟੈਸਟ ਇਹ ਮੁਲਾਂਕਣ ਕਰਨ ਲਈ ਤਿਆਰ ਕੀਤਾ ਗਿਆ ਹੈ ਕਿ ਕੀ ਬਿਨੈਕਾਰ ਸੱਚਮੁੱਚ ਪੜ੍ਹਾਈ ਕਰਨ ਦੇ ਮਕਸਦ ਲਈ ਅਸਥਾਈ ਤੌਰ ‘ਤੇ ਆਸਟ੍ਰੇਲੀਆ ਵਿੱਚ ਰਹਿਣ ਦਾ ਇਰਾਦਾ ਰੱਖਦੇ ਹਨ, ਜਾਂ ਇੱਥੇ ਕੰਮ ਕਰ ਕੇ ਪੈਸੇ ਕਮਾਉਣਾ ਉਨ੍ਹਾਂ ਦਾ ਉਦੇਸ਼ ਹੈ।
