ਮੈਲਬਰਨ : ਨਿਊਯਾਰਕ ਦੀ ਅਦਾਲਤ ਵਿੱਚ 54 ਸਾਲ ਦੇ ਨਿਖਿਲ ਗੁਪਤਾ ਨੇ ਸਿੱਖ ਵੱਖਵਾਦੀ ਆਗੂ ਗੁਰਪਤਵੰਤ ਸਿੰਘ ਪੰਨੂੰ ਦੀ ਹੱਤਿਆ ਦੀ ਸਾਜ਼ਿਸ਼ ਰਚਣ ਦੇ ਦੋਸ਼ ਕਬੂਲ ਕਰ ਲਏ ਹਨ। ਇਨ੍ਹਾਂ ਦੋਸ਼ਾਂ ਤੋਂ ਉਹ ਪਹਿਲਾਂ ਮੁਕਰਦਾ ਰਿਹਾ ਸੀ। ਗੁਪਤਾ ’ਤੇ ਕਿਰਾਏ ਤੇ ਕਤਲ, ਸਾਜ਼ਿਸ਼ ਅਤੇ ਮਨੀ ਲਾਂਡਰਿੰਗ ਦੇ ਦੋਸ਼ ਲੱਗੇ ਹਨ। ਸਰਕਾਰੀ ਵਕੀਲ ਉਸ ਨੂੰ 21–24 ਸਾਲ ਦੀ ਸਜ਼ਾ ਦੀ ਸਿਫਾਰਸ਼ ਕਰ ਰਹੇ ਹਨ। ਇਹ ਪਹਿਲੀ ਵਾਰੀ ਹੈ ਕਿ ਕਿਸੇ ਨੂੰ ਅਮਰੀਕਾ ਵਿੱਚ ਭਾਰਤੀ ਸਰਕਾਰ-ਪ੍ਰੋਤਸਾਹਿਤ ਹੱਤਿਆ ਦੀ ਸਾਜ਼ਿਸ਼ ਲਈ ਦੋਸ਼ੀ ਠਹਿਰਾਇਆ ਗਿਆ ਹੈ।
ਅਮਰੀਕੀ ਅਧਿਕਾਰੀਆਂ ਦੇ ਅਨੁਸਾਰ, ਗੁਪਤਾ ਨੇ $15,000 ਅਗਾਊਂ ਦੇ ਕੇ ਇੱਕ ਹਿੱਟਮੈਨ ਨੂੰ ਕਿਰਾਏ ‘ਤੇ ਲੈਣ ਦੀ ਕੋਸ਼ਿਸ਼ ਕੀਤੀ, ਪਰ ਉਹ ਏਜੰਟ ਅਸਲ ਵਿੱਚ ਡੀ.ਈ.ਏ. ਦਾ ਅੰਡਰਕਵਰ ਅਧਿਕਾਰੀ ਸੀ। ਜਾਂਚ ਦੌਰਾਨ ਪਤਾ ਲੱਗਾ ਕਿ ਗੁਪਤਾ ਨੇ ਭਾਰਤ ਦੀ ਗੁਪਤਚਰ ਏਜੰਸੀ ਦੇ ਅਧਿਕਾਰੀ ਵਿਕਾਸ ਯਾਦਵ ਨਾਲ ਮਿਲ ਕੇ ਇਹ ਯੋਜਨਾ ਬਣਾਈ। ਦੱਸਿਆ ਜਾ ਰਿਹਾ ਹੈ ਕਿ ਜਾਂਚ ਦੌਰਾਨ ਅਮਰੀਕੀ ਏਜੰਸੀਆ ਨੂੰ ਗੁਪਤਾ ਵਿਰੁਧ ਪੁਖਤਾ ਸਬੂਤ ਮਿਲ ਹਨ ਜਿਸ ’ਚ ਉਸ ਵੱਲੋਂ ਸਾਜ਼ਸ਼ ਬਾਰੇ ਕੀਤੀ ਗੱਲਬਾਤ ਦੀ ਰਿਕਾਰਡਿੰਗ ਵੀ ਸ਼ਾਮਲ ਹੈ। ਗੁਪਤਾ ਨੇ ਦਾਅਵਾ ਕੀਤਾ ਹੈ ਕਿ ਕੈਨੇਡਾ ’ਚ 2023 ਦੌਰਾਨ ਹਰਦੀਪ ਸਿੰਘ ਨਿੱਝਰ ਦੇ ਕਤਲ ਦੀ ਸਾਜ਼ਸ਼ ’ਚ ਵੀ ਇਹੀ ਨੈੱਟਵਰਕ ਸ਼ਾਮਲ ਸੀ।
ਗੁਪਤਾ ਨੂੰ ਜੂਨ 2023 ਵਿੱਚ ਪ੍ਰਾਗ ਵਿੱਚ ਗ੍ਰਿਫ਼ਤਾਰ ਕੀਤਾ ਗਿਆ ਅਤੇ ਜੂਨ 2024 ਵਿੱਚ ਅਮਰੀਕਾ ਭੇਜਿਆ ਗਿਆ। ਪਹਿਲਾਂ ਉਸ ਨੇ ਦੋਸ਼ ਨਾ ਮੰਨਿਆ ਸੀ, ਪਰ ਫਰਵਰੀ 2026 ਵਿੱਚ ਦੋਸ਼ੀ ਕਬੂਲ ਕਰ ਲਿਆ।
ਦੋਸ਼ ਕਬੂਲੀ ਦੀ ਸੁਣਵਾਈ ਦੌਰਾਨ ਸਿੱਖ ਕਾਰਕੁਨ ਵੀ ਅਦਾਲਤ ’ਚ ਮੌਜੂਦ ਰਹੇ। ਉਨ੍ਹਾਂ ਅਦਾਲਤ ਬਾਹਰ “ਖਾਲਿਸਤਾਨ” ਦੇ ਨਾਰੇ ਲਗਾਏ ਅਤੇ ਅਰਦਾਸ ਕੀਤੀ। ਪੰਨੂੰ ਨੇ ਮੀਡੀਆ ਨਾਲ ਗੱਲਬਾਤ ’ਚ ਗੁਪਤਾ ਨੂੰ “ਸਿਰਫ਼ ਇੱਕ ਸਿਪਾਹੀ” ਦਸਿਆ। ਉਸ ਨੇ ਅਮਰੀਕਾ ਨੂੰ ਭਾਰਤੀ ਸਰਕਾਰ ਦੇ ਅਧਿਕਾਰੀਆਂ ਵਿਰੁਧ ਕਾਰਵਾਈ ਕਰਨ ਦੀ ਮੰਗ ਕੀਤੀ। ਪੰਨੂੰ ਨੇ ਕਿਹਾ ਕਿ ਉਹ ਧਮਕੀਆਂ ਦੇ ਬਾਵਜੂਦ ਆਪਣੀ ਸਰਗਰਮੀ ਜਾਰੀ ਰੱਖੇਗਾ।
ਦੂਜੇ ਪਾਸੇ ਭਾਰਤ ਨੇ ਕਿਸੇ ਵੀ ਸ਼ਮੂਲੀਅਤ ਤੋਂ ਇਨਕਾਰ ਕੀਤਾ ਹੈ। ਇਹ ਮਾਮਲਾ ਅਮਰੀਕਾ ਅਤੇ ਕੈਨੇਡਾ ਨਾਲ ਭਾਰਤ ਦੇ ਸੰਬੰਧਾਂ ਵਿੱਚ ਤਣਾਅ ਦਾ ਕਾਰਨ ਬਣਿਆ ਹੈ ਅਤੇ ਖਾਲਿਸਤਾਨ ਅੰਦੋਲਨ ਨੂੰ ਲੈ ਕੇ ਚਿੰਤਾਵਾਂ ਵਧਾਈਆਂ ਹਨ।
