ਮੈਲਬਰਨ: ਕੈਪਟਨ ਜੇਮਜ਼ ਕੁਕ ਵੱਲੋਂ 254 ਸਾਲ ਪਹਿਲਾਂ ਆਸਟ੍ਰੇਲੀਆ ’ਚ ਆਮਦ ’ਤੇ ਇਥੋਂ ਦੇ ਮੂਲ ਵਾਸੀਆਂ ਤੋਂ ਬਗ਼ੈਰ ਇਜਾਜ਼ਤ ਲੈ ਲਏ ਗਏ ਚਾਰ ਨੇਜੇ ਅੱਜ ਕੈਂਬਰਿਜ ਯੂਨੀਵਰਸਿਟੀ ਵਿਚ ਇਕ ਸਮਾਰੋਹ ਦੌਰਾਨ ਆਸਟ੍ਰੇਲੀਆ ਦੇ ਮੂਲਵਾਸੀਆਂ ਨੂੰ ਵਾਪਸ ਕਰ ਦਿੱਤੇ ਗਏ ਹਨ। ਇਹ ਨੇਜੇ ਅਪ੍ਰੈਲ 1770 ਵਿੱਚ ਕੁੱਕ ਦੇ ਚਾਲਕ ਦਲ ਅਤੇ ਕਾਮੇ, ਜਾਂ ਬੋਟਨੀ ਬੇ ਦੇ ਮੂਲ ਵਾਸੀਆਂ ਵਿਚਕਾਰ ਪਹਿਲੇ ਸੰਪਰਕ ਦਾ ਹਿੱਸਾ ਸਨ। ਇਹ ਸੈਂਡਵਿਚ ਦੇ ਚੌਥੇ ਅਰਲ ਜੌਹਨ ਮੌਂਟੇਗੂ ਦੁਆਰਾ ਟ੍ਰਿਨਿਟੀ ਕਾਲਜ, ਕੈਮਬ੍ਰਿਜ ਨੂੰ ਪੇਸ਼ ਕੀਤੇ ਗਏ ਸਨ, ਅਤੇ 20ਵੀਂ ਸਦੀ ਦੇ ਅਰੰਭ ਤੋਂ ਯੂਨੀਵਰਸਿਟੀ ਦੇ ਪੁਰਾਤੱਤਵ ਅਤੇ ਮਾਨਵ ਵਿਗਿਆਨ ਦੇ ਅਜਾਇਬ ਘਰ ਵਿੱਚ ਸਨ। ਪਿਛਲੇ ਸਾਲ ਇੱਕ ਮੁਹਿੰਮ ਅਤੇ ਰਸਮੀ ਵਾਪਸੀ ਦੀ ਬੇਨਤੀ ਤੋਂ ਬਾਅਦ ਨੇਜਿਆਂ ਦੀ ਵਾਪਸੀ ‘ਤੇ ਸਹਿਮਤੀ ਬਣੀ ਸੀ, ਜਿਸ ਨੂੰ ਸੁਲ੍ਹਾ ਅਤੇ ਬ੍ਰਿਟੇਨ ਤੇ ਆਸਟ੍ਰੇਲੀਆ ਦੇ ਸਾਂਝੇ ਇਤਿਹਾਸ ਦੀ ਵਧੇਰੇ ਸਮਝ ਦੀ ਦਿਸ਼ਾ ਵਿੱਚ ਇੱਕ ਕਦਮ ਵਜੋਂ ਦੇਖਿਆ ਜਾ ਰਿਹਾ ਹੈ। ਨੈਸ਼ਨਲ ਮਿਊਜ਼ੀਅਮ ਆਫ ਆਸਟ੍ਰੇਲੀਆ ਦੀ ਵੈੱਬਸਾਈਟ ਦੇ ਅਨੁਸਾਰ, ਕੁੱਕ ਦੇ ਸਾਥੀਆਂ ਵੱਲੋਂ ਇੱਕ ਖਾਲੀ ਮੂਲਵਾਸੀ ਕੈਂਪਸਾਈਟ ਤੋਂ ਬਿਨਾਂ ਇਜਾਜ਼ਤ ਦੇ ਨੇਜੇ ਚੁੱਕ ਲਏ ਗਏ ਸਨ। ਇਨ੍ਹਾਂ ਨੂੰ ਹੁਣ ਕੁਰਨੇਲ, ਕਾਮੇ ਵਿਖੇ ਬਣਾਏ ਜਾਣ ਵਾਲੇ ਨਵੇਂ ਵਿਜ਼ਟਰ ਸੈਂਟਰ ਵਿੱਚ ਪ੍ਰਦਰਸ਼ਿਤ ਕੀਤਾ ਜਾਵੇਗਾ।
ਕੈਪਟਨ ਕੁਕ ਵੱਲੋਂ ਢਾਈ ਸੌ ਸਾਲ ਪਹਿਲਾਂ ਲਏ ਗਏ ਨੇਜੇ ਆਸਟ੍ਰੇਲੀਆ ਦੇ ਮੂਲਵਾਸੀਆਂ ਨੂੰ ਵਾਪਸ ਮਿਲੇ
