ਮੈਲਬਰਨ : ਆਸਟ੍ਰੇਲੀਆ ਦੇ NSW ਸਟੇਟ ਦੀ ਰਾਜਧਾਨੀ ਸਿਡਨੀ ਸਥਿਤ Bondi Beach ’ਤੇ ਐਤਵਾਰ ਸ਼ਾਮ ਨੂੰ ਹੋਏ ਭਿਆਨਕ ਅਤਿਵਾਦੀ ਹਮਲੇ ਦੇ ਮਾਮਲੇ ’ਚ ਨਵਾਂ ਖ਼ੁਲਾਸਾ ਹੋਇਆ ਹੈ। ਦੋ ਹਮਲਾਵਰਾਂ ’ਚੋਂ ਇੱਕ ਸਾਜਿਦ ਅਕਰਮ ਇੰਡੀਆ ਦਾ ਨਾਗਰਿਕ ਸੀ ਸਾਜਿਦ ਇੰਡੀਆ ਦੇ ਸਟੇਟ ਤੇਲੰਗਾਨਾ ਦੇ ਹੈਦਰਾਬਾਦ ਸ਼ਹਿਰ ’ਚ ਰਹਿੰਦਾ ਸੀ ਅਤੇ 1998 ’ਚ ਆਸਟ੍ਰੇਲੀਆ ਆਇਆ ਸੀ। ਤੇਲੰਗਾਨਾ ਪੁਲਿਸ ਦੀ ਸਪੈਸ਼ਲ ਬ੍ਰਾਂਚ ਅਤੇ ਹੋਰ ਯੂਨਿਟਾਂ ਦੇ ਅਧਿਕਾਰੀਆਂ ਨੇ ਸਾਜਿਦ ਦੀ ਮਾਂ ਅਤੇ ਭਰਾ ਤੋਂ ਅੱਜ ਪੁੱਛਗਿੱਛ ਕੀਤੀ। ਪਰਿਵਾਰਕ ਮੈਂਬਰਾਂ ਨੇ ਪੁਲਿਸ ਨੂੰ ਦੱਸਿਆ ਕਿ 1998 ਵਿੱਚ ਆਸਟ੍ਰੇਲੀਆ ਜਾਣ ਤੋਂ ਬਾਅਦ ਸਾਜਿਦ ਦਾ ਪਰਿਵਾਰ ਨਾਲ ਬਹੁਤ ਸੀਮਤ ਸੰਪਰਕ ਸੀ।
ਅਲ-ਹਸਨਾਥ ਕਲੋਨੀ ਦਾ ਇਹ ਘਰ ਅਚਾਨਕ ਧਿਆਨ ਦਾ ਕੇਂਦਰ ਬਣ ਗਿਆ ਜਦੋਂ ਪੁਲਿਸ ਨੇ ਪੁਸ਼ਟੀ ਕੀਤੀ ਕਿ ਸਾਜਿਦ ਅਕਰਮ ਹੈਦਰਾਬਾਦ ਦਾ ਰਹਿਣ ਵਾਲਾ ਹੈ। 14 ਦਸੰਬਰ ਨੂੰ ਸਿਡਨੀ ਦੇ Bondi Beach ‘ਤੇ ਯਹੂਦੀ ਹਨੁਕਾ ਤਿਉਹਾਰ ਮਨਾਏ ਜਾਣ ਦੌਰਾਨ ਸਾਜਿਦ (50 ਸਾਲ) ਅਤੇ ਉਸ ਦੇ ਪੁੱਤਰ ਨਵੀਦ ਅਕਰਮ (24 ਸਾਲ) ਵੱਲੋਂ ਕੀਤੀ ਗਈ ਗੋਲੀਬਾਰੀ ਦੇ ਨਤੀਜੇ ਵਜੋਂ 15 ਲੋਕਾਂ ਦੀ ਜਾਨ ਚਲੀ ਗਈ ਸੀ। ਪੁਲਿਸ ਦੀ ਜਵਾਬੀ ਕਾਰਵਾਈ ’ਚ ਸਾਜਿਦ ਵੀ ਮਾਰਿਆ ਗਿਆ ਸੀ।
