ਆਸਟ੍ਰੇਲੀਆ ਵਿੱਚ ਰਿਹਾਇਸ਼ ਦੀ ਸਮਰੱਥਾ ਰਿਕਾਰਡ ਨੀਵੇਂ ਪੱਧਰ ’ਤੇ

ਮੈਲਬਰਨ : ਹਾਲ ਹੀ ਵਿੱਚ ਵਿਆਜ ਰੇਟ ਵਿੱਚ ਕਟੌਤੀ ਦੇ ਬਾਵਜੂਦ, ਆਸਟ੍ਰੇਲੀਅਨ ਲੋਕਾਂ ਲਈ ਸਿਰ ਉਤੇ ਛੱਤ ਰੱਖਣਾ ਕਈ ਦਹਾਕਿਆਂ ਵਿੱਚ ਸਭ ਤੋਂ ਮੁਸ਼ਕਲ ਬਣਿਆ ਹੋਇਆ ਹੈ। Cotality ਦੀ ਨਵੀਂ ਰਿਪੋਰਟ ਅਨੁਸਾਰ ਘਰ ਖਰੀਦਣ ਵਾਲੇ ਅਤੇ ਕਿਰਾਏਦਾਰ ਦੋਵੇਂ ਉੱਚ ਖਰਚਿਆਂ ਅਤੇ ਸੀਮਤ ਸਪਲਾਈ ਵਿਚਕਾਰ ਨਿਚੋੜੇ ਗਏ ਹਨ। ਨਵਾਂ ਕਰਜ਼ ਲੈਣ ਲਈ ਇੱਕ ਸਟੈਂਡਰਡ 20٪ ਡਿਪਾਜ਼ਿਟ ਜੋੜਨ ਵਿੱਚ ਹੀ ਲਗਭਗ ਪੂਰੇ ਦੇਸ਼ ਲਈ ਔਸਤਨ 12 ਸਾਲ ਲੱਗ ਜਾਂਦੇ ਹਨ। ਸਿਡਨੀ, ਐਡੀਲੇਡ, ਬ੍ਰਿਸਬੇਨ ਅਤੇ ਪਰਥ ਵਿੱਚ ਅਜਿਹਾ ਕਰਨ ਲਈ ਇੱਕ ਦਹਾਕੇ ਤੋਂ ਵੱਧ ਸਮਾਂ ਲੱਗਦਾ ਹੈ। ਇਹੀ ਨਹੀਂ ਕਿਰਾਏਦਾਰ ਹੁਣ ਕਿਰਾਏ ’ਤੇ ਆਪਣੀ ਆਮਦਨੀ ਦਾ ਰਿਕਾਰਡ 33.4٪ ਖਰਚ ਕਰਦੇ ਹਨ, ਜੋ ਕਿ 20 ਸਾਲਾਂ ਦੀ ਔਸਤ ਤੋਂ ਕਿਤੇ ਵੱਧ ਹੈ।

ਕੀਮਤ-ਤੋਂ-ਆਮਦਨੀ ਅਨੁਪਾਤ ਵੀ ਵੱਧ ਗਿਆ ਹੈ। ਘਰਾਂ ਦੀ ਕੀਮਤ ਹੁਣ ਔਸਤ ਇਨਕਮ ਨਾਲੋਂ 8.9 ਗੁਣਾ ਵੱਧ ਹੈ, ਜੋ ਕਿ ਪੰਜ ਸਾਲ ਪਹਿਲਾਂ 6.6 ਸੀ। ਰੀਜਨਲ ਘਰ ਵੀ ਕਿਫਾਇਤੀ ਨਹੀਂ ਹਨ, ਜਿੱਥੇ ਕੀਮਤਾਂ ਔਸਤਨ ਇਨਕਮ ਤੋਂ 8.1 ਗੁਣਾ ਵੱਧ ਹਨ। ਸ਼ਹਿਰਾਂ ’ਚ ਇਹ 8.2 ਗੁਣਾ ਵੱਧ ਹਨ।

ਸਿਡਨੀ ਸਭ ਤੋਂ ਮਹਿੰਗਾ ਸ਼ਹਿਰ ਬਣਿਆ ਹੋਇਆ ਹੈ, ਜਦਕਿ ਐਡੀਲੇਡ, ਬ੍ਰਿਸਬੇਨ ਅਤੇ ਪਰਥ ਵਿੱਚ ਕਿਫਾਇਤ ਵਿਗੜ ਰਹੀ ਹੈ। ਕੈਨਬਰਾ, ਹੋਬਾਰਟ ਅਤੇ ਮੈਲਬਰਨ ਵਿੱਚ ਹਲਕੇ ਸੁਧਾਰ ਦਿਖਾਈ ਦਿੰਦੇ ਹਨ। ਡਾਰਵਿਨ ਸਭ ਤੋਂ ਕਿਫਾਇਤੀ ਰਾਜਧਾਨੀ ਹੈ।

ਸੰਕਟ ਦੇ ਕਾਰਨ

• ਮਾਰਚ 2020 ਤੋਂ ਘਰ ਦੇ ਮੁੱਲ 47.3٪ ਵਧੇ ਹਨ, ਜਿਸ ਨਾਲ ਔਸਤ ਘਰਾਂ ਦੀਆਂ ਕੀਮਤਾਂ ਵਿੱਚ 280,000 ਡਾਲਰ ਦਾ ਵਾਧਾ ਹੋਇਆ ਹੈ।
• ਮਹਾਂਮਾਰੀ ਦੇ ਸਮੇਂ ਦਿੱਤੇ stimulus ਅਤੇ ਰਿਕਾਰਡ-ਘੱਟ ਵਿਆਜ ਰੇਟ ਨੇ ਮੰਗ ਨੂੰ ਵਧਾਇਆ।
• ਕੰਸਟਰੱਕਸ਼ਨ ਕਰਨ ਵਾਲਿਆਂ ਦੇ ਦੀਵਾਲੀਆਪਨ, ਵੱਧ ਰਹੀ ਸਮੱਗਰੀ ਦੀ ਲਾਗਤ, ਅਤੇ ਪਲਾਨਿੰਗ ਦੀਆਂ ਰੁਕਾਵਟਾਂ ਨੇ ਨਵੇਂ ਰਿਹਾਇਸ਼ੀ ਪ੍ਰੋਜੈਕਟਾਂ ਨੂੰ ਸੀਮਤ ਕਰ ਦਿੱਤਾ ਹੈ।
• ਸੰਯੁਕਤ ਮੰਗ ਅਤੇ ਸਪਲਾਈ ਦੇ ਦਬਾਅ ਨੇ ਘਰ ਦੇ ਮੁੱਲਾਂ ਅਤੇ ਕਿਰਾਏ ਦੋਵਾਂ ਵਿੱਚ ਤੇਜ਼ੀ ਪੈਦਾ ਕੀਤੀ।