ਪੁਲਿਸ ਮੁਤਾਬਕ ਸਾਜਿਦ ਅਕਰਮ ਨੇ ਹੈਦਰਾਬਾਦ ਤੋਂ B.Com ਦੀ ਡਿਗਰੀ ਪੂਰੀ ਕੀਤੀ ਸੀ ਅਤੇ ਨਵੰਬਰ 1998 ਵਿੱਚ ਨੌਕਰੀ ਦੀ ਭਾਲ ਵਿੱਚ ਆਸਟ੍ਰੇਲੀਆ ਚਲਾ ਗਿਆ ਸੀ। ਬਾਅਦ ਵਿੱਚ ਉਸ ਨੇ ਆਸਟ੍ਰੇਲੀਆ ਵਿੱਚ ਪੱਕੇ ਤੌਰ ‘ਤੇ ਸੈਟਲ ਹੋਣ ਤੋਂ ਪਹਿਲਾਂ ਇੱਕ ਯੂਰਪੀਅਨ ਮੂਲ ਦੀ ਔਰਤ ਵੇਨੇਰਾ ਗ੍ਰੋਸੋ ਨਾਲ ਵਿਆਹ ਕਰਵਾ ਲਿਆ। ਉਨ੍ਹਾਂ ਦਾ ਇਕ ਪੁੱਤਰ ਨਵੀਦ (ਦੋ ਹਮਲਾਵਰਾਂ ਵਿਚੋਂ ਇੱਕ) ਅਤੇ ਇਕ ਧੀ ਹੈ।
ਸਾਜਿਦ ਅਕਰਮ ਕੋਲ ਇੰਡੀਆ ਦਾ ਪਾਸਪੋਰਟ ਹੈ ਅਤੇ ਉਸ ਦਾ ਬੇਟਾ ਅਤੇ ਬੇਟੀ ਆਸਟ੍ਰੇਲੀਆ ਦੇ ਨਾਗਰਿਕ ਹਨ। ਸਾਜਿਦ ਅਕਰਮ ਦੇ ਪਰਿਵਾਰਕ ਮੈਂਬਰਾਂ ਨੇ ਪੁਲਿਸ ਨੂੰ ਦੱਸਿਆ ਕਿ ਉਸ ਦਾ ਉਨ੍ਹਾਂ ਨਾਲ ਸੀਮਤ ਸੰਪਰਕ ਸੀ। ਆਸਟ੍ਰੇਲੀਆ ਮਾਈਗਰੇਟ ਕਰਨ ਤੋਂ ਬਾਅਦ ਉਹ ਛੇ ਮੌਕਿਆਂ ‘ਤੇ ਭਾਰਤ ਆਇਆ, ਮੁੱਖ ਤੌਰ ‘ਤੇ ਪਰਿਵਾਰ ਨਾਲ ਸਬੰਧਤ ਕਾਰਨਾਂ ਜਿਵੇਂ ਕਿ ਜਾਇਦਾਦ ਦੇ ਮਾਮਲੇ ਅਤੇ ਆਪਣੇ ਬਜ਼ੁਰਗ ਮਾਪਿਆਂ ਨਾਲ ਮੁਲਾਕਾਤ ਕਰਕੇ। 2009 ਵਿੱਚ ਆਪਣੇ ਪਿਤਾ ਦੀ ਮੌਤ ਦੇ ਸਮੇਂ ਵੀ ਉਹ ਭਾਰਤ ਦੀ ਨਹੀਂ ਆਇਆ ਸੀ। ਪਰਿਵਾਰਕ ਮੈਂਬਰਾਂ ਨੇ ਉਨ੍ਹਾਂ ਦੀ ਕੱਟੜਪੰਥੀ ਮਾਨਸਿਕਤਾ ਜਾਂ ਗਤੀਵਿਧੀਆਂ ਬਾਰੇ ਕੋਈ ਜਾਣਕਾਰੀ ਨਹੀਂ ਜ਼ਾਹਰ ਕੀਤੀ ਹੈ, ਅਤੇ ਨਾ ਹੀ ਉਨ੍ਹਾਂ ਹਾਲਾਤਾਂ ਬਾਰੇ ਜਿਨ੍ਹਾਂ ਕਾਰਨ ਉਨ੍ਹਾਂ ਨੂੰ ਕੱਟੜਪੰਥੀ ਬਣਾਇਆ ਗਿਆ ਸੀ।
ਹੈਦਰਾਬਾਦ ਪੁਲਿਸ ਅਨੁਸਾਰ ਸਾਜਿਦ ਅਕਰਮ ਦੇ 1998 ਵਿੱਚ ਰਵਾਨਗੀ ਤੋਂ ਪਹਿਲਾਂ ਭਾਰਤ ਵਿੱਚ ਰਹਿਣ ਦੌਰਾਨ ਉਸ ਦੇ ਵਿਰੁੱਧ ਕੋਈ ਮਾੜਾ ਰਿਕਾਰਡ ਨਹੀਂ ਹੈ। ਡੀ.ਜੀ.ਪੀ. ਸ਼ਿਵਾਧਰ ਰੈੱਡੀ ਨੇ ਕਿਹਾ ਕਿ ਸਾਜਿਦ ਅਕਰਮ ਅਤੇ ਉਸ ਦੇ ਬੇਟੇ ਨਵੀਦ ਦੇ ਕੱਟੜਪੰਥੀ ਹੋਣ ਦੇ ਕਾਰਕਾਂ ਦਾ ਭਾਰਤ ਨਾਲ ਕੋਈ ਸਬੰਧ ਨਹੀਂ ਹੈ ਅਤੇ ਨਾ ਹੀ ਤੇਲੰਗਾਨਾ ‘ਚ ਕੋਈ ਸਥਾਨਕ ਪ੍ਰਭਾਵ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਆਸਟ੍ਰੇਲੀਆ ਵਿੱਚ ਸਾਜਿਦ ਫਲਾਂ ਦਾ ਕਾਰੋਬਾਰ ਚਲਾ ਰਿਹਾ ਸੀ। ਉਸ ਦੇ ਪਿਤਾ ਸਾਊਦੀ ਅਰਬ ਵਿੱਚ ਨੌਕਰੀ ਕਰਦੇ ਸਨ, ਅਤੇ ਭਾਰਤ ਪਰਤਣ ‘ਤੇ, ਉਨ੍ਹਾਂ ਨੇ ਇੱਕ ਘਰ ਬਣਾਇਆ ਸੀ।
ਕਥਿਤ ਤੌਰ ‘ਤੇ ਸਾਜਿਦ ਦਾ ਜਾਇਦਾਦ ਨੂੰ ਲੈ ਕੇ ਆਪਣੇ ਭਰਾ ਨਾਲ ਝਗੜਾ ਹੋਇਆ ਸੀ। ਆਸਟ੍ਰੇਲੀਆ ਵਿੱਚ ਇੱਕ ਈਸਾਈ ਔਰਤ ਨਾਲ ਵਿਆਹ ਕਰਨ ਤੋਂ ਬਾਅਦ ਪਰਿਵਾਰਕ ਮੈਂਬਰਾਂ ਨੇ ਵੀ ਆਪਣੇ ਆਪ ਨੂੰ ਸਾਜਿਦ ਤੋਂ ਦੂਰ ਕਰ ਲਿਆ ਸੀ। ਸਾਜਿਦ ਆਖਰੀ ਵਾਰ 2022 ਵਿੱਚ ਹੈਦਰਾਬਾਦ ਆਇਆ ਸੀ। ਕਿਹਾ ਜਾਂਦਾ ਹੈ ਕਿ ਆਪਣੀ ਇੱਕ ਫੇਰੀ ਦੌਰਾਨ, ਉਹ ਨੇ ਇੱਥੇ ਵਸਣ ਬਾਰੇ ਸੋਚ ਰਿਹਾ ਸੀ। ਦਰਅਸਲ ਮੀਡੀਆ ਰਿਪੋਰਟਾਂ ’ਚ ਸਾਜਿਸ ਨੂੰ ਪਹਿਲਾਂ ਪਾਕਿਸਤਾਨੀ ਮੂਲ ਦਾ ਦੱਸਿਆ ਗਿਆ ਸੀ। ਪਰ ਇੱਕ ਹੋਰ ਮੀਡੀਆ ਰਿਪੋਰਟ ਅਨੁਸਾਰ ਉਹ ਨਵੰਬਰ ਮਹੀਨੇ ’ਚ ਆਪਣੇ ਪੁੱਤਰ ਨਾਲ ਫ਼ਿਲੀਪੀਨਜ਼ ’ਚ ‘ਫ਼ੌਜੀ ਕਿਸਮ ਦੀ’ ਸਿਖਲਾਈ ਲੈਣ ਗਿਆ ਸੀ ਜਿਸ ਤੋਂ ਬਾਅਦ ਸਾਹਮਣੇ ਆਇਆ ਸੀ ਕਿ ਉਸ ਕੋਲ ਇੰਡੀਆ ਦਾ ਪਾਸਪੋਰਟ ਹੈ।
Related Posts:
